މާލީ ވުޒާރާގެ ސިސްޓަމްގައި އެކައުންޓް ނުކޮށް އޮތް 2 ބިލިއަން ރުފިޔާގެ މައްސަލަ އޮޑިޓަރ ޖެނެރަލް އަށް ހުށަހަޅާފައިވާކަމަށް ބަންޑާރަނައިބު އަހުމަދު އުޝާމް ވިދާޅުވެއްޖެއެވެ.

މިއަދު ރައީސުލްޖުމްހޫރިއްޔާގެ އޮފީހުން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅުދައްކަވަމުން އުޝާމް ވިދާޅުވީ، ގާނޫނު އަސާސީގައި ބުނާގޮތުން ރައްޔިތުންގެ މަޖިލީހުން ފާސްކުރުމަށް ފަހު ނޫނީ ދައުލަތުގެ ބަޖެޓުން ހަރަދު ނުކުރެވޭނެކަމަށާއި، ހަރަދު ކުރުމަށްފަހު ބަޖެޓް ސަޕްލިމެންޓް ކުރުމަށްޓަކައި ހުށަހެޅުމަކީ ގާނޫނު އަސާސީ އާއި ހިލާފުކަމެއް ކަމަށެވެ.

2020 އިން ފެށިގެން 2023 ވަނަ އަހަރާއި ހަމައަށް ބަޖެޓް ހުށަހެޅިއިރު، ކަންތައްތައް ކޮށްފައި އޮތީ މިފަދައިން ކަމަށާއި، އެކަމާއި ގުޅިގެން އޭރުގެ މަޖިލީހުގެ ރިޔާސަތުންވެސް ވަރަށް ގިނަ ފަހަރަށް މި މައްސަލައާއި ގުޅޭ ގޮތުން ވާހަކަދެއްކެވިކަމަށް އުޝާމް ވިދާޅުވިއެވެ.

އުޝާމް ވިދާޅުވީ، ތަކުރާރުކޮށް ވޭތުވެދިޔަ ދެތިން ހަތަރު އަހަރުގެ ތެރޭގައި އެކަން ކުރަމުން އައިސް، މިއަހަރާއި ހަމައަށް އައިރު، ގާތްގަނޑަކަށް 2 ބިލިއަން ރުފިޔާ މާލީ ވުޒާރާގް ސިސްޓަމްގެ ތެރެއިން އެކައުންޓް ނުކުރެވި އޮތް ކަމަށެވެ.

މިއާއިއެކު، މި މައްސަލަ އޮޑިޓަރ ޖެނެރަލް އަށް ހުށަހަޅާފައިވާކަމަށާއި، މިކަމާއި ގުޅޭ ރިޕޯޓެއް ކުރިއަށް އޮތް ދެތިން ހަފްތާގެ ތެރޭގައި ފޯރުކޮށްދޭނެ ކަމަށް އޮޑިޓަރ ޖެނެރަލް ވިދާޅުވިކަމަށް ވެސް އުޝާމް ވިދާޅުވިއެވެ.

މި މައްސަލައިގައި އިތުރަށް ކުރިއަށްދާނެ ގޮތް ނިންމާނީ އޮޑިޓަރ ޖެނެރަލް ގެ ރިޕޯޓް ލިބުމުންކަން ފާހަގަކުރައްވަމުން އުޝާމް ވިދާޅުވީ، ގާނޫނާއި ހިލާފަށް ކަންތައްތަކެއް ކޮށްފައި ހުރި ކަމަށާއި، މި ފަރާތްތަކުގެ މައްސަލަތައް ބަލައި، ގާނޫނީ ގޮތުން އަޅަން ޖެހޭ ފިޔަވަޅުތައް އަޅުއްވާނެ ކަމަށެވެ.

މިފަދަ ކަންކަން ތަކުރާރު ނުވުމަށްޓަކައި ގާނޫނަށް ގެންނަންޖެހޭ އިސްލާހުތައް ގެންނާނެކަމުގެ ޔަގީންކަން އުޝާމް ވަނީ ދެއްވާފައެވެ.