އާންމު ސަލާމަތާއި ރައްކާތެރިކަމަށް ނުރައްކާވާފަދަ ގޮތަކަށް، ތޮއްޖެހިގެން ބިދޭސީން ދިރިއުޅެމުން އަންނަ އެކޮމޮޑޭޝަން ބްލޮކްތައް ބަލައި ފާސްކުރުމަށް ޓާސްކު ފޯސްއިން ހިންގަމުންދާ އޮޕަރޭޝަންގެ ދަށުން މިއަދު މާލޭގައި ހުރި 4 ތަނެއް ބަލައި ފާސްކޮށް، ގަވާއިދާ ޚިލާފަށް އުޅެމުންދިޔަ 7 ބިދޭސީން ހައްޔަރުކޮށްފިއެވެ.

މޯލްޑިވްސް އިމިގްރޭޝަނުން މިއަދު އެކްސްގައި ކުރި ޕޯސްޓެއްގައި ބުނެފައިވާ ގޮތުގައި، މި އޮޕަރޭޝަންގައި ބަލައި ފާސްކުރި 4 ތަނުގެ ތެރޭގައި 2 ގެއަކާއި 2 ހޮޓާ ހިމެނެއެވެ. އަދި މި ތަންތަނުގައި ގަވާއިދާ ޚިލާފަށް އުޅެމުންދިޔަ 7 ބިދޭސީން ވަނީ އިމިގްރޭޝަންގެ ބެލުމުގެ ދަށަށް ގެނެވިފައެވެ.

އިމިގްރޭޝަނުން އާންމުކޮށްފައިވާ ފޮޓޯތަކުން ދައްކާ ގޮތުގައި، މި ތަންތަނުގައި ސާފުތާހިރުކަމެއް ނެތްކަން ފާހަގަކުރެވެއެވެ.

މި އޮޕަރޭޝަނަކީ ބިދޭސީން ދިރިއުޅޭ ތަންތަން ގަވާއިދުން ބަލައި ފާސްކުރުމަށް ޓާސްކު ފޯސްއިން ކުރިއަށްގެންދާ މަސައްކަތުގެ ބައެއްކަން އިމިގްރޭޝަނުން ބުނެފައިވެއެވެ.

ރާއްޖޭގައި އިތުރުވެފައިވާ ބިދޭސީންގެ މައްސަލަ ހައްލުކުރުމުގެ ގޮތުން އިމިގްރޭޝަނުން ފުޅާދާއިރާއެއްގައި އޮޕަރޭޝަންތައް ހިންގަމުން އަންނަ އިރު މި އޮޕަރޭޝަންތަކުގައި ގިނަ އަދަދެއްގެ ތަންތަން ބަލައި ފާސްކޮށް، ޤަވާއިދާއި ޚިލާފަށް އުޅޭ 2000 އަށްވުރެ ގިނަ ބިދޭސީން ޑީޕޯޓް ކޮށްފައިވެއެވެ.