މިއަދާއި ހަމައަށް މަސްވެރިންނަށް ނުދެވި ހުރި ފައިސާގެ ޖުމުލަ އަދަދު މިހާރު މިފްކޯއާއި ހަވާލުކުރެވިފައިވާކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސް ޑރ.މުޢިއްޒު މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ.

މިގޮތުން ރައީސް ޑރ.މުޢިއްޒު ވިދާޅުވީ، މިއަދާ ހަމައަށް މަސްވެރިންނަށް ނުދެވިހުރި ފައިސާގެ ޖުމުލަ އަދަދު މިހާރު އެ ފަރާތްތަކަށް ރައްދުކުރުމަށް މިފްކޯއަށް ޙަވާލުކުރެވިފައިވާކަމަށާއި، މެނިފެސްޓޯގައިވާ ފަދައިން 48 ގަޑި އިރު ތެރޭގައި ދެމެހެއްޓެނިވި ގޮތެއްގައި ފައިސާ ދެވޭނޭ ނިޒާމު ޤާއިމު ކުރުމުގެ މަސައްކަތް ކުރެވެމުންދާކަމަށެވެ.

Advertisement

ރައީސް ޑރ.މުޢިއްޒު މިފަދައިން ވިދާޅުވިއިރު، މިއަދުގެ ރައްޔތުންގެ މަޖިލީހުގެ ޖަލްސާގައި މެންބަރުންގެ ސުވާލުތަކަށް ޖަވާބު ދެއްވަމުން މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަހުމަދު ޝިޔާމް ވެސް ވަނީ މަސްކިރުވުމަށްފަހު މަސްވެރިންނަށް މިފްކޯ އިން ދޭންޖެހޭ ފައިސާ މާދަމާ ލިބޭނެކަމުގެ ޔަގީންކަން ދެއްވާފައެވެ.

މިގޮތުން ޝިޔާމް ވަނީ މިހާރު ނުދެވި ހުރީ 16 މިލިއަން ރުފިޔާ ކަމަށާއި، އެ ފައިސާ ޖަމާ ކުރުމުގެ މަސައްކަތް ފިނޭންސުން ކުރަމުން އަންނަކަމަށް ވިދާޅުވެފައެވެ.