ރާއްޖޭގެ ދެކުނުގެ އަތޮޅުތަކަށް މިރޭ، މޫސުން ވަރަށް ގޯސްވާނޭކަމަށް މެޓް އޮފީހުން ލަފާކޮށް ސަމާލުވުމަށް މެޓް އޮފީހުން އިލްތިމާސްކޮށްފިއެވެ.

މޫސުމާބެހޭ ޤައުމީ އިދާރާއިން މިރޭ ބުނީ، ލ.އަތޮޅުން ފެށިގެން އައްޑޫސިޓީގެ ރަށްތަކާ ހަމަޔަށް މިރޭ ބޯކޮށް ވާރޭވެހުމާއެކު ގުގުރުން އަދި ވިލާގަނޑުގައި ގަޑިއަކު 40 މޭލަށް ވައި ގަދަވާނެކަމަށް ލަފާކުރެވޭ ކަމަށެވެ. މެޓް އޮފީހުން ވަނީ މޫސުން ގޯސްވާނޭ ކަމަށް ލަފާކޮށް ރާއްޖޭގެ ދެކުނަށް މިރޭގެ 20:45 ކުން ފެށިގެން ދަންވަރު 01:30 ގެ ނިޔަލަށް ވައިޓް އެލާޓްވެސް ނެރެފައެވެ.

މީގެ އިތުރުން މިރޭގެ ދިޔަވަރު ބޮޑުވާ ވަގުތުތަކުގައި ރާއްޖޭގެ ބައެއް ރަށްރަށަށް އުދައިގެ އަސަރުކުރުމަކީ އެކަށީގެންވާކަމެއްކަމަށް މޫސުމާ ބެހޭ ޤައުމީ އިދާރާއިން ވަނީ ލަފާކޮށްފައެވެ. 

Advertisement

ހިނގަމުން މިދަނީ ހުޅަނގު މޫސުމުގެ ސާދަވަނަ ނަކަތެވެ. މި ނަކަތުގައި ދޭތެރެދޭތެރެއިން ވިއްސާރަކުރާނޭކަމަށް ނަކަތްތެރިން ލަފާކުރެއެވެ. މެޓް އޮފީހުން ބުނީ މިދުވަސްކޮޅު ހުޅަނގު މޫސުމުގެ ބާރު ގަދަވެފައިވުމުން، މިހަފްތާގެ ހުރިހާ ދުވަހެއްގައި ކަހަލަގޮތަކަށް މޫސުން ގޯސްވާނޭކަމަށް ލަފާކުރެވޭކަމަށެވެ.

އެހެންކަމުން މިދުވަސްވަރު ކަނޑުތައް އާދަޔާ ހިލާފަށް ގަދަވާނެކަމަށް ބެލެވޭތީވެ، ކަނޑުދަތުރުކުރާ ފަރާތްތަކުން މޫސުމަށް ބަލައިގެން ދަތުރުކުރުމަށް މޫސުމާ ބެހޭ ޤައުމީ އިދާރާއިން ވަނީ އިލްތިމާސްކޮށްފައެވެ.