ހަކަތައިގެ ސިނާއަތުގައި ރާއްޖޭގައި މިހާތަނަށް ހިންގޭ އެންމެ ބިޔަ އަދި ބޮޑު މަޝްރޫއު ކުރިއަށް ގެންދިއުމަށް ސްޓެލްކޯއާއި، ޗައިނާގެ ޓީބީއީއޭ ގްރޫޕް ކޯ ލިމިޓެޑާ އެކު ފަހުމުނާމާއެއްގައި ސޮއި ކޮށްފިއެވެ.

މިއަދު ބޭއްވުނު ރަސްމިއްޔާތުގައި މި އެއްބަސްވުމުގައި ސްޓެލްކޯގެ ފަރާތުން ސޮއިކުރެއްވީ އެމްޑީ ހުސެއިން ފަހުމީ އެވެ. ޓީބީއީއޭ ގެ ފަރާތުން ސޮއި ކުރެއްވީ ކުންފުނީގެ ވައިސް ޕްރެސިޑެންޓް ސަންގް ހޮންގް ޒޮންގް މި އެވެ. 

ސްޓެލްކޯއިން ބުނީ، މި ފަހުމުނާމާގެ ދަށުން 150 މެގަވޮޓްގެ ޑުއަލް ފިއުލް އިންޖީނުގެއަކާއިއެކު މާލެ، ވިލިމާލެ، ގުޅިފަޅު، އަދި ތިލަފުށި ގުޅުވައިދޭ ހައި ކެޕޭސިޓީ ޓްރާންސްމިޝަން ލައިނެއް ގާއިމް ކުރެވިގެންދާނެ ކަމަށެވެ. 

Advertisement

މި ފަހުމާނާއި ގުޅޭގޮތުން، ސްޓެލްކޯގެ އެމްޑީ ހުސައިން ފަހުމީ ވިދާޅުވީ، މި އެއްބަސްވުމާއެކު އަންނަ އަހަރުގެ ކުރީކޮޅު މަޝްރޫޢުގެ މަސައްކަތް ފެށިގެންދާނެ ކަމަށެވެ.

300 މިލިއަން ޑޮލަރުގެ މި މަޝްރޫޢަކީ މި ސަރަހައްދުގެ ހަކަތަ އުފެއްދުމުގެ އިންފްރާސްޓްރަކްޗަރގައި މުހިންމު ބޮޑު މަސައްކަތަކަށް ވާނެ ކަމަށް ވެސް ވިދާޅުވުއެވެ.

ސްޓެލްކޯއިން މައުލޫމާތުދޭ ގޮތުގައި، މި މަޝްރޫޢުގެ ދަށުން ހަދާ އިންޖީނުގެ ހުންނާނީ ތިލަފުށީގައެވެ. މިއީ ތެލާއި ގޭސް އަދި ބަޔޯ ފިއުލުން ވެސް ހިންގޭނެ ޑުއަލް ފިއުލް އިންޖީނުގެއެކެވެ.

މީގެ އިތުރުން، ޕާޓްނަޝިޕްގެ ދަށުން މާލެ، ވިލިނގިލި، ގުޅީފަޅު އަދި ތިލަފުށި ގުޅުވައިދޭ ހައި-ކެޕޭސިޓީ ޓްރާންސްމިޝަން ލައިނެއް ޤާއިމުކުރެވޭނެ ކަމަށާ، 150 މެގަވޮޓުގެ ޑުއަލް ފިއުލް ޕަވަރ ޕްލާންޓެއް ޤާއިމުކޮށް، ކަރަންޓު އުފެއްދުމުގެ ޤާބިލުކަން އިތުރުކުރެވޭނެ ކަމަށް ސްޓެލްކޯއިން މައުލޫމާތު ދެއެވެ. އަދި ދެމެހެއްޓެނިވި ގޮތެއްގައި ކަރަންޓުގެ ލޯޑާ އެއްވަރަށް ކެޕޭސިޓީ އުފެއްދިގެންދާނެ ކަމަށްވެސް ބުންޏެވެ. 

ފަހުމީ ވިދާޅުވިގޮތުގައި، ޑުއަލް ފިޔުލް އިންޖީނުގޭގެ ބޭނުމަކީ ދުނިޔޭގެ ބާޒާރުގައި އަގަށް އަންނަ ބަދަލާއެކު އެންމެ އަގުހެޔޮކޮށް ކަރަންޓު ދެވޭ ގޮތަށް ބަލައިގެން އިންޖީނު ހެދުމެވެ.

ޓީބީއީއޭ ގްރޫޕް ކޯ ލިމިޓެޑަކީ ކުރިން ޓެބިއަން އިލެކްޓްރިކް އެޕަރޭޓަސްގެ ނަމުން މަޝްހޫރު، ޗައިނާގެ ކަރަންޓު ޓްރާންސްފޯމަރާއި އެހެނިހެން އިލެކްޓްރިކަލް އިކުއިޕްމަންޓު އުފައްދާ އެންމެ ބޮޑު ކުންފުންޏެވެ. 1938 ވަނަ އަހަރު އުފެދުނު މި ކުންފުންޏަކީ ޗައިނާގެ ހިއްސާގެ ބާޒާރުގައި ލިސްޓުކޮށްފައިވާ ބިޔަ ކުންފުންޏެކެވެ. އަދި ކަރަންޓުގެ ޚިދުމަތުގައި ޗައިނާގެ އެންމެ ވަރުގަދަ 10 ކުންފުނީގެ ތެރޭގައި ހިމެނޭ އެއް ކުންފުންޏެވެ.