ރޭގައި ހިނގާދިޔަ ނުރައްކާތެރި ލޯންޗް އެކްސިޑެންޓްގައި އަނިޔާވި 12 މީހުންގެ ތެރެއިން 2 މީހުން ފިޔަވާ އެންމެން ފަރުވާއަށް ފަހު ދޫކޮށްލައިފިއެވެ.

ގުޅީފަޅު ކައިރިން ދެ ލޯންޗެއް ޖެހި އެކްސިޑެންޓެއް ހިނގާފައިވަނީ ރޭގެ 19:34 ހާއިރުއެވެ. މި އެކްސިޑެންޓްގައި އަނިޔާވި 12 މީހަކު އައިޖީއެމްއެޗް އަށް ގެންދިޔަކަމަށާއި، އެއްވެސް މީހެއްގެ ހާލު ސީރިއަސް ނޫންކަމަށް ހޮސްޕިޓަލުން މައުލޫމާތުދީފައިވާކަމަށް ފުލުހުން ވަނީ ރޭގައި ހާމަކޮށްފައެވެ.

މިހާދިސާގައި އަނިޔާވި މީހުންގެ ތެރެއިން 2 މީހަކަށް އެމަޖެންސީގައި ފަރުވާދެމުންދާކަމަށް އައިޖީއެމްއެޗުން ބުނި ނަމަވެސް، އެމީހުންނަށް ލިބިފައިވާ އަނިޔާތަކުގެ ތަފްސީލް ހޮސްޕިޓަލުން ހާމަކޮށްފައެއް ނުވެއެވެ.

Advertisement

ވޮއިސްއަށް މައުލޫމާތު ހިއްސާކުރަމުން ކޮއްދިއްޕަރު ލޯންޗުން ދަތުރުކުރި މީހަކު ބުނީ، ސެނޯރާ ލޯންޗު އައިސް އެ ލޯންޗުގައި ޖެހުމާއެކު ގޮނޑިތަކުގައި ތިބި މީހުން އެކި ތަންތަނަށް ވިއްސައިގެން ދިޔަ ކަމަށެވެ. އެއްވެސް މީހަކަށް ސީރިއަސް އަނިޔާތަކެއް ނުލިބުނު ނަމަވެސް ބައެއް މީހުންގެ ލޮލަށް ވިންޑް ސްކްރީން ތަޅައިގެން ދިއުމުގެ ސަބަބުން އެތިކޮޅުތައް ހެރިފައިވާކަމަށް އޭނާ ބުންޏެވެ. އަދި ބައެއް މީހުންގެ ނޭފަތާއި އަނގަމަތި ފަޅައިގެން ގޮސްފައިވާކަމަށްވެސް އޭނާ ބުންޏެވެ. 

"ވަގުތުގެ ގޮތުން ގިނަ މީހުން ތިބީ ނިދިޖެހިފައި. އެހެން ތިއްބައި ލޯންޗު އައިސް ޖެހުނީ. ގިނަ މީހުންނަށް އަނިޔާވީ ނޭނގި ތިއްބައި ޖެހުމުން" ކޮއްދިއްޕަރު ރިސޯޓް ލޯންޗުގައި އިން ރިސޯޓްގެ ސްޓާފަކު ވޮއިސް އާ ވާހަކަދައްކަމުން ބުންޏެވެ.

ރޭގައި އެކްސިޑެންޓުވި އެއް ލޯންޗަކީ ކޮއްދިއްޕަރު ޕީކޭޑީ-10 ނަމަކަށް ކިޔާ ލޯންޗެކެވެ. އަނެއް ލޯންޗަކީ ސެނޯރާ ނަމަކަށް ކިޔާ ލޯންޗެކެވެ.

ފުލުހުން އަންނަނީ މި މައްސަލަ ތަހުގީގުކުރަމުންނެވެ.