ކުރީގެ ބޮޑުވަޒީރު ސުމުއްވުލް އަމީރު އިބްރާހީމް ފާމުލަދޭރި ކިލެގެފާނުގެ ދަރިކަނބަލުން އައްނަބީލާ ޚަދީޖާ އިބްރާހީމްދީދީ އަވަހާރަވެއްޖެއެވެ

އެކަމަނާ މިއަދު އަވަހާރަވީ އިންދިރާ ގާނދީ މެމޯރިއަލް ހޮސްޕިޓަލްގައި ފަރުވާދެމުންދަނިކޮށް މެންދުރުފަހުގެ ވަގުތެއްގައެވެ. އަވަހާރަވީއިރު، އުމުރުފުޅަކީ، 68 އަހަރެވެ.

އައްނަބީލާ ޚަދީޖާ އިބްރާހީމްދީދީ އަވަހާރަވުމާއި ގުޅިގެން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ، މަރުޙޫމާގެ ޢާއިލާއަށް ތަޢުޒިޔާ ވިދާޅުވެފައެވެ. މިކަމާ ގުޅިގެން އެކްސްގައި ކުރެއްވި ޕޯސްޓެއްގައި ރައީސް ވަނީ އެކަމަނާގެ ހިދުމަތް ފާހަގަކުރައްވާފައެވެ.

Advertisement

ރައީސް ޑރ.މުއިއްޒު ވިދާޅުވީ، އެކަމަނާ ވަނީ ދިވެހިރާއްޖޭގެ ތަޢުލީމީ ދާއިރާއާއި، އަންހެނުންނަށް ކުރިއެރުމުގެ އިތުރުން، ފުރުޞަތުތައް ފަހިކޮށްދިނުމުގެ ދާއިރާއާއި، ޚާރިޖީ ގުޅުންތަކުގެ ދާއިރާގައިވެސް ސަރުކާރަށް ޚިދުމަތް ކުރައްވާފައި ކަމަށެވެ.

ޚަދީޖާ އިބްރާހީމްދީދީގެ ޖަނާޒާ ބޭއްވުމަށް ހަމަޖެހިފައިވަނީ، މިއަދުގެ މަޢުރިބު ނަމާދަށްފަހު، އާސަހަރާ މިސްކިތުގައެވެ.

އައްނަބީލާ ޚަދީޖާ އިބްރާހީމްދީދީ އަކީ، ކުރީގެ ބޮޑުވަޒީރު ސުމުއްވުލް އަމީރު އިބްރާހީމް ފާމުލަދޭރި ކިލެގެފާނުގެ ހަގުދަރިކަނބަލުންނެވެ. 

ދިވެހިރައްޖޭގެ ބޮޑުވަޒީރުކަމުގެ މަޤާމުގައި ކުރިން ހުންނެވި ސުމުއްވުލް އަމީރު އިބްރާހީމް ފާމުދޭރި ކިލެގެފާނު އިސްތިއުފާދެއްވާފައިވަނީ، އިބްރާހިމް ނާސިރަށް ބޮޑުވަޒީރުކަން ލިބިވަޑައިގަތުމާ ގުޅިގެންނެވެ. އިސްތިއުފާދެއްވީ 1957 ވަނަ އަހަރުގެ ޑިސެމްބަރުމަހުގެ 11 ވަނަ ދުވަހުއެވެ.

ސުމުއްވުލް އަމީރު އިބްރާހީމް ފާމުދޭރި ކިލެގެފާނުގެ ދަރިކަނބަލުންގެ ތެރެއިން މިވަގުތު ދުނިޔޭގައި މިވަގުތު އިންނެވި ހަމައެކަނި ދަރިކަނބަލުންނަކީ، އަބްދުއްސައްތާރު މޫސާ ދީދީގެ ހުވަފަތް އަނބިކަނބަލުން ޢާއިޝަތު އިބްރާހީމް ދީދީއެވެ.