ލޮނުފެނުން މަސް ފިނިކުރާ ނިޒާމު މަސްދޯނިފަހަރުގައި ގާއިމުކުރުމަށް ތައްޔާރުވުމުގެ ގޮތުން ކުރަންޖެހޭ މަސައްކަތްތައް މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާއިން ފަށައިފިއެވެ.

މިގޮތުން މި ވުޒާރާއިން އެކްސްގައި ކުރި ޕޯސްޓެއްގައި ބުނީ، މަސްދޯނިފަހަރުގައި ލޮނުފެނުން މަސް ފިނިކުރާ ނިޒާމު ގާއިމުކުރުމުގެ މަޝްރޫޢާ ގުޅޭގޮތުން މަސްވެރިންނާއި ކައުންސިލްތަކަށް މަޢުލޫމާތު ދިނުމަށާއި ފެސިލިޓީއަށް ހުށަހެޅުމަށް ބޭނުންވާ އޮޑިވެރިންނަށް އެހީތެރިކަން ފޯރުކޮށްދިނުމަށް އެސްޑީއެފްސީ ބޭންކާއި އެ ވުޒާރާގެ ޓީމުތައް މި ހަފްތާގައި ރަށްރަށުގައި ހަރަކާތްތެރިވާނެ ކަމަށެވެ.

މިގޮތުން މި ޓީމުތަކުން ހަރަކާތްތެރިވާ ރަށްތަކަކީ:

1) ތ. ހިރިލަންދޫ

2) ތ. ވޭމަންޑޫ

3) ޅ. ނައިފަރު

4)  ށ. ކޮމަންޑޫ

5)  ހއ. އިހަވަންދޫ

މިކަމާއި ގުޅޭ ގޮތުން މަސްވެރިކަމާއި ބެހޭ ވުޒާރާއިން ބުނީ، މަސްވެރިންނަށް ބޭނުންވާވަރަށް އައިސް ނުލިބުމަކީ ވަކިން ޚާއްސަކޮށް ކަނޑުމަހުގެ މަސްވެރިންނަށް ކުރިމަތިވެފައިވާ ގޮންޖެހުމެއް ކަމަށެވެ.

މަސް ހޯދަން ގިނަ ވަގުތު ހޭދަކޮށް، ބާނާ މަސް ތާޒާކަންމަތީގައި މަސް ގަންނަ ސައިޓްތަކަށް ގެނައުމަށް އެކަށީގެންވާ ވަރަށް އައިސް ހުރުމަކީ ވަރަށް މުހިންމު ކަމެއް ކަމަށާއި، މަސް ރަނގަޅަށް ފިނިކޮށް މަހުގެ ކޮލިޓީ ދެމެހެއްޓުން މުހިންމުކަން ފާހަގަކުރަމުން އެ ވުޒާރާއިން ބުނީ، މި ވަގުތު ރާއްޖޭގެ ދެކުނުގައި އެކަނިވެސް ކަނޑުމަހުގެ މަސްވެރިކަމަށް ހާއްސަ 100 އެއްހާ ދޯނި އޮތްއިރު، އޭގެ ތެރެއިން 70 ވަރަކަށް ދޯނީގައި އައިސްޕްލާންޓް އަޅާފައިވާކަމަށެވެ. 

އެހެންނަމަވެސް 30 ވަރަކަށް ދޯނީގައި އައިސްޕްލާންޓް އަޅާފައިނުވާކަމަށާއި، ދެކުނުގެ މި 4 އަތޮޅުގައި ދުވާލަކު 250 ޓަނުގެ އައިސްޕްލާންޓް އުފެއްދޭ 12 އައިސްޕްލާންޓް ހުރި ނަމަވެސް، ދެކުނުގައި މަސްވެރިކަން ރަނގަޅު ދުވަސްވަރު، ދޯނިތަކަށް އެކަށީގެންވާވަރަށް އައިސް ފޯރުކޮށް ނުދެވޭކަމަށް އެ ވުޒާރާއިން ބުންޏެވެ.

މަސްވެރިކަމާއި ބެހޭ ވުޒާރާއިން ފާހަގަކުރި ގޮތުގައި މިކަމުގެ ސަބަބުން، ރަނގަޅު މަސްވެރިކަމެއްގައި މަސްވެރިން އައިސް ހޯދަން ދުއްވަން ޖެހޭ ދުއްވުން ހުއްޓިގެންދާނެކަމަށާއި، އައިސްޕްލާންޓް އަޅާފައި ހުންނަ ދޯނިތަކަށް ވަގުތު ސަލާމަތްވެ، ގިނަ ވަގުތު މަސްވެރިކަމުގައި ހޭދަ ކުރެވިގެންދާނެއެވެ.

އެ ވުޒާރާއިން ބުނީ، ދޯނިތަކުގައި އައިސްޕްލާންޓް އެޅުމުން މަސް ފިނިކޮށް ގިނަ ވަގުތު ގެންގުޅެވޭނެ ކަމަށާއި، މަހުން އުފައްދާ އެކި ބާވަތްތަކުގެ ކޮލިޓީ އިތުރުވާނެ ކަމަށެވެ. ހަމައެއާއިއެކު، ރާއްޖެ އަކީ ބާނާ މަހުގެ ބޮޑުބައި އެކްސްޕޯޓްކުރާ ގައުމަކަށް ވާއިރު، މަހުގެ ކޮލިޓީ ރަނގަޅުވުމުން ބޭރުގެ ބާޒާރުތަކުން މަހަށް ރަނގަޅު އަގު ލިބުމަށް ފުރުސަތު ފަހިވެގެންދާނެ ކަމަށް އެވުޒާރާއިން ބުނެއެވެ.