ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ އާ ޓާމިނަލް މިއަހަރުގެ ޑިސެމްބަރު މަހުގެ ތެރޭގައި ބޭނުންކުރަން ފެށޭނެ ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެ އެވެ.

ދުނިޔޭގެ ފަތުރުވެރިކަމުގެ ދުވަހުގެ މުނާސަބަތުގައި ވަޒީރު ދެއްވި މެސެޖުގައި ވިދާޅުވީ، ރާއްޖޭގެ ފަތުރުވެރިކަން މިހާރު އޮތް ހާލަތުން ކުރިއަށް ގެންދިއުމަށްޓަކައި އެންމެ މުހިއްމީ ވެލާނާ އިންޓަނޭޝަނަލް އެއާޕޯޓްގެ އައު ޓަރމިނަލް ބޭނުންކުރަން ފެށޭ ވަރުކުރުން ކަމަށެވެ.

"އުއްމީދުކުރަނީ ޑިސެމްބަރުމަހުތެރޭގައި އައު ޓަރމިނަލް ހުޅުވާލެވޭނެ ކަމަށް، އަދި މުޅި އެއަރޕޯޓު ފުލީ ފަންކްޝަން ކުރަން ފެށެން އަންނަ އަހަރުގެ ފުރަތަމަ ކުއާޓަރ ނޫނީ ދެވަނަ ކުއާޓަރުގައި ފެށިގެންދާނެ ކަމަށް،" ފައިސަލް ވިދާޅުވި އެވެ.

Advertisement

ފައިސަލް އިތުރަށް ވިދާޅުވީ ޓާމިނަލް ހުޅުވުމާ އެކު އާ އެއާލައިންތައް ރާއްޖެ ގެނައުމަށްޓަކައި ސަރުކާރުން އިސް ނަގައިގެން މާކެޓިން ހަރަކާތްތަކެއް ފެށުމަށް ނިންމާފައިވާ ކަމަށެވެ.

"ފަތުރުވެރިކަމުން މިހާރު ލިބޭ 4.5 ބިލިއަން ޑޮލަރުގެ އާމްދަނީ 2027 ވަނަ އަހަރު އަންނަންވާއިރަށް ހަ ބިލިއަން ޑޮލަރަށް އިތުރުކުރުން އެއީ ސަރުކާރުގެ އަމާޒެއް،" ފައިސަލް ވިދާޅުވި އެވެ.

ވީ.އައި.އޭގައި މިހާރު ބޭނުންކުރާ އިންޓަރނޭޝަނަލް ޓަރމިނަލަކީ އަހަރަކު 1.5 މިލިއަން ފަސިންޖަރުންނަށް ޚިދުމަތް ދެވޭވަރުގެ ޓާރމިނަލެކެވެ. އެހެންނަމަވެސް އެންމެފަހުގެ ޒަމާނީ ވަސީލަތްތަކާއެކު އަލަށް ތަރައްޤީކުރާ 78 ހާސް އަކަ މީޓަރުގެ ޓަރމިނަލަކީ އަހަރަކު 7 މިލިއަން ފަސިންޖަރުންނަށް ޚިދުމަތްދެވޭ ފެންވަރަށް ތަރައްޤީކުރާ ޓަރމިނަލެކެވެ.