މަގޭ ސޯލާ ޕްރޮގްރާމުގެ ދަށުން ސޯލާ ޕީވީ ސިސްޓަމަށް އެދި ހުށަހެޅުމަށް މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވުޒާރާއިން ހުޅުވާލައިފިއެވެ.

އެވުޒާރާއިން ކުރި އިއުލާނެއްގައި ބުނީ، މަގޭ ސޯލާ ޕްރޮގްރާމަކީ އާންމު ރައްޔިތުން ކަރަންޓަށް ކުރާ ހޭދަ ކުޑަކުރުމަށާއި، ދިވެހިރާއްޖޭގައި ލިބެން ހުރި ހަކަތައިގެ ވަސީލަތްތަކުގެ ބޭނުންކުރުން އިތުރުކުރުމަށާއި، ދިވެހިރާއްޖޭގައި ބޭނުންކުރާ ކަރަންޓުގެ 33 އިން ސައްތަ އަކީ އިއާދަކުރަނިވި ހަކަތައިގެ ވަސީލަތްތައް ބޭނުންކޮށްގެން އުފައްދާ ކަރަންޓަށް ހެދުމަށް ކަނޑައަޅާފައިވާ ލަނޑުދަނޑިއަށް ވާސިލުވުމަށް އެކުލަވާލާފައިވާ ޕްރޮގްރާމެއް ކަމަށެވެ.

މި ޕްރޮގްރާމްގެ ދަށުން ސޯލާ ޕީވީ ސިސްޓަމް ފޯރުކޮށްދޭނީ ހަމައެކަނި ގޭބިސީތަކަށް ކަމަށާއި، ގޭބިސީތައް ކަނޑައަޅާނީ އާއްމުކޮށް ހުޅުވާލުމުން އެކަމަށް އެދި ހުށަހަޅާ ފަރާތްތަކުގެ ތަރުތީބުންކަމަށް އެ ވުޒާރާއިން ބުނެއެވެ.

ތިމާވެއްޓާއި ބެހޭ ވުޒާރާއިން ބުނީ، 28 އޮކްޓޫބަރު 2024 އިން ފެށިގެން އެޕްލިކޭޝަނަށް ހުޅުވާލެވޭއިރު، މި ޕްރޮގްރާމަށް އެދި ހުށަހަޅާނީ ފެނަކަ ކޯޕަރޭޝަންގެ ވެބްސައިޓް މެދުވެރިކޮށް ކަމަށެވެ. 

މި ޕްރޮގްރާމުގެ ދަށުން 748 ގޭބިސީއެއްގައި ސޯލަރ ނިޒާމު ހަރުކުރަން ނިންމާފައިވާއިރު، ކޮންމެ އަތޮޅަކަށް ލިބޭ ޖުމުލަ ސިސްޓަމްތައް އެ އަތޮޅެއްގެ ކޮންސިއުމަރުންގެ އަދަދުން ބެހިފައިވާގޮތުގެ ތަފްސީލު އެ ވުޒާރާގެ އިއުލާނުގައި ވަނީ ހިއްސާކޮށްފައެވެ.

މި އިއުލާނުގައިވާގޮތުން، މަގޭ ސޯލާ ޕްރޮގްރާމުގެ ދަށުން ސޯލާ ޕީވީ ސިސްޓަމް ހަރުކުރެވޭނެ ގޭބިސީތަކާއި، ގޭބިސީތަކަށް ދޫކުރެވޭ ސޯލާ ޕީވީ ސިސްޓަމްގެ ސައިޒު ކަނޑައަޅާނީ ނެޓް މީޓަރިންގ އުސޫލުގެ ދަށުން އެދި ފެނަކަ ކޯރޕަރޭޝަނަށް ހުށަހަޅާ ގޭބިސީތައް ސާރވޭ ކުރުމަށްފަހުއެވެ. އަދި މި ޕްރޮގްރާމުގެ ދަށުން ފޯރުކޮށްދޭ ސޯލާ ޕީވީ ސިސްޓަމަކަށް އެޑްވާންސް ޕޭމަންޓެއް ނުނެގި ނަމަވެސް ހަރުކުރުމުގެ ފީގެ ގޮތުގައި ސިސްޓަމުގެ އަގުގެ 10 އިންސައްތަގެ އަގެއް ނަގާއިރު، މި އިންސައްތައަށް ވާ ރުފިޔާ ކޮންޓްރެކްޓުގައި ސޮއިކުރާއިރު ދައްކަންޖެހޭނެކަމަށް އިއުލާނުގައިވެއެވެ.

މީގެ އިތުރުންވެސް، ތިމާވެއްޓާއި ބެހޭ ވުޒާރާއިން ބުނީ، މި ޕްރޮގްރާމުގެ ދަށުން ދޫކުރެވޭނީ 3 އަދި 5 ކިލޯވޮޓުގެ ސިންގަލް ފޭސް އަދި ތްރީ ފޭސް ސިސްޓަމްތައްކަމަށާއި، އޭގެ ތެރެއިން 3 ކިލޯވޮޓުގެ ސިސްޓަމެއްގެ އަގަކީ 45،000 ރުފިޔާކަމަށާއި، 5 ކިލޯވޮޓުގެ ސިސްޓަމެއްގެ އަގަކީ 75،000 ރުފިޔާކަމަށެވެ.

މިއާއިއެކު، މި ޕްރޮގްރާމުގެ ދަށުން ފޯރުކޮށްދޭ ސިސްޓަމްތަކަށް އަގު ނެގުމަށް ހަމަޖެހިފައިވަނީ އެއްފަހަރާ ދައްކާގޮތަށް ނުވަތަ 5 އަހަރަށް ބަހާލައިގެން އިންސްޓޯލްމަންޓު ޕްލޭނެއްގެ ދަށުންކަމަށްވާއިރު، އެއްފަހަރާ އަގު އަދާކޮށް ޚަލާޞް ކުރާގޮތަށް ނުވަތަ       މަހުން މަހަށް ދައްކާ ޚަލާޞް ކުރާގޮތަށް ދެއްކޭނެކަމަށާއި، މިފަދައިން ދައްކާނަމަ ކޮންމެ މަހެއްގެ ކަރަންޓު ބިލުގައި އެމަހަކު ދައްކަންޖެހޭ ޢަދަދު ހިމެނޭނެ ކަމަށް އެ ވުޒާރާއިން ހާމަކުރެއެވެ.

ތިމާވެއްޓާއި ބެހޭ ވުޒާރާއިން އިތުރަށް ބުނީ، މި ޕްރޮގްރާމުގެ ދަށުން ސޯލާ ޕީވީ ސިސްޓަމް ހޯދާ އެސިސްޓަމަށް މަހުން މަހަށް ކަރަންޓު ބިލުގައި ހިމަނައިގެން އަގު އަދާކުރާ ފަރާތްތަކުން އަގު ނުދެއްކުމުން އަމަލުކުރާނީ މިހާރުވެސް ކަރަންޓު ބިލު އަދާނުކުރުމުން ހިނގާ އުސޫލުކަމަށާއި، މި ޕްރޮގްރާމުގެ ދަށުން ހަރުކުރާ ސޯލާ ޕީވީ ސިސްޓަމްތައް މަރާމާތުކޮށް ބަލަހައްޓަންޖެހޭނީ އެ ސިސްޓަމެއްގެ ވެރިފަރާތުން ނުވަތަ ގޭބިސީއަކުންކަމަށެވެ.