އުސްފަސްގަނޑު ދިމާ އިން ކަނޑުމަތީގައި މަރުވެފައި އޮއްވާ އިއްޔެ ފެނުނު، ހ. ވެލަސްފަރުގެ، އިބްރާހީމް ޖައުހަރީ (62 އަހަރު) ނިޔާވެފައިވަނީ މަސްބާނަށް މޫދަށް ފޭބި ފަހުން ކަމަށް ފުލުހުން ބުނެފިއެވެ.

އުސްފަސްގަނޑު ދިމާ އިން ކަނޑުމަތީގައި މީހަކު މަރުވެފައި އޮތް ކަމަށް ފުލުހުންނަށް ރިޕޯޓް ކުރީ އިއްޔެ ހަވީރު 5:06 ގައި ކަމަށް އެ އިދާރާއިން އިއްޔެ ބުނެފައިވެއެވެ.

އެ މީހާ އައި.ޖީ.އެމް.އެޗަށް ގެންދިޔައިރުވެސް ނިޔާވެފައިވާ ކަމަށް ހޮސްޕިޓަލުން ފުލުހުންނަށް މަޢުލޫމާތު ދީފައިވެއެވެ.

Advertisement

މި މައްސަލަ ފުލުހުން ތަޙުޤީޤު ކުރަމުންދާއިރު، މިއަދު ފުލުހުން ބުނީ، ޖައުހަރީ، ސެޕްޓެމްބަރ 30 ވަނަ ދުވަހުގެ 3:04 އެހައިކަންހާއިރު ބްރިޖް ކައިރިން މޫދަށް މަސްބާނަން ފޭބިކަން މިހާތަނަށް ބެލިބެލުމުން އެނގިފައިވާ ކަމަށެވެ. 

ޖައުހަރީ (ޖޯރޭ) އަކީ ރައީސް މައުމޫނުގެ ވެރިކަން ބަދަލުވިއިރު، އެމްޑީޕީގެ ހަރަކާތްތަކުގައި އާއްމުކޮށް ފެންނަ ވަރަށްގިނަ މީހުން ދަންނަ މީހެކެވެ. އޭރު ފޮޓޯ ގްރާފަރެއްގެ ގޮތުގައިވެސް އޭނާ ފެނިގެންދިޔައެވެ. އެމްޑީޕީގެ ބައެއް ހަރަކާތްތަކުގައި އުޅެނިކޮށް ޖޯރޭ ފުލުހުންގެ ބެލުމުގެ ދަށަށްވެސް ގެންދިޔައެވެ. ފަހުން މީޑިއާގެ ހަރަކާތްތަކާ ފެއަށް ޖެހިލުމަށްފަހު، އޭނާ ކުރަމުން އައި މަސައްކަތަކީ އިލެކްޓްރޯނިކް މަސައްކަތެވެ. މިގޮތުން ދޮންނަ މެޝިނާއި، ފެންމޯޓަރު މަރާމާތުކުރުމުގެ މަސައްކަތަކީ އޭނާ ފަހުން ކުރަމުންއައި މަސައްކަތެވެ