ދިރުވާލައިގެން ރާއްޖެއަށް މަސްތުވާތަކެތީގެ ބާވަތެއް ކަމަށްވާ ކޮކެއިން އެކުލެވޭ 108 ބުލެޓް އެތެރެކުރި މީހެއްގެ މައްޗަށް ކްރިމިނަލް ކޯޓުން 12 އަހަރުގެ ޖަލު ހުކުމެއް އިއްވައިފިއެވެ.

މި މައްސަލައިގައި ޖަދުވަލު އެކެއްގައިވާ މަސްތުވާއެއްޗެއް ރާއްޖެއަށް އެތެރެ ކުރުމުގެ ކުށުގެ ދައުވާކޮށް، ކްރިމިނަލް ކޯޓުން ޖަލު ހުކުމް އިއްވާފައިވަނީ އައްޕިއަހް ޖޭމްސް ނަމަކަށް ކިޔާ ގާނާއަށް ނިސްބަތްވާ މީހެއްގެ މައްޗަށެވެ.

ކްރިމިނަލް ކޯޓުން ކުރި ހުކުމްގައިވާ ގޮތުން، މީނާ ގަތަރު އެއާވޭސްގެ ފްލައިޓަކުން ޖޫން 12 ގައި ރާއްޖެ އައުމުން އޭނާ ހައްޔަރުކުރީ ކަސްޓަމު އޮފިސަރުންނަށް ޝައްކު ކުރެވޭ ކަންތައްތަކެއް ފާހަގަ ކުރެވި، ސްކޭން ކުރިއިރު ދިރުވާލައިގެން މަސްތުވާތަކެތި އެތެރެ ކޮށްފައިވާ ކަމަށް ޝައްކު ކުރެވިގެން، އައިޖީއެމްއެޗްއަށް ގޮސް ހެދި އިތުރު ސްކޭންތަކަށްފަހު އެވެ.

އެއަށްފަހު އޭނާ ފުލުހުންގެ ބެލުމުގެ ދަށުގައި ހުރިއިރު، އެކި ފަހަރުމަތިން ބޮޑުކަމުދިޔަ ތަކެތިން  108 ބުލެޓުގެ ބަރުދަނުގައި  1461.9389 ގްރާމް ގެ ކޮކެއިން ހުރި ކަމަށް ތަހުލީލު ރިޕޯޓްތަކުން ދެއްކިކަމަށް ވެސް ކްރިމިނަލް ކޯޓުގެ ހުކުމްގައިވެއެވެ.

ދައުލަތުގެ ފަރާތުން އޭނާގެ މައްޗަށް ކުރި ދައުވާއަށް އޭނާ އިއުތިރާފުވުމުން، ދައުލަތާ އެކު އޭނާ ވަނީ އިއުތިރާފްގެ އެއްބަސްވުމެއް ހަދައިފަ އެވެ.

އިއުތިރާފް އެއްބަސްވުމުގެ ދަށުން އޭނާގެ މައްޗަށް އަދަބެއްގެ ގޮތުގައި 12 އަހަރާއި ހަ މަސް ދުވަހުގެ ޖަލު ހުކުމަކާއި އެކު ޖޫރިމަނާގެ ގޮތުގައި 100،000ރ. އިން ދެއްކުމަށް ވަނީ ކަނޑައަޅާފައެވެ.

އެއާއިއެކު، ކްރިމިނަލް ކޯޓުން ވަނީ، އޭނާ ތަހުގީގުގެ މުއްދަތަށް ބަންދުގައި ހުރި ހަތަރު މަހާއި 10 ދުވަސް އުނި ކުރުމަށްފަހު އޭނާގެ މައްޗަށް އިއްވީ 12 އަހަރާއި އެއް މަހާއި 20 ދުވަހުގެ ޖަލު ހުކުމެއް އިއްވާފައެވެ.

ހަމައެއާއިއެކު، ޖޫރިމަނާގެ ފައިސާ 1 އަހަރުގެ ތެރޭގައި ދެއްކުމަށް ވެސް އޭނާގެ މައްޗަށް ކްރިމިނަލް ކޯޓުން ވަނީ އަމުރުކޮށްފައެވެ.