ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ކުރީގެ ރައީސް ބައްސާމް އަދީލް ޖަލީލްގެ އެޕާޓްމަންޓްތައް އަތުލުން ފަސްކޮށްލީ އިންސާނީ ކަރާމާތަށް ހުރުމަތްތެރިކޮށް ހިތުމަށް ކަމުގައި ފުލުހުން ބުނެފިއެވެ.

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ޚިޔާނާތުގެ މައްސަލައިގާ ތުހުމަތު ކުރެވޭ ކ. މާލެ، ގ. ފަހިވާގޭ ބައްސާމް އަދީލް ޖަލީލްގެ މިލްކިއްޔާތުގައިވާ، ހުޅުމާލެ އަމީން އެވެނިއު ގެ ދެ އެޕާޓްމަންޓް އާދީއްތަ ދުވަހުގެ ކުރިން ފުލުހުންނާ ހަވާލުކުރުމަށް ސެޕްޓެމްބަރު 18ގައި ކޯޓުން އަމުރުކުރި ކަމަށް ބުރާސްފަތި ދުވަހު ފުލުހުން ވަނީ ބުނެފައެވެ.

އެއަށްފަހު އިއްޔެ ފުލުހުން ބުނީ އެޕާޓްމަންޓްތައް ހަވާލުކުރުމަށް އޮކްޓޯބަރު 31 ވަނަ ދުވަހާ ހަމައަށް މުއްދަތު ދިނުމަށް ބައްސާމްގެ ވަކީލުގެ ފަރާތުން ސިޓީއަކުން އެދިފައިވާކަމަށާއި ހާލަތަށް ރިއާޔަތްކޮށް އެ މުއްދަތުގެ ފުރުސަތު ދީފައިވާނެކަމަށެވެ.

Advertisement

ބައްސާމަށް އެ ފުރުސަތު ދިނީ ކޮން ހާލަތަކަށް ރިޢާޔަތް ކުރުމަށް ފަހުގައިތޯ ނޫސއވެރިއަކު މިއަދު ސުވާލު ކުރުމުން ފުލުހުން ބުނެފައިވަނީ ފުލުހުންގެ މައްޗަށް ކޯޓުން ކޮށްފައިވ އަމުރުގައި، އިންސާނީ ކަރާމާތަށް ހުރުމަތްތެރިކޮށް ހިތުމަށް އަމުރުކޮށްފައިވާކަމަށެވެ.

އަދި އެޕާޓްމަންޓްތަކަކީ ބޮޑެތި މީހުންނާއި އަދި ކުޑަކުދިންވެސް ދިރިއުޅެމުންދާ އެޕާޓްމަންޓްތަކަކަށްވާތީ ހާލަތަށް ރިއާޔަތްކުރުމުގައި އެކަންކަމަށް ބަލާފައިވާނެކަމަށެވެ.