ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ފައިސާއިން ބައްސާމް ގަނެ މިލްކުކޮށްފައިވާކަމަށް ތުހުމަތުކުރާ އެޕާޓްމަންޓްތައް ފުލުހުންނާ ހަވާލުކުރަން ދިން މުއްދަތު އިތުރުކޮށްދީފިއެވެ.

އެފްއޭއެމްގެ ޚިޔާނާތުގެ މައްސަލައިގައި ތުހުމަތު ކުރެވޭ އެ އެސޯސިއޭޝަންގެ ކުރީގެ ރައީސް ބައްސާމް އަދީލް ޖަލީލް (ގ. ފަހިވާގެ / މާލެ) ގެ މިލްކިއްޔާތުގައިވާ ހުޅުމާލޭ އަމީން އެވެނިއުގެ 2 އެޕާޓްމަންޓް ފުލުހުންނާ މިއަދު ހަވާލުކުރަން ފުލުހުން ވަނީ ބައްސާމަށް ނޯޓިސް ދީފައެވެ. އަދި އެތަން މިއަދު ހަވާލުނުކޮށްފިނަމަ ފުލުހުން އެ އެޕާޓްމަންޓްތައް ނަގާނޭކަމަށްވެސް ނޯޓިހުގައި ވަނީ ބުނެފައެވެ.

މިކަމާ ގުޅިގެން އެ އެޕާޓްމަންޓްތައް ހަވާލުކުރުމަށް ދީފައިވާ މުއްދަތު އިތުރުކޮށްދިނުމަށް، ބައްސާމްގެ ވަކީލުން މިއަދު އެދިފައިވާ ކަމަށް ފުލުހުން ވަނީ ބުނެފައެވެ. މިކަމާ ގުޅޭގޮތުން ފުލުހުން ބުނެފައިވަނީ، ބައްސާމުގެ ފަރާތުން ފޮނުވި ސިޓީގެ ހާލަތަށް ރިޔާއަތް ކުރުމަށްފަހު މިމަހުގެ ނިޔަލަށް މުއްދަތު އިތުރުކޮށްދީފައިވާކަމަށެވެ. އަދި އެކަން ލިޔުމުން ބައްސާމަށް މިހާރު ވަނީ އަންގާފައެވެ.

ފުލުހުން މީގެ ކުރިން ބުނެފައިވާ ގޮތުން، ކޮވިޑްގެ ހާލަތުގައި ފީފާ މެދުވެރިކޮށް އެފްއޭއެމުން ނެގި ލޯނުގެ ފައިސާއިން އޭރު އެފްއޭއެމްގެ ރައީސް ކަމުގައި ހުރި ބައްސާމް, ހުޅުމާލޭގައި ހުންނަ އަމީން އެވެނިއު އިން 2 އެޕާޓްމަންޓް ވަނީ ގަނެފައެވެ.

އެގޮތުން އެކަމަށް އެފްއޭއެމްގެ 3 މިލިއަނަށްވުރެ ގިނަ ރުފިޔާ ހަރަދުކޮށްފައިވާ ކަމަށް ފުލުހުން ބުނެފައިވެއެވެ. އަދި މި ފައިސާ އަކީ އެފްއޭއެމުން ޑޮލަރު މާރުކުރުމުގެ ނަމުގައި އެކި ކުންފުނިތަކަށް ދޫކޮށްފައިވާ ޑޮލަރަށް، ލިބުނު ދިވެހި ރުފިޔާ ކަމަށްވެސް އެނގިފައިވާ ކަމަށް ބުންޏެވެ.

މީގެ އިތުރުން އެފްއޭއެމުން އަމީން ކޮންސްޓްރަކްޝަންސްއަށް އޭޕްރީލް 14، 2021 ގައި އެއް މިލިއަން ޑޮލަރު ޖަމާކުރިކަން ވެސް ފާހަގަކުރެވިފައިވާ ކަމަށް ފުލުހުން ބުނެފައިވެއެވެ. އަދި މިއީ ކޮވިޑު ރިލީފް ލޯނެއްގެ ގޮތުގައި ފީފާ އިން އެފްއޭއެމް އަށް ދޫކޮށްފައިވާ 1.9 މިލިއަން ޑޮލަރުގެ ތެރެއިން ބައެއް ކަމަށްވެސް ބުނެފައިވެއެވެ. 

މީގެ އިތުރުން މި ޑޮލަރަށްވާ ފައިސާ އެފްއޭއެމްއަށް ލިބިފައި ނުވާ ކަމަށާއި, މި ފައިސާ އެފްއޭއެމްްއަށް ލިބުނުކަން ދެއްކުމަށް ލިޔެކިޔުމެއްވެސް ތައްޔާރުކޮށްފައިވާ ކަމަށް ފުލުހުން ވަނީ ބުނެފައެވެ.