މިދިޔަ ސަރުކާރުގައި 60 ރަށެއްގައި ޕޮލިސް ސްޓޭޝަން އަޅަން ހަވާލު ކުރި އިންޑިއާގެ އިންދިރާ ޕްރްޖެކްޓްސް ކުންފުނިން، އެ ސަރުކާރުގެ އިކޮނޮމިކް މިނިސްޓަރު ފައްޔާޒު އިސްމާއިލްގެ އާއިލީ މަސްލަހަތު އޮންނަ ބިގް ކުންފުނީގެ ހިއްސާ ގަތުމަށް ފަހު މާލޭގޭ ގަލޮޅުގައި ހުންނަ މޫނިމާގެ އިމާރާތް ކުރަމުންދާ ކަމަށް ހޯމްލޭންޑް މިނިސްޓަރު އަލީ އިހުސާން ތުހުމަތު ކުރައްވައިފި އެވެ.

މިއަދު ކުރިއަށް ދިޔަ މަޖިލީހުގެ ޖަލްސާގައި ޕީއެންސީގެ ޕާލިމަންޓްރީ ގްރޫޕުގެ ލީޑަރު، އިނގުރައިދޫ ދާއިރާގެ މެމްބަރު އިބްރާހިމް ފަލާހު ވަނީ، ޕޮލިސް ސްޓޭޝަން އެޅުމުގެ މަޝްރޫއުގެ ފައިސާއިން އޭރުގެ ހޯމް މިނިސްޓަރު އިމްރާން އަބްދުالله ހުޅުމާލެއިން ގޯތިތަކެއް ބައްލަވައިގަތް ކަމަށް ތުހުމަތު ކުރައްވާފައެވެ. އަދި އެ މަޝްރޫއާ ގުޅޭ ގޮތުން އޭނާ ވަނީ ސުވާލު ކުރައްވާފަ އެވެ. 

އެ ސުވާލަށް ޖަވާބު ދެއްވަމުން އިހުސާން ވިދާޅުވީ، އިންދިރާ ޕްރިޖެކްޓް، އޭރުގެ އިކޮނަމިކް މިނިސްޓްރީގެ ދަށުގައި ގާތްގަނޑަކަށް ދެ އަހަރު ދުވަސް ވަންދެން އޮތް ކަމަށެވެ.

މިއާއެކު ވަޒީރު ވިދާޅުވީ، މަޝްރޫއާ ހަވާލުވުމަށް ފަހު، އިންދިރާއިން އެންމެ ފުރަތަމަ ވެސް ސަރުކާރުގައި އެދިފައިވަނީ އެ ލޯނުގެ %15 ދިނުމަށް ކަމަށެވެ.  އަދި ލިޔެކިޔުން ތަކުން ފެންނަން އޮތް ގޮތުން ސަރުކާރުން ވަނީ އެ ކުންފުންޏަށް 3.6 މިލިއަން ޑޮލަރު ދީފައި ކަމަށްވެސް އިހްސާން ވިދާޅުވިއެވެ. 

އިހްސާން އިތުރަށް ވިދާޅުވީ، އެ ކުންފުނިން ދެން ރާއްޖޭގައި ކުރަމުންދަނީ ކޮން މަސައްކަތެއްތޯވެސް ސަރުކާރުން ބަލާފައިވާ ކަމަށެވެ. އަދި އެ ބެލި ބެލުމުން އެނގުނު ގޮތުގައި ރާއްޖޭގެ ބިގް ނަމަކަށް ކިޔާ ކުންފުނީގެ ޝެއާ، އެ ކުންފުނިން ގަނެގެން މިހާރު ގަލޮޅު މޫނިމާގެ ކިޔާ ގެއެއް ހަދަމުންދާ ކަމަށެވެ. 

ބިގް ކުންފުނީގެ ވެރިންގެ ތެރޭގައި އެމްޑީޕި ޗެއާޕާސަން ފައްޔާޒުގެ ބޭބެ އަދި ރައީސް އޮފީހުގެ ކުރީގެ ކޮމިނިކޭޝަންސް ޑިރެކްޓަރު ހަސަން އިސްމާއިލް ހިމެނިވަޑައިގަންނަގަ އެވެ. 2014ގެ މަޖިލިސް އިންތިހާބުގެ ކުރިން ބިގް ކުންފުނީގައި، އެމްޑީޕީގެ ފައްޔާޒުގެ ހިއްސާ ވެސް އޮތެވެ. ނަމަވެސް، އެ އިންތިޚާބާ ދިމާކޮށް އޭނާ ވަނީ އެ ހިއްސާ އޭރު ދޫކޮށްލައްވާފައެވެ.

މީގެ ކުރިން އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި މި މައްސަލައާ ގުޅޭ ގޮތުން ނޫސްވެރިޔަކު ކުރި ސުވާލަކަށް ޖަވާބުދެއްވަމުން ފައްޔާޒް ވަނީ އެ ތުހުމަތުތަކަށް އިންކާރުކުރައްވާފައެވެ.