ޖަޕާނުގެ އާބާދީގެ 71 އިންސައްތަ މީހުން، ޓައިވާނަކީ މިނިވަން ގައުމެއްގެ ގޮތުގައި ދެކޭކަމަށް ސަރވޭއަކުން ދައްކައިފިއެވެ.

ޓައިވާނުގެ އިންޑޯޕެސިފިކް ސްޓްރެޓީޖިކް ތިންކްޓޭންކާއި، ޖަޕާނުގެ ސަރވޭ ކުންފުންޏެއްކަމަށްވާ ސަންކެއި ޝިންބުން ގުޅިގެން ކުރި ސަރވޭއަކުން ދައްކާ ގޮތުގައި ޖަޕާނުގެ 71.1 އިންސައްތަ މީހުން ދެކޭ ގޮތުގައި ޓައިވާނާއެކު ޑިޕްލޮމެޓިކް ގުޅުން ގާއިމްކުރަން ޖެހެއެވެ. އަދި 71.2 މީހުން ދެކޭ ގޮތުގައި ޓައިވާނަކީ މިނިވަން މުސްތަގިއްލު ގައުމެކެވެ. މީގެ އިތުރުން އާބާދީގެ 55 އިންސައްތަ ދެކޭ ގޮތުގައި އޭޝިއާގެ ގައުމުތަކުގެ ތެރެއިން ޖަޕާނާއި އެންމެ ބޮޑަށް ގުޅިފައިވާ ގައުމަކީވެސް ޓައިވާނެވެ.

ޓައިވާނަކީ ޗައިނާއިން ދައުވާކުރާ ގޮތަށް އެގައުމުގެ ބައެއް ކަމަށް ދެކެނީ ޖަޕާނުގެ އެންމެ 8.2 އިންސައްތަ މީހުންނެވެ. ބާކީ ވިއްސަކަށް އިންސައްތަ މީހުން މިމައްސަލައިގައި އަމިއްލައަށް ވަކި ވިސްނުމެއް ނުގެންގުޅެއެވެ.

3000 މީހުން ބައިވެރިކޮށްގެން ޖަޕާނުގެ 8 ސިޓީއެއްގައި ކުރިއަށްގެންދިޔަ މި ސަރވޭގެ ބައިވެރިންގެ ތެރެއިން 40 އިންސައްތަ މީހުން ދެކޭ ގޮތުގައި ޖަޕާނާއި ޓައިވާނާ ދެމެދު ވިޔަފާރިއާއި އިގްތިސާދީ ގުޅުން ބަދަހިކުރަން ޖެހެއެވެ. އަދި 26.7 އިންސައްތަ މީހުން ދެކޭ ގޮތުގައި އަސްކަރީ ގުޅުން ބަދަހިކުރަން ޖެހެއެވެ.

ޓައިވާނުން އަމިއްލަ ވެރިކަމެއް ކުރަމުން އައިނަމަވެސް، ޗައިނާއިން ގަބޫލުކުރާ ގޮތުގައި ޓައިވާނަކީ ވަކިވެގަނެގެން އުޅޭ ޗައިނާގެ ޕްރޮވިންސެކެވެ. އަދި ޓައިވާން، ޗައިނާގެ ފުރިހަމަ ބާރުގެ ދަށަށް ގެނައުމަކީ ޗައިނާގެ އަމާޒެކެވެ. ފަހަކަށް އައިސް ދެގައުމުގެ މެދުގައި ނުތަނަވަސްކަން ވަރަށް ބޮޑަށް އިތުރުވެފައިވާއިރު، ޗައިނާއިން ވަރަށް އަވަހަށް ޓައިވާނަށް އެރުމުގެ ބިރު އެބައޮތްކަމަށް މުހައްލިލުން ދެކެއެވެ.