ލުބުނާނަށް އެހީވުމަށް ފްރާންސްގެ ވެރިރަށް، ޕެރިހުގައި ބޭއްވުނު ބައިނަލްއަޤްވާމީ ޖަލްސާއެއްގައި އިންސާނީއެހީ އާއި އަސްކަރީ އެހީގެ ގޮތުގައި ލުބުނާނަށް 1 ބިލިއަން ޑޮލަރު ހަދިޔާކުރުމަށް 70 އަށްވުރެ ގިނަ ގައުމުގެ އިތުރުން ބައިނަލްއަޤްވާމީ ޖަމްޢިއްޔާތަކުން އެއްބަސްވެއްޖެއެވެ.

މިއީ، ލުބުނާނުގައި އިސްރާއީލުން ހިންގަމުން އަންނަ ލާއިންސާނީ އުދުވާނާއި ގުޅިގެން، 1 މިލިއަން މީހުން ގެދޮރު ދޫކޮށް ދާން މަޖުބޫރުވެ، 2،500 އަށްވުރެ ގިނަ މީހުންގެ ފުރާނަ ގެއްލުމުގެ އިތުރުން އެގައުމުގެ އިޤްތިޞާދީ ޙާލަތު އިތުރަށް ދަށްވުމާއިގުޅިގެން ނިންމި ނިންމުމެއްކަމަށް މި ޖަލްސާ އިންތިޒާމް ކުރި ފްރާންސުން ބުންޏެވެ. 

މި ޖަލްސާ ނިންމާލަމުން ފަރަންސޭސި ޚާރިޖީ ވަޒީރު ޖީން-ނޮއެލް ބަރޯ ވިދާޅުވީ އިންސާނީ އެހީގެ ގޮތުގައި 800 މިލިއަން ޑޮލަރު އަދި އަސްކަރީ އެހީގެ ގޮތުގައި، 200 މިލިއަން ޑޮލަރާއިއެކު، ލުބުނާނަށް އެހީވުމަށް ޖުމްލަ 1 ބިލިއަން ޑޮލަރު ހޯދިފައިވާކަމަށެވެ.

ފްރާންސުން އެކަނިވެސް 100 މިލިއަން ޑޮލަރުގެ އެހީއެއް ލުބުނާނަށް ދިނުމަށް ނިންމާފައިވާއިރު، މި ޖަލްސާގައި ފްރާންސްގެ ރައީސް އެމެނުއެލް މެކްރޯން ވަނީ ވީހާވެސް ބޮޑު އަދަދަކުން ލުބުނާނަށް އެހީވުމަށް ގޮވާލައްވާފައެވެ.

މިއާއިއެކު އެމެރިކާއިން ގާތްގަނޑަކަށް 300 މިލިއަން ޑޮލަރުގެ އެހީއާއި، ލުބުނާނުގެ އިތުރުން، އަވައްޓެރި ސީރިއާއަށް ޖުމްލަ 96 މިލިއަން ޔޫރޯގެ އިންސާނީ އެހީ ދިނުމަށް ވަނީ ނިންމާފައެވެ. 

މީގެ އިތުރުން، އިޓަލީއިން ވެސް ވަނީ ލުބުނާނަށް 10.8 މިލިއަން ޑޮލަރު އެހީ ދޭން ނިންމާފައިވާކަން އިއުލާނުކޮށްފައެވެ.

ލުބުނާނަށް އިންސާނީ އެހީގެ ގޮތުގައި 426 މިލިއަން ޑޮލަރު ބޭނުންވާނެކަމަށް މީގެ ކުރިން އދ. އިން ވަނީ ހާމަކޮށްފައެވެ.

ހައްދުފަހަނައަޅާފައިވާ އިސްރާއީލުން ލުބުނާނަށް އަމާޒުކޮށް ދެމުންގެންދާ ހަމަލާތައް ވަރުގަދަކޮށްފައިވާއިރު، ގާތްގަނޑަކަށް 800،000 މީހުން ވަނީ ގެދޮރު ދޫކޮށް ދާން މަޖުބޫރުވެފައެވެ. މީގެ ތެރެއިން ގިނަ ބަޔަކު މިހާރު ތޮއްޖެހިފައިވާ ހިޔާވަހިކަމުގެ މަރުކަޒުތަކުގައި ތިބިއިރު، އަނެއްބައި މީހުން ވަނީ ސީރިއާގެ ބޯޑަރު ހުރަސްކޮށްފައެވެ.

މިއާއެކު ގެދޮރު ދޫކޮށް ދާން މަޖުބޫރުވެފައިވާ މީހުންގެ އަދަދު 1.4 މިލިއަނަށް ވުރެ ގިނައިރު، މީގެ ތެރޭގައި 500،000 ކުޑަކުދިން ހިމެނެއެވެ.