ވޭޕް އަދި އީ-ސިނގިރޭޓް ދިވެހިރާއްޖެއަށް އެތެރެ ކުރުމާއި، ވިޔަފާރި ކުރުމާއި އަދި އެ ތަކެތި ގެންގުޅުން މަނާކުރުމަށް ގޮވާލާ 21 ޤައުމީ ކުޅިވަރު ޖަމިއްޔާއިން ގޮވާލައިފިއެވެ.

21 ކުޅިވަރު އެސޯސިއޭޝަނެއް ގުޅިގެން ނެރެފައިވާ ބަޔާނުގައި ގޮތުގައި، ވޭޕް އަދި އީ-ސިނގިރޭޓްގެ ސަބަބުން ސިއްޙަތަށް ކުރިމަތިވާ ނޭދެވޭ އަސަރުތަކާއި، އޭގެ ބިރުވެރިކަމާއި، އޭގެ ނުރައްކާތެރިކަމުގެ ވާހަކަ އަކީ މެޑިކަލް ޑޮކްޓަރުންނާއި، ތަޢުލީމީ ދާއިރާގެ ފަންނީ އަދި މި ނޫންވެސް އެހެން ފަރާތްތަކުން މެދުކެނޑުމެއްނެތި ދިވެހިންނަށް ފޯރުކޮށްދެއްވަމުންގެންދާ އިރުޝާދުތަކެކެވެ.

ނަމަވެސް، ދުވަހެއް ދުވަހަކަށް މި ތަކެތީގެ ބޭނުންކުރުން އިތުރުވެ، މީގެ ނޭދެވޭ އަސަރު ކުރިއަށް އޮތް ޖީލުތަކަށް ކޮށްފާނެކަމުގެ ބިރު ވަނީ އިންތިހާއަށް އުފެދިފައެވެ.

ޖަމިއްޔާތަކުން ފާހަގަކޮށްފައިވާ ގޮތުގައި، ދިވެހި ކުޅުންތެރިންނާއި، ތަމްރީނު ފަރާތްތަކުގެ މެދުގައި ވޭޕް އަދި އީ-ސިނގިރޭޓް ބޭނުންކުރުން އަންނަނީ ކަންބޮޑުވާ މިންވަރަކަށް އިތުރުވަމުންނެވެ. މިކަމުގެ ސަބަބުން ކުޅުންތެރިންގެ ފުުއްޕާމެއަށް ދިމާވާ ސިއްޙީ އެކިއެކި މައްސަލަތަކާއި، ނޭދެވޭ އަސަރުތަކުގެ ސަބަބުން ކުޅުންތެރިންގެ ޕަރފޯމަންސް ދަށްވެ، ކުރިއެރުމަށް ހުރަސްއެޅި، ދުޅަހެޔޮކަން ގެއްލި، ކުޅިވަރު ކުޅުމާ ދުރަށްދާކަން ފާހަގަކުރެވެން ވަނީ ފަށާފައެވެ.

ނޫސްބަޔާނުގައި އިތުރަށް ބުނެފައިވަނީ، މިއީ ދިވެހިރާއްޖޭގެ ކުޅިވަރާއި، ދުޅަހެޔޮކަން ކުރިއެރުވުމަށް ސަރުކާރުންނާއި އެހެނިހެން ފަރާތްތަކުން ކުރާ މަސައްކަތަށް ހުރި ބޮޑު ގޮންޖެހުމެއް ކަމަށެވެ. އަދި މިއީ ބައިނަލްއަޤްވާމީ ކުޅިވަރުގެ މައިދާނުގައި ރާއްޖެއިން ހޯދަން ބޭނުންވާ ރަން ވަނަތައް ހާސިލުކުރުމަށް އެޅިފައިވާ ހުރަހެއް ކަމަށްވެސް ބަޔާނުގައި ބުނެފައިވެއެވެ.

ޖަމިއްޔާތަކުން ގޮވާލާފައިވަނީ، ކުރިއަށް އޮތް ޖީލު މި ވަބާއިން ސަލާމަތް ކުރުމަށްޓަކައި ވޭޕް އަދި އީ-ސިނގިރޭޓް ދިވެހިރާއްޖެއަށް އެތެރެ ކުރުމާއި، ވިޔަފާރި ކުރުމާއި އަދި އެތަކެތި ގެންގުޅުން މަނާކުރުމަށެވެ. އަދި ދުނިޔޭގެ ބައެއް ޤއް ޤައުމުތަކާއި އަދި ޚާއްޞަކޮށް ރާއްޖޭގެ އަވައްޓެރި ބައެއް ޤައުމުތަކުގައި ވެސް ވޭޕް އަދި އީ-ސިނގިރޭޓް މަނާކޮށްފައިވާކަން ޖަމިއްޔާތަކުން ފާހަގަކޮށްފައިވެއެވެ.

މި ނޫސްބަޔާން ނެރުމުގައި ބައިވެރިވި 21 ޤައުމީ ކުޅިވަރު ޖަމިއްޔާތަކުގެ ތެރޭގައި ފުޓްބޯޅަ، ވޮލީބޯޅަ، ބާސްކެޓްބޯޅަ، ޓެނިސް، ބެޑްމިންޓަން، އަދި ހޭންޑްބޯލް ފަދަ އެކި ކުޅިވަރުތަކުގެ ޤައުމީ ޖަމިއްޔާތައް ހިމެނެއެވެ.