Jail gai meehun maruvun thakuraaruvaa massala thahugeegu kuran MDP in govalaifi

ޖަލުގައި މީހުން މަރުވުން ތަކުރާރުވާ މައްސަލަ ތަހުގީގުކުރަން އެމްޑީޕީން ގޮވާލައިފި

25 Sep 2024 | 00:10

އެމްޑީޕީ ލީޑަރޝިޕް އިން ބޭއްވި ނޫސްވެރިންގެ ބައްދަލުވުން --ފޮޓޯ: ވޮއިސް

ޖަލުގައި މީހުން މަރުވުން ތަކުރާރުވަމުންދާތީ އެކަން ސީރިއަސް މައްސަލައެއްގެ ގޮތުގައި ތަހުގީގު ކުރުމަށް އިދިކޮޅު އެމްޑީޕީން މިއަދު ގޮވާލައިފިއެވެ.

އެމްޑީޕީން މިގޮތަށް ގޮވާލާފައިވަނީ ޝަރީއަތް ނިމެންދެން ބަންދުކޮށްފައި ހުރި 62 އަހަރުގެ ފިރިހެނަކު މާފުށީ ޖަލުގައި އަމިއްލައަށް މަރުވެފައި އޮއްވާ މިއަދު ފެނުނު މައްސަލާގައި ކަންބޮޑުވުން ފާޅުކޮށް ނެރުނު ނޫސްބަޔާނެއްގައެވެ.

އެމްޑީޕީން ބުނެފައިވަނީ މި ހާދިސާ ހިނގާފައިވަނީ މި މަހުގެ ކުރީކޮޅު މާލޭގައި އަންހެނަކު ރަހީނުކުރި އާދަމް އަތުހަރު ފުލުހުންގެ ބެލުމުގެ ދަށުގައި ހުއްޓާ އަމިއްލައަށް މަރުވުމުން އެފަދަ ކަމެއް ތަކުރާރުވިޔަ ނުދިނުމަށް ފިޔަވަޅުތައް އެޅުމަށް އެ ޕާޓީން ގޮވައިލައިފައި ވަނިކޮށް ކަމަށެވެ.

"ދައުލަތުގެ ބެލުމުގެ ދަށުން ބަންދުގައި ހުންނަ ކޮންމެ މީހެއްގެ ސަލާމަތާއި ރައްކާތެރިކަން ކަށަވަރު ކުރުމަކީ ގާނޫނީ ގޮތުން ސަރުކާރުގެ މައްޗަށް ލާޒިމު ކަމެއް ކަމަށްވާއިރު، އަދި ދާދިފަހުން މި ބާވަތުގެ އެހެން ހާދިސާއެއް ހިނގާފައިވާއިރު، މި ގައިދީ ޖަލު ގޮޅީގައި ހަރަކާތްތެރިވަމުން ދިޔަ ގޮތް ރަނގަޅަށް ބަލައި އެކަށީގެންވާ ވަގުތުގައި ފިޔަވަޅު އެޅުމުގައި އިހުމާލުތަކެއް އޮތް ކަމަށް މި ޕާޓީއަށް ގަބޫލު ކުރެވޭ،"

އެމްޑީޕީގެ ބަޔާނުގައި ބުންޏެވެ.

އެމްޑީޕީގެ ބަޔާނުގައި ގޮވާލާފައިވަނީ ޖަލުގައި މީހުން މަރުވާ މައްސަލާގައި ފުރިހަމަ މިނިވަން ތަހުގީގެއް ހިންގައި އެ ތަހުގީގު އާންމުކުރުމަށާއި، މި ތަހުގީގުތަކުގެ ހޯދުންތަކުގެ މައްޗަށް ބިނާކޮށް މިފަދަ ހާދިސާތައް ތަކުރާރު ނުވާނެ ގޮތަށް ފިޔަވަޅުތައް އެޅުމަށެވެ.

މިއަދު ދަންޖެހިފައި ހުއްޓާއްޓާ ފެނުނު ގައިދީއަކީ ކުޑަކުއްޖަކަށް ޖިންސީ ހާނިއްކައެއް ކުރި ކަމުގެ ތުހުމަތުގައި ޝަރީއަތް ނިމެންދެން ބަންދުކޮށްފައި ހުރި މީހެކެވެ.

އޭނާ ދަންޖެހިފައި ހުއްޓާ ފެނުނީ މިއަދު ހެނދުނު 6:52ގައި ކަމަށް ކަރެކްޝަންސްއިން ބުނެފައިވެއެވެ.

ހަބަރު

މޯލްޑިވިއަން ޑިމޮކްރެޓިކް ޕާޓީ