ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އދ. ގެ އާންމު މަޖިލީހުގެ 79 ވަނަ ސެޝަންގައި ދިވެހިރާއްޖެ ތަމްސީލްކުރައްވައި، ދިވެހިރާއްޖެއަކީ ދުނިޔޭގެ ކުރިމަތީގައި ބަސްބުނަން ކެރޭ ޤައުމެއްކަން ސާބިތުކޮށްދެއްވާފައިވާ ކަމަށް ޖުމްހޫރީ ޕާޓީގެ ލީޑަރ އަދި މާމިގިލީ ދާއިރާގެ މެންބަރު ޤާސިމް އިބްރާޙީމް ވިދާޅުވެއްޖެއެވެ.
އދގެ އާންމު މަޖިލީހުގެ 79 ވަނަ ސެޝަންގައި ދިވެހިރާއްޖެ ތަމްސީލް ކުރެއްވުމަށްފަހު، ރައީސް މުޢިއްޒު މިއަދުގެ ވަގުތެއްގައި އެނބުރި ރާއްޖެ ވަޑައިގެންފައިވާއިރު، ގާސިމް އެކްސްގައި ކުރެއްވި ޕޯސްޓެއްގައިވަނީ ޖުމްހޫރީ ޕާޓީގެ އެންމެހާ މެންބަރުންގެ ނަމުގައި އެމަނިކުފާނަށް މަރުޙަބާއާއި ތަހްނިޔާ ދަންނަވާފައެވެ.
ރައީސް މުޢިއްޒުގެ ތަޤްރީރު ދުނިޔޭގެ ސަމާލުކަން ލިބިި، ބޮޑެތި މީޑިއާތަަކުގެ ފަލަ ސުރުޚީގައި ހިމެނިފައިވާކަމަށާ އދ. ގެ ސަލާމަތީ މަޖިލީހުގެ ތަޅުމުގައި ތަޤްރީރުކުރެއްވި ރާއްޖޭގެ ފުރަތަމަ ރައީސްކަމުގެ ޝަރަފުވެސް ރައީސް މުޢިއްޒަށް ލިބިވަޑައިގެންފައިވާކަން ޤާސިމް ވަނީ ފާހަގަކުރައްވާފައެވެ.
ޝައްކެއްނެތް ގޮތުގައި، މީގެ 59 އަހަރު ކުރީން ދިވެހީންގެ ފަޚުރުވެރި މިނިވަން ދިދަ އދ ގެ އިދާރާގައި ވިހުރެންފެށިފަހުން، މި ޤައުމުގެ ވެރިޔަކު އދ ގައި ދިވެހި ޤައުމު ތަމްސީލް ކުރުމުގައި އަދުގެ ރައީސުލް ޖުމްހޫރިއްޔާ ޑރ މުޙައްމަދު މުޢިއްޒު ދިވެހިޤައުމު ތަމްސީލް ކޮށްދެއްވީ، ނުހަނު ވިސްނުންތެރިކަމާއި އެކު ވަރަށް ފުރިހަމަ އަދި އެހާމެ މުނާސަބުކޮށް ކަމަށް އަޅުގަނޑު ދެކެމެވެ. މި ލޮބުވެތި ޤައުމަކީ ފަޚުރުވެރި، ކެރޭ، ހަރުދަނާ، ދުރުވިސްނޭ، ޢިލްމާއި ހުނަރު ލިބިފައިވާ، ތަރައްޤީއަށް އުންމީދު ކުރާ ތަޞައްވަރެއް އޮތް، އަދި މުޅި ދުނިޔޭގެ ކުރިމަތީގައި ބަސްބުނަން ކެރޭ ޤައުމެއްކަން، ރައީސް ޑރ މުޢިއްޒު އެވަނީ ވަރަށް ސާބިތު ކަމާއި އެކު ދައްކުވައިދެއްވާފައެވެ.
ޤާސިމް އިބްރާޙީމް
ރައީސް މުޢިއްޒުގެ ތަޤްރީރު މައިގަނޑު ގޮތެއްގައި އަމާޒުކުރެއްވީ މޫސުމަށް އަންނަ ނޭދެވޭ ބަދަލުތަކާއި، އިއާދަކުރަނިވި ހަކަތަ އިތުރުކުރުމަށާއި، އިޖުތިމާޢީ އަދި އިޤްތިޞާދީ ގޮންޖެހުންތަކާއި، މަސްނޫޢީ އިންޓެލިޖެންސް ފަދަ މުހިންމު މައުޟޫޢުތަކަށެވެ.
ވަކިން ޚާއްޞަކޮށް، ފަލަސްޠީނުގެ މައްސަލައިގައި ސިހްޔޫނީ ދައުލަތުން ހިންގަމުންދާ ޖަރީމާތައް ކުށްވެރިކުރައްވައި ދެއްކެވި ވާހަކަފުޅު އިސްލާމީ ދުނިޔެއާއި ގިނަ ޤައުމުތަކުން ބަލައިގަތްކަން ޤާސިމް ފާހަގަކުރެއްވިއެވެ.
ރާއްޖޭގެ ސިޔާސީ އިދިކޮޅު ބައެއް ފަރާތްތަކަށް، ޚާއްސަ ކޮށް ވެރިކަމުގެ 5 އަހަރުގެ ދައުރެއް ލިބިވަޑައިގެންނަމަވެސް އދ ގައި ރާއްޖެ ތަމްސީލް ކޮށްލަން ކެރިވަޑައިނުގަތް ބޭފުޅަކަށް، ރައީސް މުޢިއްޒުގެ ތަޤްރީރު އޮޅުން ފިލާވަޑައި ނުގަތްނަމަވެސް، ދުނިޔޭގެ ބޮޑެތި މީޑިއާތަކުގެ ފަލަ ސުރުޙީގައި އެމަނިކުފާނުގެ ތަޤްރީރް އެވަނީ ހިމެނިފައެވެ.
ޤާސިމް އިބްރާޙީމް
ޤާސިމް އިތުރަށް ވިދާޅުވީ، ރައީސް މުޢިއްޒު ވަނީ ދިވެހިރާއްޖެއަކީ ފަޚުރުވެރި، ކެރޭ، ހަރުދަނާ، ދުރުވިސްނޭ، ޢިލްމާއި ހުނަރު ލިބިފައިވާ، ތަރައްޤީއަށް އުންމީދުކުރާ ތަޞައްވުރެއް އޮތް ޤައުމެއްކަން ސާބިތުކޮށްދެއްވާފައި ކަމަށެވެ.
2040 ގައި ދިވެހިރާއްޖޭގެ މިނިވަންކަމަށް 75 އަހަރު ފުރޭއިރު، އެ ދުވަސް އަންނަންވާއިރު ދިވެހިރާއްޖެއަކީ، ފުރިހަމައަށް ތަރައްޤީވެފައިވާ ޤައުމެއްގެ ގޮތުގައި އޮތުމަށް މާދަމާއަށް ޓަކައި އެމަނިކުފާނު ކުރައްވާ ތަޞައްވަރުތައް މުޅި ދުނިޔޭގެ ކުރިމަތީގައި ހާމަކޮށްދެއްވާ، މި ދިވެހިފަސްގަނޑާއި، ރައްޔިތުންނާއި މެދު ތިޔަ ދައްކުވައިދިން ފަޚުރުވެރި ނަމޫނާއަށް ޓަކައި، މަނިކުފާނަށް އަދިވެސް އެއްފަހަރު ހިތުގެ އިޚްލާޞްތެރި ތަހްނިޔާއާއި ޝުކުރު އަދާކުރަމެވެ. الله ސުބުޙާނަހޫ ވަތަޢާލާ މަނިކުފާނަށް ދިގު ޢުމުރުފުޅެއް މިންވަރުކުރައްވާ، ފުރިހަމަ ޞިއްހަތެއްގައި ލަހައްޓަވައި، މަނިކުފާނުގެ ވެރިކަމުގައި ބަރަކާތްލައްވާ، ދިވެހި ރައްޔިތުންނަށް އަދަށްވުރެ ފަހި މާދަމާއެއް މިންވަރު ކުރައްވާށިއެވެ.
ޤާސިމް އިބްރާޙީމް
މި ދަތުރުފުޅުގައި ރައީސް މުޢިއްޒު ވަނީ އދ. ގެ 78 ވަނަ ޢާންމު ބައްދަލުވުމުގެ ހަވާސާގައި ކުރިއަށްދިޔަ މުހިންމު އެތައް ބައްދަލުވުމެއްގެ ރިޔާސަތުގައި ކޯ-ޗެއަރއެއްގެ ހައިސިއްޔަތުން އިސް ދައުރެއް އަދާކުރައްވާފައެވެ.
Advertisement
This content is created and paid for by advertisers and does not involve Voice Journalists
