ޖައްވުގައި ހަރުކުރެވޭ ސެޓެލައިޓު މެދުވެރިކޮށް ރާއްޖޭގެ ކަނޑު ސަރަހައްދު ބެލެހެއްޓުމަށް މަސައްކަތް ކުރަމުންދާކަމަށް ދިފާޢީ ވަޒީރު މުޙައްމަދު ޣައްސާން މައުމޫން ވިދާޅުވެއްޖެއެވެ.

ޕީއެސްއެމުން ގެނެސްދިން "ދިވެހީންގެ އަޑު ދުނިޔެއަށް" ކަވަރޭޖުގައި ވާހަކަފުޅު ދައްކަވަމުން ޣައްސާން ވިދާޅުވީ، ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވެރިކަމާއި ހަވާލުވެވަޑައިގެންނެވި ދުވަހު ދެއްވި ތަޤުރީރުގައި އެމަނިކުފާނު އެންމެ  އިސްކަމެްް ދެއްވާނީ ރާއްޖޭގެ މިނިވަންކަމާއި ސިޔާދަތީ އިސްތިގުލާލު ހިމާޔަތް ކުރައްވަން ކަމަށް ވަރަށް ޞަރީޙަކޮށް ވިދާޅުވެފައުވާ ކަމަށެވެ. 

އަދި އދ ގެ މަޖިލީހުގެ އެންމެ ބޮޑެތި ގައުމުތަކާއި އެ ގައުމު ތަކުގެ ވެރިންނާއިއެކުގައި މަޝްވަރާތައް ކުރައްވައި، މުޢާމަލާތް ކުރެއްވުމުން ދިވެހިންނަކީ  އަމިއްލ ފައިމައްޗަށް ތެދުވެތިބި މުސްތަގިއްލު ގައުމެއްކަން އެނގިގެންދާ ކަމަށް ޣައްސާން ވިދާޅުވިއެވެ. ހަމަ އެހެންމެ ރާއްޖެ އުފުއްލަންޖެހޭ ޒިންމާތައް އަމިއްލައަށް އުފުލާނެ ގައުމެއްކަންވެސް އެކަމުން އެނގިގެންދާކަމަށް ވިދާޅުވިއެވެ. 

މީގެ މިސާލެއްގެ ގޮތުން ޣައްސާން ފާހަގަ ކުރެއްވީ ރާއްޖޭގެ ދިވެހި އަސްކަރިއްޔާގެ ވައިގެ ޚިދުމަތައް އިތުރުކުރެވުނު ޑްރޯންތަކާއިއެކު ރާއްޖޭގެ ކަނޑުގެ ސަރަހައްދު ބެލެހެއްޓުން ފުޅާކުރެވިގެން ދިޔަ ދިޔުމެވެ. 

"އެގޮތުން މިއަހަރު ތެރޭގައި ވައިގެ މަގުން އަޅުގަނޑުމެންގެ ސަރަހައްދު ބަލައި ހަމާލާ ދޭން ޖެހިއްޖެނަމަ އެކަމުގެ ޤަބިލީއްޔަތުކަން ހުރި، ދިވެހިރާއްޖެ ޤަބޫލުކުރާ ޔޫސީއޭވީސް ރާއްޖޭގެ ސިފައިންގެ ޚިދުމަތުގެ ތެރެއަށް އިންޑަކްޓް ކޮށްދެއްވީ. އަޅުގަނޑުމެންނަށް މިހާރު އަޅުގަނޑުމެންގެ ސަރަހައްދު ވަރަށް ފުޅާކޮށް ބެލެހެއްޓެން ފެށިއްޖެ." ޣައްސާން މައުމޫން ވިދާޅުވިއެވެ.

ޣައްސާން އިތުރަށް ވިދާޅުވީ، ރާއްޖޭގެ ކަނޑުގެ ސަރަހައްދު ބެލެހެއްޓުމަށް ރައީސް ގެންގުޅުއްވާ ސިޔާސަތު ތަންފީޒު ކުރެއްވުމަށް މޯލްޑިވްސް ސްޕޭސް ރިސާޗް އޯގަނައިޒޭޝަން އުފައްދައިގެން މަސައްކަތްކުރަމުންދާ ޒުވާނުންތަކަކާއެކު ދިފާޢީ ވުޒާރާއާއެކު މަސައްކަތް ކުރައްވަމުންދާކަމަށާ މި ޒުވާނުންނަކީ އެމެރިކާގެ ޖައްވީ އިދާރާގެ ފަރާތްތަކާއިވެސް މުޢާމަލާތް ކުރާ ޒުވާނުންތަކެއް ކަމަށެވެ.

"މިމަސައްކަތުގެ ތެރެއިން އަޅުގަނޑުމެން މިބަލަނީ، އަޅުގަނޑުމެންގެ މެރިޓައިމް ޑޮމެއިން ނުވަތަ ކަނޑުގެ ސަރަހައްދު ބެލުމުގެ މަސައްކަތް ވަރަށް ކައިރި މުސްތަޤުބަލެއްގައި، އިރާދަކުރެއްވިއްޔާ ސެޓެލައިޓް މެދުވެރިކޮށްވެސް ބެލޭނެ ނިޒާމެއް ޤާއިމްކުރަން. މިކަންކަން ކޮށްގެން ރައީސުލްޖުމްހޫރިއްޔާ ބޭނުންފުޅުވަނީ ދިވެހިރާއްޖޭގެ ބައިނަލްއަޤްވާމީ ޒިންމާ އުފުލައި އަޅުގަނޑުމެންގެ ސަރަހައްދުންވެސް ސުލްހަވެރިކަމާއެކު ދަތުރުކުރެވޭނެ ގޮތް ހެދުން." ޣައްސާން ވިދާޅުވިއެވެ.