ހުއްދަނެތި ރާއްޖެއަށް ގިނަ އަދަދެއްގެ ސިގިރޭޓް އެތެރެކުރި މައްސަލައިގައި ދަ ހޯކްސް ޕްރައިވެޓް ލިމިޓެޑް އިން މިކަމުގައި ބައިވެރިވި ކަމުގެ ތުހުމަތު ކުރެވޭ މުއައްޒަފުންނަށް ފިޔަވަޅު އަޅައިފިއެވެ.

ހޯކްސް އިން މިކަން ހާމަކޮށްފައިވަނީ ރާއްޖެއަށް ހުއްދަނެތި ސިގިރޭޓް އެތެރެ ކުރި މައްސަލައިގައި ހޯކްސް ގެ ބައިވެރިވުންވާކަމަށް ފެތުރެމުންދާ ރަނގަޅުނޫން ދޮގު ވާހަކަތަކާއި ރިޕޯޓުތަކާއި ގުޅިގެން ތެދު މައުލޫމާތު ސާފުކޮށްދިނުމުގެ ގޮތުން ނެރުނު ބަޔާނެއްގައެވެ.

މިގޮތުން އެކުންފުނިން ވަނީ، މި މައްސަލައާއި ގުޅިގެން ފެތުރެމުންދާ ރިޕޯޓުތަކުގައި ދަ ހޯކްސްގެ ބައިވެރިވުމާއި ގުޅިގެން ބަޔާންކޮށްފައިވަނީ ހަގީގަތެއްނެތް ދޮގު ވާހަކަތަކެއް ކަމަށް ބުނެފައެވެ.

Advertisement

އެގޮތުން، ހޯކްސްއިން ބުނީ، އެ ކުންފުނީގެ އުޅަނދެއް މެދުވެރިކޮށް ހުއްދަނެތި ރާއްޖެއަށް ސިނގިރޭޓް އެތެރެކުރާކަމުގެ އިންޓެލިޖެންސް މައުލޫމާތު ލިބުމާއި ގުޅިގެން، 25 އޮކްޓޯބަރ 2024 ވަނަ ދުވަހުގެ ރޭގަނޑު ގާތްގަނޑަކަށް 11:00 ހާއިރު، ތިލަފުށީގައި ގާއިމުކުރެވިފައިވާ ދަ ހޯކްސްގެ ބޯޓު ޔާޑަށް ފުލުހުން ހާޒިރުވިކަމަށާއި، ތިލަފުށީގައި ހުންނަ ކުންފުނީގެ ބޯޑު ޔާޑަށް ފުލުހުން ހާޒިރުވެ، ބަލައި ފާސްކޮށްފައިވަނީ ބަލާ ފާސްކުރުމުގެ އަމުރެއް ނުވަތަ ކޯޓު އަމުރެއް ނެތިކަމަށެވެ.

މި މައްސަލައިގައި، ދަ ހޯކްސްގެ މެނޭޖްމަންޓުން ފުލުހުންނަށް ދޭންޖެހޭ ހުރިހާ އެއްބާރުލުމެއްދީ ގާނޫނާއި ހިލާފު އަމަލުތަކުގައި ބައިވެރިވެ އެއަމަލުތައް ހިންގާ ފަރާތްތައް ދެނެގަނެ ހައްޔަރުކުރުމަށް ކުރަންޖެހޭ މަސައްކަތް ކުރުމަށް ފުރިހަމަ އެއްބާރުލުންދީފައިވާކަން ފާހަގަކުރަމުން އެ ކުންފުނިން ބުނީ،ފުލުހުންގެ ޓީމު ދަ ހޯކްސްގެ ބޯޓު ޔާޑަށް ވަނުމުގެ ފުރުސަތުދީ ކޯޓު އަމުރެއް ލިބެންދެން އެތަނުގައި ފުލުހުންގެ ޓީމު ހަރަކާތްތެރިވުމަށް ފުރުސަތު ފަހިކޮށްދިން ކަމަށެވެ.

މިހާދިސާ ހިނގުމާއި ގުޅިގެން ކުންފުނީގެ ފަރާތުންވަނީ މިމައްސަލަ އިދާރީގޮތުން ތަހުގީގުކުރަން ފަށާފައިވާކަމަށާއި، އޭގެ ތެރެއިން ކެމެރާ ފުޓޭޖްތައް ބެލިބެލުމުން މިހާތަނަށް ކުންފުނީގެ މުވައްޒަފުންތަކެއްގެ މައްޗަށް ޢައިރު ގާނޫނީ ހަރަކާތްތަކަކަށް ކުންފުނީގެ ރިސޯސަސް ބޭނުންކޮށް އަމިއްލަ މަންފާ ނަގަން މަސައްކަތްކޮށްފައިވާކަމުގެ ތުހުމަތުކުރެވިފައިވާކަމަށް ހޯކްސްއިން ހާމަކުރެއެވެ.

މިއާއިއެކު، ތުހުމަތު ކުރެވުނު މުވައްޒަފުންތައް ވަގުތުން މަސައްކަތުން އެކަހެރިކޮށް، ކަމާބެހޭ ތަހުގީގީ އިދާރާތަކަށް އެކަން ރިޕޯޓްކޮށްފައިވާކަމަށް ހޯކްސްއިން ބުނެއެވެ.

އެކުންފުނިން ބުނީ، މިފަދަ ޢައިރު ގާނޫނީ އަމަލުތަކުގައި ގެންގުޅޭ ސިޔާސަތަކީ ޒީރޯ ޓޮލަރެންސް ޕޮލިސީކަމަށާއި، ތަފާތު 10 ގައުމެއްގެ 900 އަށްވުރެ ގިނަ މުވައްޒަފުން ދަ ހޯކްސްގައި މަސައްކަތް ކުރަމުންދާއިރު، ކުންފުނިން އަބަދުވެސް މަސައްކަތްކޮށްފައިވަނީ މުވައްޒަފުންގެ ލާބައާއި މަންފާއަށް ކަމަށެވެ. އެހެންނަމަވެސް، ކުންފުނީގެ މަދު މުވައްޒަފުންތަކެއް ބައިވެރިވެ ކުންފުނީގެ މެނޭޖްމަންޓުން މުވައްޒަފުންނާއިމެދު ކުރި އިތުބާރާއި ޔަގީންކަން ގެއްލޭގޮތަށް ހިންގާފައިވާ މިއަމަލުން ކުންފުންޏަށް ބޮޑު ހައިރާންކަމެއް ލިބިގެން ދިޔަ ކަމަށް ހޯކްސްއިން ބުނެއެވެ.

އެގޮތުން ކުރިއަތް އޮތް ތަނުގައިވެސް ދަ ހޯކްސްގެ ރިސޯސަސް މިފަދަ ނަހަމަ ގޮތެއްގައި ބޭނުންކުރުން ހުއްޓުވުމުގެ ގޮތުން ކުންފުނީގެ އެތެރޭގެ ކޮންޓްރޯލް ހަރުދަނާކުރުމަށް އިތުރު ފިޔަވަޅުތައް އަޅާނެކަމަށް ހޯކްއިން ވަނީ ބުނެފައެވެ.

ހޯކްސް އަކީ ފައިދާކުރުވަނިވި ތެލުގެ ވިޔަފާރިކުރާ ކުންފުންޏަކަށްވާއިރު، ދުންފަތުގެ އިސްތިއުމާލު ކުރުމަށް ބޭނުންކުރާ އެއްވެސް ބާވަތެއް އެތެރެކުރުމުގެ އެއްވެސް ވިޔަފާރިއެއްގައި ބައިވެރިވުމެއް އަދި އެފަދަ އެއްވެސް ޝައުގުވެރިކަމެއް ނެތްކަމަށާއި،  މީޑިއާތަކުގައި ދެކެވޭ ވާހަކަތަކަކީ ހަގީގަތާއި ހިލާފު ވާހަކަތަކެއްކަން ފާހަގަކުރަމުން ހޯކްސްއިން ވަނީ މިފަދަ ހަބަރުތައް ރިޕޯޓުކުރުމަށް މީޑިއާތަކަށް ގޮވާލާފައެވެ.

މީގެ އިތުރުންވެސް ހޯކްސްއިން ވަނީ، މިފަދަ ކަންކަމާއި ގުޅިގެން ޒިންމާ ނަގަންޖެހޭ ފަރާތްތައް ހޯދުމަށް ކުރަންޖެހޭ އެންމެހާ ކަންތައްތައް ކުރުމަށް ގާނޫނު ތަންފީޒުކުރާ އިދާރާތަކަށް ދޭންޖެހޭ ފުރިހަމަ އެއްބާރުލުންދޭނެ ކަމުގެ ޔަގީންކަން ދީފައެވެ.