ދިވެހިރާއްޖޭގެ ޤައުމީ ޔުނިވަރސިޓީގެ ފެކަލްޓީ އޮފް ހެލްތު ސައިންސުގެ ކެންޓީނު ކުރިން ހިންގި ކުންފުންޏަކުން، ކުލީގެ ގޮތުގައި 1.8 މިލިއަނަށްވުރެ ގިނަ ރުފިޔާ ނުދީ އެބައޮތްކަމަށް ދައުލަތުގެ އޮޑިޓަރ ޖެނެރަލް ވިދާޅުވެއްޖެއެވެ.

އޮޑިޓަރ ޖެނެރަލް ނިޔާޒީ ސޮއިކުރައްވައި، ނެރެފައިވާ ޤައުމީ ޔުނިވަރސިޓީގެ 2021 ވަނަ އަހަރުގެ މާލީ ބަޔާންތަކުގެ އޮޑިޓް ރިޕޯޓްގައި ބުނެފައިވަނީ، އެފްއެޗްއެސްގައި ޤާއިމްކޮށްފައިވާ ކެންޓީނު ކުއްޔަށް ދިނުމަށް ޔުނިވަރސިޓީ އާއި ކުންފުންޏާއެކު، 2015 ވަނަ އަހަރުގެ އޭޕްރލްމަހުގެ 26 ވަނަ ދުވަހު އެއްބަސްވުމެއްގައި ސޮއިކޮށްފައި ވާކަމަށެވެ. މި އެއްބަސްވުމުގެ މުއްދަތެއްގެ ގޮތުގައި ދީފައިވަނީ، 2020 ވަނަ އަހަރުގެ މެއިމަހުގެ 15 ވަނަ ދުވަހުގެ ނިޔަލަށެވެ.

އޮޑިޓް ރިޕޯޓްގައި ބުނެފައިވަނީ އެއްބަސްވުމުގެ މުއްދަތު ހަމަވެ، ދެ މަސްދުވަސް ވެފައިވަނިކޮށް ކޮވިޑް 19 އާ ގުޅިގެން ތިން މަހެއްގެ ކުލި މައާފްކޮށްދީފައިވާއިރު، އިތުރު ތިން މަހެއްގެ ކުލިން 16،200 ރުފިޔާގެ ޑިސްކައުންޓެއް ދީފައެވެ. ކުލި މާފްކޮށްދީފައިވަނީ 2020 ވަނަ އަހަރުގެ ޖުލައިމަހުގެ 16 ވަނަ ދުވަހު ފޮނުވި ސިޓީއަކުންނެވެ. އަދި ކުއްޔަށް ޑިސްކައުންޓްވެސް ދީފައިވަނީ ހަމަ އެ ތާރީހުގައެވެ

Advertisement

އޮޑިޓް ރިޕޯޓްގައި ބުނެފައިވަނީ، ކެންޓީނު ހިންގުމަށް ދީފައިވާ މުއްދަތު 2020 ވަނަ އަހަރުގެ މެއިމަހުގެ 15 ވަނަ ދުވަހަށް ހަމަވިއިރު، އެއްބަސްވުން އިތުރުކޮށް ނުވަތަ އައުކޮށްދިން ކަމަކަށް އެއްވެސް ލިޔެކިޔުމަކުން ފެންނަން ނެތްކަމަށެވެ.

އެއްބަސްވުމުގެ މުއްދަތު ހަމަވުމުން ޔުނިވަރސިޓީން ކެންޓީނު އަނބުރާ ހޯދަން މަސައްކަތްކޮށްފައި ނުވާއިރު، ކެންޓީނު ހަވާލުކޮށްފައިވަނީ 2022 ވަނަ އަހަރުގެ ޖުލައިމަހުގެ އެއްވަނަ ދުވަހުކަމަށް ޔުނިވަރސިޓީން ބުނެފައިވާކަމަށް އޮޑިޓް ރިޕޯޓުގައި ބުންޏެވެ. އެހެންކަމުން 2020 ވަނަ އަހަރުގެ މެއިމަހުގެ 16 ވަނަ ދުވަހުން ފެށިގެން 2022 ވަނަ އަހަރުގެ ޖުލައިމަހުގެ 1 ވަނަ ދުވަހާ ހަމަޔަށް ކެންޓީނު ހިންގާފައިވަނީ ދެފަރާތުގެ މެދުގައި އެއްވެސް އެއްބަސްވުމެއް ނުހަދައެވެ. 

އޮޑިޓް ރިޕޯޓްގައި ބުނެފައިވަނީ، އެ މުއްދަތުގެ ތެރޭގައި އެއް މަހުގެ ކުލި ފިޔަވައި އިތުރު އެއްވެސް މަހެއްގެ ކުލި ލިބިފައި ނުވާކަމަށާއި، އެ މުއްދަތުގެ ތެރޭގައި ކެންޓީން ކުލީގެ ގޮތުގައި 81،000 ރުފިޔާގެ ރޭޓުން 1.8 މިލިއަން ރުފިޔާ ލިބެންޖެހޭ ކަމަށެވެ.