ރާއްޖެއަށް ބިދޭސީން ގެނައުމުގެ ޚިދުމަތްފޯރުކޮށްދޭ އެކްސްޕެޓް ސިސްޓަމް ހެދި މޭލޭޝިއާގެ ބެސްޓިނެޓް ކުންފުންޏަށް ބަދަލުދޭން ލަފާ ދެއްވީ ކުރީ ސަރުކާރުގެ ބަންޑާރަނައިބު ކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވަނީ މެލޭޝިޔާގެ ބެސްޓިނެޓް ކުންފުނިން އެއްވެސް ވަރަކަށް ދައުވާ ނުކުރާކަމެއްގައި މިސަރުކާރުން ދިގު މުއްދަތެއްގައި 6.9 މިލިޔަން ރުފިޔާގެ ބަދަލެއް ދޭގޮތަށް އެކްސްޕެޓް ސިސްޓަމް ހެދުމަށް ހަވާލުކުރެވުނީ ކިހިނެއްތޯ ވަނީ ސުވާލުކުރައްވާފައެވެ.
އެ ސުވާލަށް ޖަވާބު ދެއްވަމުން އިހްސާން ވިދާޅުވީ، އައު ސަރުކާރާ ހަވާލުވިއިރު މެލޭޝިޔާގެ ބެސްޓިނެޓް ކުންފުންޏާއެކު ގާތްގަނޑަކަށް 8 ސިޓީ ބަދަލުކުރެވިފައި އޮތް ކަމަށެވެ. އަދި އެކުންފުނީގެ ލޯފާމުތަކުން ދިވެހި ދައުލަތަށް މާލީ ބަދަލު ހޯދުމަށް ދަޢުވާކުރާނެކަމަށް ހަތަރު ފަހަރު ފޮނުވާފައިވާކަމަށާއި، ކުރީ ސަރުކާރުގެ ބަންޑާރަނައިބު، އެ ކުންފުންޏަށް ބަދަލު ދިނުމުގެ މަރުހަލާ ފެއްޓެވުމަށް ލަފާ ދެއްވާފައިވާ ކަމަށްވެސް ވަޒީރު ވިދާޅުވިއެވެ.
އެބޭފުޅުންގެ ލޯފާމް ތަކުން އެބައޮތް ދިވެހި ދައުލަތަށް 4 ފަހަރު ކްލެއިމް ކޮށްފައި ފޮނުވާފައި. އަޅުގަނޑުމެން ހަވާލުވެ ބެލި ބެލުމުން އެނގުނީ އޭރުގެ އެޓާނީ ޖެނެރަލްގެ ލަފައެއް މިކަމަށް ބަދަލުދިނުމުގެ މަރުހަލާ ފެއްޓުމަށް ކަނޑައަޅުައްވާފައިއޮތް. ހަމައެއާއެކު އޭރުގެ ރައީސުލްޖުމްޙުރިއްޔާގެ އޮފީހުގެ ސިޓީފުޅެއް އެބައޮތް މިކަމާމެދު ބަދަލު ދިނުމުގެ މަރުހަލާއަކަށް ދާންޖެހިދާނެ ކަމަށް. އަދި އެގޮތަށް އަމަލު ކުރުމަށް މޯލްޑިވްސް އިމިގްރޭޝަނާއި އިކޮނަމިކް މިނިސްޓްރީގެ މައްޗަށް ފޮނުވާފައި
ވަޒީރު ޢަލީ އިޙްސާން
މިއާއެކު ވަޒީރު ވިދާޅުވީ މި މައްސަލާގައި ކަން ހިނގާފައި އޮތް ގޮތް އޮތީ ވަރަށް ބޮޑު އޮޅުމެއްގެ ތެރޭގައި ކަމަށާ، ”މިއީ އެއްވެސް ހާލެއްގައި ހަމަތާކު ކުންފުންޏެއް އޮއްވައި އެ ކުންފުނި ހޯދައިގެން“ ކުރި ކަމެއް ނޫން ކަމަށެވެ.
ދައުލަތުގެ މައްޗަށް އަޅުގަނޑުމެންނަށް އޮބިނޯންނާނަވަރުގެ، އެމީހުން އިމީޑިއޭޓްލީ ކްލެއިމްކޮށްފައި މިވަނީ 15 މިލިޔަން ޑޮލަރަށް. އަދި އެއަށްފަހުގައި އޭރުގެ އެ ކޮންޓްރެޓުގެ މުއްދަތުގެ ބާކީއަށް އޮތް އެމީހުންނަށް ގެއްލުންވާ އަދަދަށް ކްލެއިމް ކުރާނެކަމަށް ލީގަލް ޑޮކިއުމަންޓޭޝަން އޮވެފައި އޭރުގެ އެޓަރނީ ޖެނެރަލްގެ ލަފާފުޅެއްވެސް އޮވެގެން އަޅުގަނޑުމެން އަމަލުކުރި ގޮތެއް،
ވަޒީރު ޢަލީ އިހްސާން
އޭރު އެފަދައިން އޮތް ނަމަވެސް، މި ސަރުކާރުން މެލޭޝިއާގެ ބެސްޓިނެޓާއެކު ހަދާފައިވާ އައު އެއްބަސްވުމުގެ ދަށުން ދައުލަތަށް 900 މިލިޔަން ރުފިޔާ ވަންނާނެ ކަމަށާ މީގެ ކުރިން އޮތް ގޮތުން ވަންނަމުންދިޔައީ 600 މިލިޔަން ރުފިޔާ ކަން ވަޒީރު ފާހަގަކުރެއްވިއެވެ.
އެހެންވީމާ އަޅުގަނޑު ވަރަށް ބޮޑަށް އެދެން ޚައްސަކޮށް ނެޝަނަލް ސެކިޔުރިޓީއާއި ގުޅުންހުރި މިފަދަ ކަންކަމުގައި ހަގީގަތާއި އެއްގޮތަށް، މައުލޫމާތު އެނގުވަޑައިނުގަންނަވާނަމަ، މައުލޫމާތު އަޅުގަނޑުމެން ކައިރިން އެދުނީމާ ފޯރުކޮށްދޭނަން. މިފަދަ ކަންކަމުގައި ރައްޔިތުންނަށް އޮޅޭގޮތަށް މައުލޫމާތު ދިނުމަކީ އެއްގޮތަކަށްވެސް ބަލައިގަންނަ ކަމެއްނޫން. މިފަދަ ނެޝަނަލް ސެކިޔުރިޓީއާއި ގުޅުންހުރި ކަންކަމުގައި ތެދު މައުލޫމާތު ހަމަ އައްސަވާއިރަށް އަޅުގަނޑުމެން ފޯރުކޮށްދޭނަން.
ވަޒީރު ޢަލީ އިހްސާން
ބެސްޓިނެޓުން ބަލަހައްޓަމުންދިޔަ "އެކްސްޕެޓް އޮންލައިން ސިސްޓަމަކީ" ބަންގްލަދޭޝުން ރާއްޖެ އަންނަ މަސައްކަތްތެރިންގެ މެޑިކަލް އަދި އެނޫންވެސް ޚިދުމަތްތައް ފޯރުކޮށްދިނުމުގެ މަސައްކަތާގުޅޭ ނިޒާމެކެވެ. ނަމަވެސް 2019 ވަނަ އަހަރު، ބަންގްލަދޭޝުން ބިދޭސީން ރާއްޖެއަށް ގެނައުން ނިމިދިޔަ ސަރުކާރުން މެދުކަނޑާލީ އެ ޚިދުމަތްދެމުން ދިޔަ ކުންފުންޏާއި ވާހަކަދެކެވިގެން ނޫންކަން އިޙްސާން މީގެ ކުރިން ވަނީ ފާހަގަކުރައްވާފައެވެ. އެހެންކަމުން އެކުންފުންޏަށް ލިބުނު ގެއްލުމުގެ ބަދަލު ހޯދުމަށް 2022 ވަނަ އަހަރުގެ ތެރޭގައި އެކުންފުނިން ސަރުކާރަށް އަންގާފައިވާކަމަށްވެސް އޭރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
