އިޒްރާއީލްގެ ނިރުބަވެރި ސިފައިން ލުބުނާނުގެ ހިޒްބުﷲއަށް އަމާޒުކޮށް ދެމުންގެންދާ ހަމަލާތައް އެންމެފަހުން އެމްބިއުލާންސްތަކަށް އަމާޒުކުރަން ފަށައިފިއެވެ.
މި މައްސަލަ ފެންމަތިވުމާ ގުޅިގެން އިޒްރާއީލް ސިފައިން ބުނެފައިވަނީ ހަމަލާތައް އެގޮތަށް އަމާޒުކުރަން ޖެހުނީ ލުބުނާނުގެ ހިޒްބުﷲ އަށް ނިސްބަތްވާ ހަނގުރާމަވެރިން އެމްބިއުލާންސް ތަކުގައި ދަތުރުކުރާތީ ކަމަށެވެ. ނަމަވެސް މިއީ އެއްވެސް ހަގީގަތެއް އެކުލެވިގެންވާ ވާހަކައެއް ނޫންކަމަށް ހަނގުރާމައިގެ މައިދާނުގައި ހަރަކާތެރިވަމުންދާ ބައިނަލްއަޤްވާމީ އެހީދޭ ޖަމާއަތްތަކުގެ އޮފިޝަލުން ވަނީ ހާމަކޮށްފައެވެ.
އަލް ޖަޒީރާއިން ބުނީ އިޒްރާއީލްގެ ނިރުބަވެރި ސިފައިންގެ ފައުޖުތަކުން މިއަދުވެސް އެމްބިއުލާސަކަށް އަމާޒުކޮށް ހަމަލާދީފައިވާކަމަށެވެ. މި ހަމަލާތަކުގައި ލިބުނު ގެއްލުންތަކެއް އަދި ހާމަކޮށްފައެއް ނުވެއެވެ. ނިރުބަވެރިން ގައްޒާ އަދި ލުބުނާނަށް ދޭ ހަމަލާތައް ވަނީ މި ފަހަކަށް އައި ބައިނަލްއަޤްވާމީ އޮފިޝަލުންނަށް އަމާޒުކުރަން ފަށާފައެވެ. މިގޮތުން ނިރުބަވެރި ސިފައިން ލުބުނާން ދެމުންގެންދާ ހަމަލާތަކުގައި، މިދިޔަ ބްރާސްފަތިދުވަހު ވަނީ އެގައުމުގައި ހަރަކާތްތެރިވާ އދ ގެ ސުލްހަ ބަލަހައްޓާ ފައުޖަށް އަމާޒުކޮށްފައެވެ.
އަލްޖަޒީރާއިން ބުނެފައިވަނީ ނިރުބަވެރިން ލުބުނާނުގެ ހިޒްބުﷲ އަށް ދިން ހަމަލާތަކެއްގައި އޮޅުންތަކެއް އަރައިގެން އދ ގެ ސުލްހަ ބަލަހައްޓާ ސިފައިންގެ ބަޔަކަށް ޓޭންކަރުން ހަމަލާދީފައިވާކަމަށެވެ. މި ހަމަލާތަކުގައި އދ ގެ ފައުޖަށް ނިސްބަތްވާ 2 ސިފައިންގެ މީހަކު ވަނީ ޒަހަމްވެފައެވެ.
މި ހަމަލާތައް ދިންދާ ދެދުވަސް ފަހުން ފްރާންސް، އިޓަލީ އަދި ސްޕެއިނުން ވަނީ އދ ގެ ސުލްހަ ބަލަހައްޓާ ސިފައިންގެ ބަޔަކަށް ޓޭންކަރުން ދިން އެ ހަމަލާތައް ކުއްވެރިކޮށްފައެވެ.
Advertisement
This content is created and paid for by advertisers and does not involve Voice Journalists
