ކުރިއަށްއޮތްތަނުގައި މުދަލުޒަކާތުގެ ގޮތުގައި ދައްކަންޖެހޭ ނިސާބު އިތުރުކޮށްފިއެވެ.

ދިވެހިރާއްޖޭގެ ޒަކާތު ހައުސްއިން މިއަދު ވަނީ މުދަލު ޒަކާތުގެ ގޮތުގައި ދައްކަންޖެހޭ ނިޞާބު އިތުރުކޮށް އަދަދު ހާމަކޮށްފައެވެ. 

ޒަކާތު ހައުސްއިން މިއަދު ބުނެފައިވަނީ، މުދަލުޒަކާތުގެ ނިޞާބު ކަނޑައެޅުމުގައި އެ އިދާރާއިން އަމަލުކުރަމުންގެންދާ އުސޫލުގެ ދަށުން މިއަދުން ފެށިގެން ދިވެހިރާއްޖޭގައި ފައިސާއިން މުދަލުޒަކާތް ނެރުން ވާޖިބުވާ ނިޞާބަކީ މިންވަރަކީ 9240.35 ދިވެހި ރުފިޔާއެވެ. 

ޒަކާތު ހައުސްއިން އެންމެފަހުން މުދަލު ޒަކާތުގެ ނިޞާބަށް ބަދަލުގެނެސްފައިވަނީ، މިއަހަރުގެ މެއިމަހުގެ 22 ވަނަ ދުވަހުއެވެ. އެފަހަރު ނިޞާބަކީ 9،353.40 ރުފިޔާއެވެ.

ޒަކާތު ހައުސްގެ ޕޯސްޓް

މުދަލު ޒަކާތަކީ އިސްލާމްދީނުގެ ރުކުންތަކުގެ ތެރެއިން ރުކުނަކަށް ވީހިނދު މިލްކީއްޔާތުގައި ނިޞާބު ހަމަވާ މިންވަރަށް ފައިސާ ހުރެ، އެފައިސާ ހުންނަތާ ހިޖުރީގޮތުން އެއް އަހަރުވުމުން، ޝަރުއީ ހަމަތަކާއެއްގޮތަށް އޭގެ 40 ބައިކުޅަ އެއްބައި، ނުވަތަ 2.5 އިންސައްތަ ނެރުމަށް ޒަކާތު ހައުސްއިން ވަނީ ނަސޭހަތްތެރިވެފައެވެ.

ދިވެހިރާއްޖޭގައި މުދަލު ޒަކާތުގެ ނިޞާބު ކަނޑައަޅަނީ ރިހީގެ އަގަށް ބަލައިގެންނެވެ. އެ އަގު ކަނޑައެޅުމުގައި ޒަކާތު ހައުސްއިން ބަލަނީ މޯލްޑިވްސް މަނިޓަރީ އޮތޯރިޓީ، އެމްއެމްއޭގެ ރަޢުޔަށެވެ.

ދައުލަތުގެ ޓެކްސް އިދާރާގެ ތަފާސްހިސާބުތަކުން ދައްކާގޮތުގައި މިއަހަރުގެ މިހާތަނަށް މުދަލު ޒަކާތުގެ ގޮތުގައި 82 މިލިއަނަށްވުރެ ގިނަ ރުފިޔާ ވަނީ ލިބިފައެވެ.