މި ސަރުކާރުން އަންނަ އަހަރު ކުރީ ކޮޅު ޓެކްސްއަށް އިތުރު ބަދަލުތަކެއް ގެންނާނެކަމަށް ގަބޫލުކުރެވޭކަމަށް ނިމިދިޔަ ސަރުކާރުގެ މާލީ ވަޒީރު، އިބްރާހިމް އަމީރު ވިދާޅުވެއްޖެއެވެ.

އަމީރު މިފަދައިން ވިދާޅުވީ، އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުންނެވެ.

މިގޮތުން އަމީރު ވިދާޅުވީ، ސަރުކާރުގެ އާމްދަނީގެ ސިޔާސަތާއި މެދު އެންމެންގެ އިތުބާރު ގެއްލިފައިވާކަމަށާއި، 2024 ވަނަ އަހަރުގެ އޭޕްރިލް މަހު މީޑިއަމް ޓާމް ރެވެނިއު ސްޓްރެޓެޖީއެއް ސަރުކާރުން އިއުލާނު ކުރި ކަމަށެވެ.

Advertisement

މިއީ ކުރިއަށް އޮތް 5 އަހަރު ދައުލަތުގެ އާމްދަނީ އަށް ގެންނާނެ ބަދަލުތައް މުއާސަލާތުކޮށްދޭ ވަސީލަތެއް ކަމަށާއި، މީގައި އިންވެސްޓަރުންނާއި ބޭރުގެ މާކެޓްތަކާއި އެނޫންވެސް އެހެން ފަރާތްތަކަށް ޓެކްސް ޕޮލިސީ އަށް ގެންނާނެ ބަދަލުތައް ހިމަނާފައިވާކަމަށް އަމީރު ވިދާޅުވިއެވެ.

އެހެންނަމަވެސް، ދެ މަސްފަހުން ފެނުނީ އެ ސްޓްރެޓެޖީ "ބޮލާލައި ޖަހައި"، އާމްދަނީގެ އައު ފިޔަވަޅުތަކެއް ހާމަކުރިތަން ފެނިގެންދިޔަކަން ފާހަގަކުރައްވަމުން އަމީރު ވިދާޅުވީ، އޭގެ ތެރޭގައި ޑްރެޖިން ފީ އިއުލާނުކުރުމާއި، ޓީޖީއެސްޓީ ރޭޓް ބޮޑުކުރުމަށް ހުށަހެޅުން ހިމެނޭކަމަށެވެ.

ހަމައެއާއިއެކު، އަމީރު ވިދާޅުވީ، މިދިޔަ ހޮނިހިރު ދުވަހު ރައީސުލްޖުމްހޫރިއްޔާގެ އޮފީހުން ބޭއްވި ޕްރެސް ކޮންފަރެންސްގައި ބަންޑާރަ ނައިބު އަހުމަދު އުޝާމް، ބަޖެޓް ގެ ކުރިން އާމްދަނީގެ އިތުރުކަމެއް ސަރުކާރުން ނިންމައިފިނަމަ، އެކަންވެސް މިދައުރުގައި ހުށަހަޅުއްވާނެކަމަށް ވިދާޅުވިކަމަށެވެ.

މިއާއިއެކު، އަމީރު ވަނީ ބަޖެޓް ހުށަހަޅަން 10 ދުވަހަށް ވީއިރުވެސް، އާމްދަނީގެ ސިޔާސަތު ކަނޑައަޅާ ނުނިމެނީތޯ އަމީރު ވަނީ ސުވާލު އުފައްދާފައެވެ.

މީގެ އިތުރުންވެސް އަމީރު ވަނީ ވިޔަފާރިވެރިިންނާއި އިންވެސްޓަރުން ސަރުކާރަށް ކުރި އިތުރބާރު ގެއްލިފައިވާކަމަށް ވެސް ވިދާޅުވެފައެވެ.