މިދިޔަ ސަރުކާރުތަކުން އިތުރަށް ޗާޕުކުރި ފައިސާތައް މާކެޓުން ނެގުމަށް މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީން ނިންމައިފިއެވެ.
އެމްއެމްއޭގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ގަވަރުނަރު އަހުމަދު މުނައްވަރު ވިދާޅުވީ، ބޭންކިން ނިޒާމުގައި އިތުރުވެފައިވާ ދިވެހިރުފިޔާ މަދުކުރުމަށް އޯޕަން މާކެޓް އޮޕަރޭޝަނެއް ފެއްޓެވުމަށް ނިންމާފައިވާކަމަށެވެ. މި އޮޕަރޭޝަން ފަށާނީ މިއަހަރުގެ ނޮވެމްބަރުމަހުގެ ތެރޭގައި ކަމަށް ގަވަރުނަރު ވިދާޅުވިއެވެ.
ގަވަރުނަރު ވިދާޅުވީ ޗާޕްކުރުމުގެ ސަބަބުން އިގްތިސާދުގައި ދައުރުވަމުންދާ "އެކްސެސް މަނީ" ނުވަތަ އިގްތިސާދުގެ ތެރޭގައި ދައުރުވާންޖެހޭ ފައިސާގެ އިތުރަށް ހުރިކަމަށް ފާހަގަކުރެވޭ ފައިސާތައް ނެގުމަށް އެމްއެމްއޭގެ ބޯޑުންވެސް ރުހުންދީފައިވާކަމަަށެވެ.
މިކަމުގައި ސަރުކާރަށް ދަތިތަކެއް ހުންނާނޭކަން ފާހަގަކުރައްވަމުން ގަވަރުނަރު ވިދާޅުވީ، މާކެޓް އޮޕަރޭޝަނުގެ ސަބަބުން ކޭޝްފްލޯ ހަމަޖެއްސުމަށް ދަތިތަކެއް ކުރިމަތިވެދާނޭ ކަމަށެވެ.
މާކެޓް އޮޕަރޭޝަން އެކިފަހަރުމަތިން ކުރިއަށްގެންދިއުމަށް ނިންމާފައިވާއިރު، ހަ ބިލިއަން ނުވަތަ ފަސް ބިލިއަން ރުފިޔާ ނަގާނޭކަމަށް ގަވަރުނަރު ވަނީ ފާހަގަކުރައްވާފައެވެ.
މިދިޔަ ސަރުކާރުގެ ވެރިކަމުގައި ސަރުކާރުގެ ހަރަދުތައް ހަމަޖެއްސުމަށް 8 ބިލިއަނަށްވުރެ ގިނަ ރުފިޔާ ޗާޕްކޮށްފައިވާކަމަށް ސަރުކާރުން ބުނެއެވެ.
Advertisement
This content is created and paid for by advertisers and does not involve Voice Journalists
