އިސްލާމީ މަރުކަޒުގެ މުންނާރުގެ ތިރީގައި ހަދާފައިވާ މަސްފެންގަނޑު ހަލާކުވެ ގިނަ ދުވަސްތަކެއް ވެފައިވާތީ، މި މަސްފެންގަނޑު ސްޓެލްކޯގެ ސީއެސްއާރުގެ ދަށުން މަރާމާތުކުރަން ފަށައިފިއެވެ.

މީގެ ކުރިން އިސްލާމީ މަރުކަޒަށް 40 އަހަރު ފުރުން ފާހަގަ ކުރުމުގެ ގޮތުން، މުންނާރު ކައިރީގައި މަސްފެންގަނޑެއް ހެދުމަށް އިސްލާމީ ކަންތައްތަކާއި ބެހޭ ވުޒާރާއިން އިއުލާނުކުރި ނަމަވެސް، ރާއްޖޭގެ އިގްތިޞާދީ ހާލަތު އޮތް ގޮތުން، މި ވަގުތު މިފަދަ ކަންކަން ކުރުމަކީ އެންމެ މުނާސަބު ކަމަކަށް ނުވާނެތީ، މި އިއުލާން ބާތިލު ކުރުމަށް އިސްލާމީ ކަންތައްތަކާއި ބެހޭ ވަޒީރު ޑރ.މުޙައްމަދު ޝަހީމް އަލީ ސައީދު ވަނީ އަންގަވާފައެވެ.

އެހެންނަމަވެސް، ސްޓެލްކޯގެ މެނޭޖިން ޑިރެކްޓަރ ހުސައިން ފަހުމީ ވަނީ ވަޒީރު ޝަހީމް އާއި ބައްދަލުކުރައްވައި، މި މަސައްކަތް ކުރުމުގެ ޝައުގުވެރިކަން ފާޅުކުރައްވާފައެވެ.

މި މަސައްކަތް ފެށިކަން ހާމަކުރައްވައި، ފަހުމީ އެކްސްގައި ކުރެއްވި ޕޯސްޓެއްގައި ވިދާޅުވީ، އިސްލާމީ މަރުކަޒުގެ މުންނާރުގެ ދަށުގައި ހުރި މަސްފެންގަނޑު މަރާމާތު ކުރުމުގެ މަސައްކަތް ސްޓެލްކީއިން ރަސްމީކޮށް ފަށާފައިވާ ކަމަށެވެ.

ސްޓެލްކޯގެ އަމާޒަކީ، މުޖުތަމަޢަށް ތާރީޚީ އަދި ޘަޤާފީ މުހިންމު އެތަން ޙިމާޔަތްކޮށް، ކުރިއެކޭ އެއްގޮތަށް އެތަނަށް ދިރުން ގެނައުން ކަމަށް ފަހުމީ ވިދާޅުވި އެވެ.

އިސްލާމީ މަރުކަޒަަށް 40 އަހަރު ފުރޭ މުނާސަބަތާއި ގުޅިގެން އިސްލާމީ މަރުކަޒު ސަރަހައްދު ޒީނަތްތެރިކުރުމަށް އެ ވުޒާރާއިން ގިނަ މަސައްކަތްތަކެއް ކުރަމުން އަންނައިރު، އިސްލާމީ މަރުކަޒަށް 40 އަހަރު ފުރުން ކުލަގަދަކޮށް ފާހަގަކުރުމަށް ސަރުކާރުން ނިންމާފައިވާކަން ފާހަގަކޮށްލަން ޖެހެއެވެ.