މާލެ އާއި ހުޅުމާލޭގެ ފޭސް 1 ގެ ބައެއް ސަރަހައްދުތަކުން މިއަދު މެންދުރުފަހު ކަރަންޓު ކެނޑުން އެކަށީގެންވާކަމަށް ސްޓެލްކޯއިން ބުނެފިއެވެ.

ސްޓެލްކޯއިން އެކްސްގައި ކުރި ޕޯސްޓެއްގައި ބުނީ، އެ ކުންފުނީގެ ކަރަންޓުގެ ވިއުގަ އަޕްގްރޭޑް ކުރުމުގެ މަސައްކަތަށް މާލެ ސިޓީ، މޫނިމާ ހިނގުން، ލޮނުޒިޔާރަތް މަގު، ކިނބިގަސް މަގު، ޖަނަވަރީ ހިނގުން އަދި މުތްތޮށި ގޯޅި ހިމެނޭ ސަރަޙައްދުން މިއަދު މެންދުރުފަހު 14:00 އިން 16:30 އާއި ދެމެދު ކަރަންޓުގެ ޚިދުމަތް މެދުކެނޑުމަކީ އެކަށީގެންވާ ކަމެއްކަމަށެވެ.

ހަމައެއާއިއެކު، އެ ކުންފުނިން ބުނީ، ހުޅުމާލެ، ފޭސް 1، ކާނި މަގު އަދި އުނިގަސް މަގު ހިމެނޭ ސަރަޙައްދުން މިއަދު މެންދުރުފަހު 14:00 އިން 15:00 އާއި ދެމެދު ކަރަންޓު ކެނޑުމަކީ އެކަށީގެންވާ ކަމެއް ކަމަށެވެ.

ސްޓެލްކޯއިން ވަނީ މިކަމާއި ގުޅިގެން ދިމާވެދާނެ ދަތިތަކަށް އާއްމުންގެ ކިބައިން މައާފަށް އެދިފައެވެ.

ފާހަގަކޮށްލެވޭ ގޮތުގައި، ސްޓެލްކޯއިން އަންނަނީ ކަރަންޓުގެ ޚިދުމަތުގެ ދެމެހެއްޓެނިވިކަން އިތުރަށް ކަށަވަރުކޮށް މާލޭގެ މަތިވަމުންދާ ޑިމާންޑާއި އެއްވަރަށް ޚިދުމަތް ފޯރުކޮށްދިނުމަށާއި ޕީކް ސީޒަނަށް ތައްޔާރުވުމުގެ ގޮތުން އެ ކުންފުނީގެ ކަރަންޓުގެ ވިއުގަ އަޕްގްރޭޑް ކުރުމުގެ މަސައްކަތް ކުރަމުންނެވެ.

މިގޮތުން އެ ކުންފުނިން ވަނީ، މާލޭގެ މަޖީދީމަގާއި ސޯސަންމަގު ގުޅޭ ކަންމަތީގައި ގާއިމްކޮށްފައިވާ ސަބްސްޓޭޝަނުގެ ކެޕޭސިޓީ އިތުރުކުރުމަށް، އެތަނުގައި ބަހައްޓާފައި ހުރި 630 ކޭވީއޭގެ ޓްރާންސްފޯމަރެއް އެތަނުން ނަގައި، 1500 ކޭވީއޭގެ ޓްރާންސްފޯމަރެއް ބަހައްޓާފައެވެ.

ސްޓެލްކޯއިން ބުނީ، މާލޭގެ ކަރަންޓުގެ ޑިމާންޑާއި އެއްވަރަށް ކޭޓަރ ކުރުމަށް، ޑިސްޓްރިބިއުޝަން ވިއުގައިގެ ކެޕޭސިޓިީ އިތުރުކުރުމަށް ގިނަ މަސައްކަތްތަކެއް މިއަހަރުގެތެރޭ ކުރުމަށް ހަމަޖެހިފައިވާކަމަށެވެ.