މާދަމާ ރޭގެ 12 ޖެހުމުގެ ކުރިން އެޕާޓްމަންޓްތައް ހަވާލުކުރުމަށް ފުލުހުން ބައްސާމަށް އަންގައިފިއެވެ.

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ޚިޔާނާތުގެ މައްސަލައިގާ ތުހުމަތު ކުރެވޭ ކ. މާލެ، ގ. ފަހިވާގޭ ބައްސާމް އަދީލް ޖަލީލްގެ މިލްކިއްޔާތުގައިވާ، ހުޅުމާލެ އަމީން އެވެނިއު ގެ ދެ އެޕާޓްމަންޓް އިއްޔެގެ ކުރިން ފުލުހުންނާ ހަވާލުކުރުމަށް ސެޕްޓެމްބަރު 18ގައި ކޯޓުން އަމުރުކުރި ކަމަށް ބުރާސްފަތި ދުވަހު ފުލުހުން ވަނީ ބުނެފައެވެ. ނަމަވެސް އެޕާޓްމަންޓްތައް ހަވާލުކުރުން ފަސްކޮށްދިނުމަށް ބައްސާމް އެދުމުން ފުލުހުން ފަހުން ވަނީ އެ މުއްދަތު މިހިނގާ އޮކްޓޯބަރުމަހުގެ ނިޔަލަށް ފަސްކޮށްދީފައިކަމަށް ބުނެފައެވެ.

މިކަމާ ގުޅިގެން ފުލުހުން މިރޭ ނެރުނު ބަޔާނެއްގައި ބުނެފައިވަނީ، ބައްސާމު ހޯދާފައިވާ އެޕާޓްމަންޓުތައް ހަވާލުކުރުމަށް އެންމެފުރަތަމަ އެކަން ބައްސާމުއަށް އަންގާފައިވަނީ، ހުޅުމާލޭ މެޖިސްޓްރޭޓު ކޯޓުން ސެޕްޓެމްބަރުމަހުގެ 28 ވަނަ ދުވަހު ނެރުނު އަމުރަކާ ގުޅިގެންނެވެ. އެ އަމުރުގައި ބުނެފައިވަނީ، އެދުވަހުގެ 10:58 ކުން ފެށިގެން 136 ގަޑިއިރުގެ ތެރޭގައި އެޕާޓްމަންޓްތައް ހުސްކޮށް ފުލުހުންނާ ހަވާލުކުރުމަށެވެ.

އެ އެންގުމާ ގުޅިގެން ބައްސާމް ވަނީ އިތުރު މުއްދަތެއް ހޯދުމަށް ސެޕްޓެމްބަރުމަހުގެ 29 ވަނަ ދުވަހު އެދިފައެވެ. ބައްސާމްގެ ފަރާތުން ހުށަހަޅާފައިވާ ކަންކަމަށް ބެލުމަށްފަހު ފުލުހުން ވަނީ މުއްދަތު އޮކްޓޯބަރުމަހުގެ 6 ވަނަ ދުވަހުގެ ރޭ 12 ޖެހުމާ ހަމަޔަށް އިތުރުކޮށްދީފައެވެ.

އެ މުއްދަތުވެސް އިތުރުކުރުމަށް ބައްސާމްގެ ފަރާތުން ވަނީ އޮކްޓޯބަރުމަހުގެ 4 ވަނަ ދުވަހު އެދިފައެވެ. ނަމަވެސް މުއްދަތު އިތުރުކޮށްދެވެން ނެތްކަމަށް ފުލުހުން ވަނީ ނިންމާފައެވެ.

ފުލުހުން ބުނީ އެޕާޓްމަންޓްތައް ހުސްކޮށް ހަވާލުވުމުގެ ކަންކަން ކުރިއަށްގެންދާަކަމަށެވެ. އަދި އޮކްޓޯބަރުމަހުގެ 8 ވަނަ ދުވަހުގެ ރޭ 12 ޖެހުމާ ހަމަޔަށް އެޕާޓްމަންޓް ހަވާލުނުކޮށްފިނަމަ، ގާނޫނީ އިމުގެ ތެރެއިން އެމާޓްމަންޓްތައް ފުލުހުންގެ ބެލުމުގެ ދަށަށް ނެގުމަށްޓަކައި އަޅަންޖެހޭ ފިޔަވަޅުތައް އަޅާނޭކަމަށް ފުލުހުން ވަނީ ބުނެފައެވެ.