ކޮރަޕްޝަންގެ ކުށް ސާބިތުވެ، ޕެރޫގެ ކުރީގެ ރައީސް އަލެޖާންޑްރޯ ޓޮލެޑޯއަށް 20 އަހަރަށްވުރެ ގިނަ ދުވަހުގެ ޖަލު ޙުކުމެއް އިއްވައިފިއެވެ.

ޓޮލެޑޯއަށް މި ޙުކުމް އިއްވާފައިވަނީ ބްރެޒިލްގެ ކޮންސްޓްރަކްޝަން ކުންފުންޏެއްގެ ފަރާތުން ހައިވޭ އެޅުމުގެ މަސައްކަތް ހަވާލުކުރުމަށް 35 މިލިއަން ޑޮލަރުގެ ރިޝްވަތު ނެގުމުގެ ކުށުގައެވެ. އޭނާގެ މައްޗަށް ވަނީ 20 އަހަރާއި 6 މަހުގެ ޖަލު ޙުކުމެއް އިއްވާފައެވެ.

އުމުރުފުޅުން 78 އަހަރުގެ ޓޮލެޑޯ 2001 އިން 2006 އަށް ޕެރޫގެ ރައީސްކަން ކުރެއްވިއިރު، އޭނާގެ މައްޗަށް އިއްވި މި ހުކުމަކީ އޮޑެބްރެޗްޓްގެ ފަރާތުން ސިޔާސީ ފަރާތްތަކަށް ރިޝްވަތު ދިނުމުގެ ކެމްޕޭނާ ގުޅިގެން މިހާތަނަށް އިއްވާފައިވާ އެންމެ ހަރުކަށި އެއް ހުކުމެވެ.

އެއް އަހަރު ދުވަހަށް ދެމިގެންދިޔަ މި ޝަރީޢަތުގައި، އެގައުމުގެ ޕްރޮސިކިއުޓަރުން އޭނާގެ މައްޗަށް ކުރި މަނީ ލޯންޑަރިންގ އަދި ގުޅިގެން މަކަރު ހެދުމުގެ ދަޢުވާތައް ޓޮލެޑޯ ދިޔައީ އަބަދުވެސް ދެކޮޅު ހަދަމުންނެވެ.

މި މައްސަލައާއި ގުޅިގެން އޭނާ ފުރަތަމަ ހައްޔަރުކުރެވުނީ 2019 ގައި އެމެރިކާގައެވެ. އެއީ ޕެރޫއިން އޭނާ އެކްސްޓްރަޑައިޓް ކުރުމަށް އެދުމުންނެވެ. އަދި އެތައް އަހަރެއްގެ ޤާނޫނީ ބަހުސްތަކަކަށްފަހު 2022 ގައި އޭނާ ޕެރޫއަށް ފޮނުވާލެވުނެވެ.

ޓޮލެޑޯ އޭނާގެ ޙުކުމް ތަންފީޒުކުރުމަށް ހަމަޖެހިފައިވަނީ ޕެރޫގެ ވެރިރަށް ލިމާގެ ބޭރު ސަރަޙައްދެއްގައި، ކުރީގެ ރައީސުން ބޭތިއްބުމަށް ޚާއްޞަކޮށް އިމާރާތްކުރެވިފައިވާ ޖަލެއްގައެވެ.

ޓޮލެޑޯގެ އިތުރުންވެސް، އެގައުމުގެ އިތުރު ދެ ކުރީގެ ރައީސުން ކަމުގައިވާ ޕެޑްރޯ ޕާބްލޯ ކުޗިންސްކީ އަދި އޮލަންޓާ ހުމާލާ ވެސް އޮޑެބްރެޗްޓާ ގުޅުންހުރި މިފަދަ މައްސަލަތަކަކާއި ގުޅިގެން ތަހުގީގުކުރަމުންދާކަން ފާހަގަކޮށްލަން ޖެހެއެވެ.