ވެރިކަމުގައި ޕާޓީ އޮންނައިރު، މާލީގޮތުން އެހީ ލިބުނު ނަމަވެސް އިދިކޮޅުގައި އޮންނައިރު ޕާޓީއަށް އެއްޗެއް ދިއްކޮށްލާނެ މީހަކުވެސް ނުވާކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
އެމްޑީޕީން ކުޅުދުއްފުށީގައި ކުރިއަށްގެންދާ "ލާމަރުކަޒީ ގުޅުން" ކޮންފަރެންސްގައި ވާހަކަދައްކަވަމުން ވިދާޅުވީ، މާލީ ބާރުވެރިކަން ހޯދުމަކީ ކިހާ މުހިއްމު ކަމެއްކަން އެމްޑީޕީއަށް ކިތަންމެ ރަނގަޅަކަށްވެސް އެނގިފައިވާކަމަށެވެ.
ރައީސް ވިދާޅުވީ ޕާޓީ ވެރިކަމުގައި އޮންނައިރު ވަރަށް ފަސޭހައިން މީހުންގެ އެހީތެރިކަން ލިބޭނޭކަމަށާއި، އަމިއްލައަށް އެދިގެން އެހީވުމަށް އަންނަ މީހުން ގިނަކަމަށެވެ. ނަމަވެސް އިދިކޮޅުގައި ޕާޓީ މިއަދު އޮތްއިރު، އެކަން މުޅިން ބަދަލުވެފައިވާކަމަށެވެ. އެގޮތުން އިދިކޮޅުގައި ޕާޓީ އޮންނައިރު ފައިސާ ފޮއްޗެއް ދިއްކޮށްލާނެ މީހަކުވެސް ނުވާކަމަށް ރައީސް ސޯލިހު ވިދާޅުވިއެވެ. އެކަން އެހެންވުމުގައި ސަރުކާރުގެ ނުފޫޒު އޮންނަކަން ފާހަގަކުރައްވަމުން ރައީސް ސޯލިހް ވިދާޅުވީ ޑީއާރުޕީ ޒަމާނުއްސުރެ އެމްޑީޕީއަށް އެކަން ތަހައްމަލުކުރަން ޖެހިފައިވާކަމަށެވެ. ވިޔަފާރިވެރިންނަށްވެސް އެ ބިރުވެރިކަން މިއަދުވެސް އެބައޮތްކަމަށް ރައީސް ފާހަގަކުރެއްވިއެވެ.
އިދިކޮޅުގައި އޮންނަ ޕާޓީއަކަށް އެހީތެރިކަމެއް ފޯރުކޮށްދިނުން މިއަދު ވެފައިވަނީ ބިރުވެރިކަމަކަށް. އޭގެ ސަބަބުން އިދިކޮޅުގައި އިންނައިރު އިންތިހާބުތަކަށް ކުރިމަތިލާއިރު، ކުރަންޖެހޭ ހަރަދުތަކާއި ޕާޓީ ހިންގުމަށް ކުރަންޖެހޭ ހަރަދުތައް ކުރުމަށް މިއޮންނަނީ ދަތި އުނދަގުލަކަށް ވެފައި
ކުރީގެ ރައީސް ސޯލިހް ވިދާޅުވިއެވެ.
ރައީސް ސޯލިހު ވިދާޅުވީ، މާލީގޮތުން ޕާޓީ ބާރުވެރިރުވުމަށް ޕާޓީގެ ތެރެއިން ފަށާފައިވާ މަސައްކަތަކީ ކޮންމެހެން ކުރަންޖެހޭ މުހިއްމު މަސައްކަތެއް ކަމަށާއި، މިއީ ޕާޓީގެ ތެރޭގައި ނިންމިގެންދިޔަ ވަރަށް ރަނގަޅު ނިންމުމެއް ކަމަށެވެ. ޕާޓީއަށް އާންމުދަނީ ހޯދުމަށް މިއަދު ފެށި މަސައްކަތުގެ ހެޔޮ ބަދަލުތައް އަންނާނޭކަން ފާހަގަކުރައްވަމުން ރައީސް ސޯލިހު ވިދާޅުވީ، މިކަމުގެ ސަބަބުން މުޅި ޕާޓީގެ ހުރިހާ ގުނަވަންތަކަކަށްވެސް އެކަމުގެ ހެޔޮ ބަދަލުތައް އަންނާނޭ ކަމަށެވެ.
މިހާތަނަށް އާއިރު ޕާޓީއަކީ ވަކި މީހެއްގެ ފަހަތުގައި އޮންނަ ޕާޓީއަކަށް ނަންކުރެވޭ ކުރެވުނުއިރު، އެމީހާ ވެފައިވަނީ ޕާޓީ ހިންގުމަށް ފައިސާ ހޯދާ މީހާއަށްކަމަށްވެސް ރައީސް ސޯލިހު ވަނީ ވިދާޅުވެފައެވެ. އެކަމުގެ ސަބަބުން އެމީހާ ބުނާ ގޮތް ނޫން އެހެންގޮތް ހެދެން ނޯންނަކަން ފާހަގަކުރައްވަމުން ރައީސް ވިދާޅުވީ، ޕާޓީތެރެއިން މާލީ ބާރުވެރިކަން ލިބުމުން ޕާޓީގެ މިނިވަންކަން ބޮޑުވެ، ކުރާ މަސައްކަތްތައް އިހުނަށްވުރެ ޑިމޮކްރަޓިކް އުސޫލްތަކުގެ މަތިން ކުރެވިގެން ދާނޭކަމަށެވެ.
އެމްޑީޕީގެ ފަރާތުން ކުރިއަށްގެންދާ "ލާމަރުކަޒީ ގުޅުން" އަންނަ އަންގާރަދުވަހުގެ ނިޔަލަށް ކުރިއަށްދާއިރު، މި ކޮންފަރެންސްގައި އެކި ސަރަހައްދުތަކުން ގިނަ އަދަދެއްގެ މެމްބަރުން ބައިވެރިވެއެވެ.
Advertisement
This content is created and paid for by advertisers and does not involve Voice Journalists
