މި އަހަަރުގެ މިހާތަނަށް ސަރުކާރުން ފަސް ލޯނު ނަގައި ދެ ލޯނަކަށް ދައުލަތުގެ ގަރަންޓީ ދީފައިވާކަން ފިނޭންސް މިނިސްޓްރީގެ ހިސާބުތަކުން ދައްކައިފި އެވެ.

ފިނޭންސް މިނިސްޓްރީން އާންމުކޮށްފައިވާ ލޯނުތަކުގެ މައުލޫމާތުން އެނގޭ ގޮތުން ސައުދީ ފަންޑު ފޯ ޑިވޮލަޕްމަންޓް އިން އިން މި އަހަރުގެ މެއި މަހުގެ 16 ވަނަ ދުވަހު ދެ ލޯނެއް ނަގާފައި ވެއެވެ.

އެއީ ސިއްހީ ދާއިރާ ތަރައްގީކުރުމަށް ނަގާފައިވާ 49.9 މިލިއަން ޑޮލރު ( 769 މިލިއަން ރުފިޔާ)ގެ ލޯނަކާއި ވެލާނާ އިންޓަނޭޝަނަލް އެއާޕޯޓު ތަރައްގީކުރުމުގެ މަޝްރޫއަށް ސައުދީން ނަގާފައިވާ 99.9 މިލިއަން ޑޮލަރު ނުވަތަ 1.5 ބިލިއަން ރުފިޔާގެ ލޯނެވެ. 

މީގެ އިތުރުން އިސްލާމިކް ޑިވޮލަޕްމަންޓް ބޭންކުން، ޖޫން މަހުގެ 5 ވަނަ ދުވަހު ދެ ލޯނެއް ނަގާފައިވެއެވެ.

އެއީ ކުދި އަދި މެދުފަންތީގެ ވިޔަފާރިތަކަށް ކުރާ އެކި ކަހަލަ އަސަރުތައް ކުޑަކުރުމަށް ގާއިމުކުރާ ފަންޑު އުފެއްދުމަށް ނަގާފައިވާ 10.2 މިލިއަން ޑޮލަރު (157.2 މިލިއަން ރުފިޔާ)ގެ ލޯނަކާއި، ހަމަ އެ ފަންޑަށް ދީފައިވާ އިތުރު 30 މިލިއަން ޑޮލަރު (462 މިލިއަން ރުފިޔާ)ގެ ލޯނެކެވެ.

މިއާއެކު ޖުލައި މަހުގެ 29 ވަނަ ދުވަހު ސިއްހީ ދާއިރާ ތަރައްގީކުރުމަށް ކުވައިތު ފަންޑުން 9.8 މިލިއަން ޑޮލަރު ނުވަތަ 147 މިލިއަން ރުފިޔާގެ ލޯނެއް ނަގާފައިވެ އެވެ. 

މި ލޯނުގެ އިތުރަށް މާރިޗު މަހުގެ 28 ވަނަ ދުވަހު، ދެ ލޯނަކަށް ދައުލަތުގެ ގެރެންޓީ ސަރުކާރުން ދޫކުރި އެވެ. އެ ދެ ގެރެންޓީވެސް ދީފައިވަނީ ބޭންކް އޮފް ސިލޯނުން ލޯނުތަކެއް ނެގުމަށް ފަންޑް މެނޭޖުމެންޓު ކޯޕަރޭޝަނަށެވެ.

އެގޮތުން، އެ ކުންފުނިން ނަގާފައިވަނީ ދިވެހި ރުފިޔާއިން ނެގި 115.6 މިލިއަން ރުފިޔާގެ ލޯނަކާއި ޑޮލަރުން ނެގި 7.5 މިލިއަން ޑޮލަރު ނުވަތަ 115 މިލިއަން ރުފިޔާގެ ލޯނެވެ. މިއާއެކު އެކު ޖުމްލަ 230 މިލިއަން ރުފިޔާ ލޯނު ނެގުމަށް އެ ކުންފުންޏަށް ސޮވެރިން ގެރެންޓީ ދޫކޮށްފައިވެ އެވެ. 

އެހެންކަމުން، އަހަރުގެ މިހާތަނަށް ސަރުކާރުން ނަަގާފައިވާ ލޯނާއި ސަރުކާރުން ދައުލަތުގެ ގަރަންޓީ ދީގެން ނަގާފައިވާ ލޯނާއެކު ޖުމްލަ 3.2 ބިލިއަން ރުފިޔާގެ ލޯނު ނަގާފައިވެ އެވެ. 

އަދި މިދިޔަ އަހަރު ޑިސެމްބަރު މަހު އޭޝިއަން ޑިވޮލަޕްމަންޓް ބޭންކުން ރިނިޔުވަބަލް އެނާޖީ ޕްރޮޖެކްޓަށް ނަގާފައިވާ 18.5 މިލިއަން ޑޮލަރުގެ (285 މިލިއަން ރުފިޔާ) ލޯނާއެކު މި ސަރުކާރުން މިހާތަނަށް ނަގާފައިވާ ލޯނުގެ ޖުމްލަ 3.5 ބިލިއަނަށް އަރައެވެ.