ހަފްތާ 14 ގެ ދަށުން ސަރުކާރުގެ އެހީގައި ބޯންމެރޯ ޓްރާންޕްލާންޓް ހެދުމަށް ފުރި 14 ކުދިންގެ ތެރެއިން 3 ކުއްޖަކު އެ ފަރުވާ ފުރިހަމަކޮށްފައިވާކަމަށް މޯލްޑިވިއަން ބްލަޑް ސަރވިސަސްއިން ބުނެފިއެވެ.
ދައުލަތުގެ މީޑިއާ، ޕީއެސްއެމްގެ "ރާއްޖެ މިއަދު" ޕްރޮގްރާމްގައި ވާހަކަފުޅު ދައްކަވަމުން މޯލްޑިވިއަން ބްލަޑް ސަރވިސަސްގެ އެސޯސިއޭޓް ސްޕެޝަލިސްޓް އިން ޕީޑިއަޓްރިކް ޑރ.އަޙުމަދު ޢުމަރު ވިދާޅުވީ، ޒަކާތު ފަނޑުގެ އެހީގައި މިއަހަރު 14 ކުއްޖަކު ފަރުވާއަށް ގޮސްފައިވާކަމަށެވެ.
ޑރ.ޢުމަރު ވިދާޅުވީ، ފަރުވާ މުޅިން ފުރިހަމަކޮށް ދެ ކުއްޖަކު މިހާރު ރާއްޖެ އައިސްފައިވާކަމަށާއި، އިތުރު ކުއްޖަކުވެސް ފަރުވާ ފުރިހަމަކޮށް، ކުރިއަށް އޮތް ދެ ހަފާތްތާގެ ތެރޭގައި ރާއްޖެ އަންނާނެކަމަށެވެ.
މީގެ އިތުރުންވެސް ޑރ.ޢުމަރު ވިދާޅުވީ، ބޯންމެރޯ ހެދުމަށް މިއަހަރު ފޮނުވި 1 ކުއްޖަކު މިދިޔަ ހަފްތާ ނިޔާވެފައިވާކަމަށާއި، މި ފަރުވާ ހޯދަމުންދާ 10 ކުދިން ބޯންމެރޯ އޮޕަރޭޝަނަށްފަހު އިތުރު ފަރުވާ ފުރިހަމަކުރަމުންދާކަމަށެވެ.
"ހިތާމައާއެކު ފާހަގަކުރަން، ބޯންމެރޯއަށް ފޮނުވި 1 ކުއްޖަކު މިދިޔަ ހަފްތާގައި ނިޔާވީ. ދެން ތިބި ހުރިހާ ކުދިންވެސް ފަރުވާ މުޅިން ފުރިހަމަކޮށް ކުރިއަށް އޮތް ނޮވެމްބަރު،ޑިސެމްބަރު މަސްތެރޭ ރާއްޖެ އަންނާނެ."
ޑރ.އަޙުމަދު ޢުމަރު ވިދާޅުވިއެވެ.
ޒަކާތު ފަންޑުގެ އެހީގައި ކޮންމެ އަހަރަކު 10 ކުދިން، ބޯންމެރޯ ހެދުމަށް ފޮނުވުމަށް ސަރުކާރުން ނިންމާފައިވާއިރު، މީގެތެރެއިއް އަންނަ އަހަރު މިފަރުވާއަށް ފޮނުވާ ކުދިން ކަނޑައެޅުމުގެ މަސައްކަތްތައް މިހާރު ފަށާފައިވާކަން ސަރުކާރުން ވަނީ ހާމަކޮށްފައެވެ.
Advertisement
This content is created and paid for by advertisers and does not involve Voice Journalists
