މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލުން) ވެލާނާ އިންޓަރނޭޝަނަލް އެއާޕޯޓްގައި މަސައްކަތްކުރާ ފަޔާ ފައިޓަރުންނަށް އަމާޒުކޮށް ކުރިއަށްގެންދިޔަ ބޭސިކް ފަޔަރ ފައިޓަރ ކޯހުގެ 29 ވަނަ ބެޗް ނިމިއްޖެެއެވެ.

އެމްއޭސީއެލުން ބުނީ 12 ބައިވެރިންނާއެކު މި ކޯސް ކުރިއަށްގެންގޮސްފައިވަނީ 43 ދުވަހުގެ މުއްދަތަކަށް ކަމަށެވެ. މޯލްޑިވްސް ސިވިލްއޭވިއޭޝަން އޮތޯރިޓީން ފާސްކޮށްފައިވާ މިކޯހަކީ ވެލާނާ އިންޓަރނޭޝަނަލް އެއާޕޯޓް އަދި އެއާޕޯޓް ވަށައިގެންވާ ސަރަހައްދުތަކުގެ އިތުރުން  މަތިންދާބޯޓުތަކުގައި  އަލިފާނުގެ ހާދިސާއެއް ހިނގުމުން ކުއްލި ހާލަތްތަކަށް ރައްދުދިނުމަށް ފަޔަރ ފައިޓަރުން ތަމްރީނުކުރާ ކޯހެކެވެ. މި ކޯހަކީ އޭވިއޭޝަން ސެކިއުރެޓީއަށް މުހިއްމު ކޯހަކަށްވާއިރު، ފަޔަރ ފައިޓަރުންނަށް ކުއްލި ހާލަތްތަކާއި ކުރިމަތިލާން މި ކޯހުން ހުނަރު ލިބިގެންދާނޭކަމަށް އެމްއޭސީއެލުން ބުނެއެވެ.

މިއީ އެމްއޭސީއެލްގެ އިން ހައުސް ޓްރެއިނަރުން ބޭނުންކޮށްގެން ހިންގި މިފަދަ ފުރަތަމަ ކޯހެވެ. އެމްއޭސީއެލުން ބުނީ މިކަމުން އަންގައިދެނީ އެކުންފުނީގެ އިންހައުސް ޓްރެއިނަރުންގެ ގާބިލްކަމެވެ. އަދި ރާއްޖޭގެ ޓެކްނިކަލް ދާއިރާތަކުގައި މީހުން ބިނާކުރުމަށް އެމްއޭސީއެލުން ދޭ އަހަމިއްޔަތުކަމެވެ.

Advertisement

މި ކޯސް ނިންމުމުގެ ރަސްމިއްޔާތުގައި އެމްއޭސީއެލްގެ ޑެޕިއުޓީ މެނޭޖިންގ ޑިރެކްޓަރު މުހައްމަދު ލަމްޢާން ވިދާޅުވީ މިކޯސް ފުރިހަމަކަމާއެކު ނިމިގެން ދިއުމުން ދޭހަވަނީ އެމްއޭސީއެލްގެ އިންހައުސް ޓްރެއިނިން ނިޒާމްގެ ހަރުދަނާ ކަމެވެ. މިގޮތުން ކުރިއަށްއޮތްތަނުގައިވެސް މިކަން ދެމެހެއްޓެނިވި ގޮތެއްގައި ކުރިއަށްދާނޭކަމަށް އޭނާ ފާހަގަކުރެއްވިއެވެ.

އެމްއޭސީއެލުން ދަނީ އެކުންފުނީގެ ލާނިން އެންޑް ޑިވެލޮޕްމަންޓް ޔުނިޓުން ރާއްޖޭގެ އޭވިއޭޝަން ދާއިރާގެ އިތުރުން މަސައްކަތްތެރިކަމުގެ ދާއިރާއިން ގިނަ ތަމްރީނުތަކެއް ފޯރުކޮށްދެމުންނެވެ. 

އެމްއޭސީއެލުންވަނީ މިއަހަރުގެ ޖޫންމަހުގެ ތެރޭގައި ޒަމާނީ ފަޔަރ ސްޓޭޝަނެއް ހުޅުވައި އެ ދާއިރާއިން އެކުންފުނީގެ ގާބިލްކަން އިތުރުކޮށްފައެވެ. އެމްއޭސީއެލުން ބުނީ ވެލާނާ އިންޓަރނޭޝަނަލް އެއާޕޯޓްގެ  ސަލާމަތާއި ރައްކާތެރިކަން ކަށަވަރުކޮށް، ދަތުރުވެރިންނަށް ޒަމާނީ ހިދުމަތްތަކެއް ފޯރުކޮށްދިނުމަކީ އެކުންފުނީގެ އެންމެބޮޑު އަމާޒުކަމަށެވެ.