ކުޑަކުއްޖަކު ރަހީނުކޮށް، ބްލެކްމެއިލް ކުރި މައްސަލައެއް ފެންމަތިވެ، އެ މައްސަލާގައި ކަން ހިނގި ގޮތް ފުލުހުން ބަލަން ފަށައިފި އެވެ.

އަނިޔާ ލިބުނު ކަމަށް ބުނާ ކުއްޖާގެ މަންމަ މީސް މީޑިއާގައި ކުރި ޕޯސްޓުގައިވާ ގޮތުން، އޭނާގެ ދަރިފުޅު ގޭގައި ނިދާފައި އޮއްވައި ގްރޫޕަކުން އެ ގެއަށް ވަދެ، ގަދަކަމުން ރަހީނުކުރި އެވެ. 

އަދި ރަހީނު ކުރުމަށްފަހު މަރާލާނެ ކަމަށް އިންޒާރުދީ، ރުއްގަނޑެއްގެ ތެރެއަށް ގެންގޮސް ބަރަހަނާކޮށް ދަނޑިބުރިއަކުން އޭނާ ގައިގައި ތަޅާ ހެދިކަމަށް ބުނެފައިވެއެވެ.

Advertisement

އަދި އެކަމުގެ ވީޑީއޯ ކުރުމަށް ފަހު، ރުފިޔާ ނުދީފި ނަމަ ވީޑިއޯ ލީކްކޮށްލާނެ ކަމަށް ބުނެ، ބްލެކްމެއިލް ކުރި ކަމަށްވެސް ކުއްޖާގެ މަންމަ ބުންޏެވެ.

އޭގެ ފަހުން، ގިނަ ކުދިން ތިބޭ ގްރޫޕަކަށް ވީޑިއޯ ލުމަށް ފަހު، އަންހެން މީހާގެ މަރުގެ އިންޒާރު ދިން ކަމަށް ބުނެފައިވެއެވެ.

”މިއަށް ވުރެ ވަކި ސީރިއަސް ކްރައިމެއް ކޮބައިހެއްޔޭ؟ މިއީ، ގްރޭޑް 9ގައި އުޅޭ ކުއްޖަކު އިސްވެ ހުރެ ގްރޫޕަކުން ހިންގި އަމަލެއް. ދެން ވެސް އޮންނަނީ އަނިޔާ ކުރި ގްރޭޑް 9ގެ ކުއްޖާގެ ހައްގު. ދަރިފުޅަށް އިންސާފު ހޯދާނީ ކިހިނެއް“ އެ ޕޯސްޓުގައި ކުއްޖާގެ މަންމަ ލިޔެފައިވެ އެވެ. 

މިކަން ދިމާވެފައިވަނީ ކޮން އުމުރެއްގެ އަދި ކޮން ޖިންސެއްގެ ކޮން  ކުއްޖަކަށް ކަމެއް އަދި ސާފެއް ނުވެ އެވެ.

މި މައްސަލާގައި ފުލުހުން މިއަދު ބުނީ، މި މައްސަލަ ސަމާލުކަމަށް އައިސް، ކަމާ ގުޅުން ހުރި އިދާރާތަކާ ގުޅިގެން މައުލޫމާތު ހޯދުމުގެ މަސައްކަތް ކުރަމުން އަންނަ ކަމަށެެވެ.