ދިވެހިރާއްޖޭގެ އުމުރުން ދުވަސްވީ މީހުންގެ އާބާދީގެ %36 އަކީ ކޮންމެވެސް ނުކުޅެދުންތެރިކަމެއް ހުންނަ ބައެއް ކަމަށް ތަފާސް ހިސާބުތަކުން ދައްކައިފިއެވެ.

މި އަހަރުގެ އިސްރަށްވެހިންގެ ދުވަހާ ގުޅިގެން މޯލްޑިވްސް ބިއުރޯ އޮފް ސްޓެޓިސްޓިކްސްއިން ޢާންމުކުރި 2022 ވަނަ އަހަރުގެ ތަފާސް ހިސާބުތަކުން ދައްކާ ގޮތުގައި، ރާއްޖޭގެ އާބާދީގެ %5 (20،553) އަކީ އުމުރުން ދުވަސްވީ މީހުންނެވެ. އޭގެ ތެރެއިން ގިނައީ 65-74 އަހަރާ ދެމެދުގެ މީހުންނެވެ. އެއީ އުމުރުން ދުވަސްވީ މީހުންގެ %63 އެވެ. އުމުރުން 85 އަހަރުން މަތީގެ މީހުންގެ ނިސްބަތަކީ %9 އެވެ.

ހއ. އަތޮޅު - 963

ހދ. އަތޮޅު - 1،303

ށ. އަތޮޅު - 799

ނ. އަތޮޅު - 703

ރ. އަތޮޅު - 1,018

ބ. އަތޮޅު - 615

ޅ. އަތޮޅު - 481

ކ. އަތޮޅު (މާލެ ނުހިމަނައި) - 588

މާލެ - 6,699

އއ. އަތޮޅު - 337

އދ. އަތޮޅު - 513

ވ. އަތޮޅު - 111 

މ. އަތޮޅު - 353

ފ. އަތޮޅު - 224

ދ. އަތޮޅު - 302

ތ. އަތޮޅު - 594

ލ. އަތޮޅު - 807

ގއ. އަތޮޅު - 658

ގދ. އަތޮޅު - 985

ޏ. އަތޮޅު - 698

އައްޑޫ ސިޓީ - 1،802

އުމުރުފުރާތަކަށް ބަލާއިރު، 65-74 އަހަރާ ދެމެދުގެ މީހުންގެ ޖުމްލަ އަދަދަކީ 13،003 އެވެ. މީގެ ތެރެއިން 6،668 އަކީ ފިރިހެނުންނެވެ. އަންހެނުންގެ އަދަދަކީ 6،335 އެވެ. 75-84 އަހަރާ ދެމެދުގެ މީހުންގެ ޖުމްލަ އަދަދު 5،774 އަށް އަރާއިރު، އޭގެ ތެރެއިން 2،839 އަކީ ފިރިހެނުންނެވެ. އަންހެނުންގެ އަދަދަކީ 2،935 އެވެ. 85 އަހަރުން މަތީގެ މީހުންގެ އަދަދު 1،776 އަށް އަރައެވެ. މީގެ ތެރެއިން 1،023 އަކީ ފިރިހެނުންނެވެ. އަންހެނުންގެ އަދަދަކީ 753 އެވެ.

ތަފާސް ހިސާބުތަކުން ދައްކާ ގޮތުން، އިސްރަށްވެހިންގެ ތެރެއިން 36 އިންސައްތަ، ނުވަތަ 7،402 މީހުންނަކީ ނުކުޅެދުންތެރިކަން ހުންނަ މީހުންނެވެ. އޭގެ ތެރޭގައި ހިމެނެނީ 4،024 އަންހެނުންނާއި 3،378 ފިރިހެނުންނެވެ. 

އުމުރުން ދުވަސްވީ މީހުންގެ މެދުގައި ނުކުޅެދުންތެރިކަން ގިނައިން ފެންނަނީ ހިނގުމުގައި، ފެނުމުގައި އަދި ކަންކަން ހަނދާންކުރުމުގައެވެ. 

ކައިވެނީގެ ނިސްބަތަށް ބަލާއިރު، އިސްރަށްވެހިންގެ ތެރެއިން 60 އިންސައްތަ މީހުން ކައިވެނިކޮށްގެން އުޅޭއިރު، 29 އިންސައްތަ މީހުންނަކީ އިނދެ ވަރިވެފައި ތިބި މީހުންނެވެ. އަދި ދުވަހަކުވެސް ކައިވެނި ނުކުރާ މީހުންގެ އިންސައްތަ އަކީ 1 އެވެ.

ތަޢުލީމީ ފެންވަރަށް ބަލާއިރު، އިސްރަށްވެހިންގެ ދެބައިކުޅަ އެއްބަޔަށްވުރެ ގިނަ މީހުންނަކީ ޕްރައިމަރީ ފެންވަރުގެ ތަޢުލީމު ހާސިލުކޮށްފައިވާ މީހުންނެވެ. ނަމަވެސް، ކޮންމެ 5 މީހަކުން އެކަކު ދުވަހަކުވެސް ސްކޫލަށް ގޮސްފައި ނުވާކަން ފާހަގަކުރެވެއެވެ.

މީގެ އިތުރުން މަސައްކަތުގެ ދާއިރާއަށް ބަލާއިރު، އިސްރަށްވެހިންގެ 67 އިންސައްތަ މީހުންނަކީ އުފެއްދުންތެރިކަމުގެ މަސައްކަތްތަކާއި، ދަނޑުވެރިކަމާއި، ފޮރެސްޓްރީ އަދި މަސްވެރިކަމުގައި ދާއިރާގައި މަސައްކަތް ކޮށް އާމްދަނީ ހޯދާ މީހުންނެވެ.

އަދި %16 މީހުން ވަޒީފާގައި އުޅޭއިރު ވަޒީފާ ނެތް މީހުންގެ އިންސައްތައަކީ 6 އެވެ.