ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އދ. ގެ އާންމު މަޖިލީހުގެ 79 ވަނަ ސެޝަންގައި ދިވެހިރާއްޖެ ތަމްސީލްކުރައްވައި، ދިވެހިރާއްޖެއަކީ ދުނިޔޭގެ ކުރިމަތީގައި ބަސްބުނަން ކެރޭ ޤައުމެއްކަން ސާބިތުކޮށްދެއްވާފައިވާ ކަމަށް ޖުމްހޫރީ ޕާޓީގެ ލީޑަރ އަދި މާމިގިލީ ދާއިރާގެ މެންބަރު ޤާސިމް އިބްރާޙީމް ވިދާޅުވެއްޖެއެވެ. 

އދގެ އާންމު މަޖިލީހުގެ 79 ވަނަ ސެޝަންގައި ދިވެހިރާއްޖެ ތަމްސީލް ކުރެއްވުމަށްފަހު، ރައީސް މުޢިއްޒު މިއަދުގެ ވަގުތެއްގައި އެނބުރި ރާއްޖެ ވަޑައިގެންފައިވާއިރު، ގާސިމް އެކްސްގައި ކުރެއްވި ޕޯސްޓެއްގައިވަނީ ޖުމްހޫރީ ޕާޓީގެ ‬⁩އެންމެހާ މެންބަރުންގެ ނަމުގައި އެމަނިކުފާނަށް މަރުޙަބާއާއި ތަހްނިޔާ ދަންނަވާފައެވެ.

ރައީސް މުޢިއްޒުގެ ތަޤްރީރު ދުނިޔޭގެ ސަމާލުކަން ލިބިި، ބޮޑެތި މީޑިއާތަަކުގެ ފަލަ ސުރުޚީގައި ހިމެނިފައިވާކަމަށާ އދ. ގެ ސަލާމަތީ މަޖިލީހުގެ ތަޅުމުގައި ތަޤްރީރުކުރެއްވި ރާއްޖޭގެ ފުރަތަމަ ރައީސްކަމުގެ ޝަރަފުވެސް ރައީސް މުޢިއްޒަށް ލިބިވަޑައިގެންފައިވާކަން ޤާސިމް ވަނީ ފާހަގަކުރައްވާފައެވެ.

Advertisement

ރައީސް މުޢިއްޒުގެ ތަޤްރީރު މައިގަނޑު ގޮތެއްގައި އަމާޒުކުރެއްވީ މޫސުމަށް އަންނަ ނޭދެވޭ ބަދަލުތަކާއި، އިއާދަކުރަނިވި ހަކަތަ އިތުރުކުރުމަށާއި، އިޖުތިމާޢީ އަދި އިޤްތިޞާދީ ގޮންޖެހުންތަކާއި، މަސްނޫޢީ އިންޓެލިޖެންސް ފަދަ މުހިންމު މައުޟޫޢުތަކަށެވެ.

ވަކިން ޚާއްޞަކޮށް، ފަލަސްޠީނުގެ މައްސަލައިގައި ސިހްޔޫނީ ދައުލަތުން ހިންގަމުންދާ ޖަރީމާތައް ކުށްވެރިކުރައްވައި ދެއްކެވި ވާހަކަފުޅު އިސްލާމީ ދުނިޔެއާއި ގިނަ ޤައުމުތަކުން ބަލައިގަތްކަން ޤާސިމް ފާހަގަކުރެއްވިއެވެ.

ޤާސިމް އިތުރަށް ވިދާޅުވީ، ރައީސް މުޢިއްޒު ވަނީ ދިވެހިރާއްޖެއަކީ ފަޚުރުވެރި، ކެރޭ، ހަރުދަނާ، ދުރުވިސްނޭ، ޢިލްމާއި ހުނަރު ލިބިފައިވާ، ތަރައްޤީއަށް އުންމީދުކުރާ ތަޞައްވުރެއް އޮތް ޤައުމެއްކަން ސާބިތުކޮށްދެއްވާފައި ކަމަށެވެ.

މި ދަތުރުފުޅުގައި ރައީސް މުޢިއްޒު ވަނީ އދ. ގެ 78 ވަނަ ޢާންމު ބައްދަލުވުމުގެ ހަވާސާގައި ކުރިއަށްދިޔަ މުހިންމު އެތައް ބައްދަލުވުމެއްގެ ރިޔާސަތުގައި ކޯ-ޗެއަރއެއްގެ ހައިސިއްޔަތުން އިސް ދައުރެއް އަދާކުރައްވާފައެވެ.