އިންޑިއާއިން ފަލަސްތީނަށް 30 ޓަނުގެ ސިއްހީ ތަކެތީގެ އެހީ ފޮނުވައިފިއެވެ.
އިންޑިއާގެ ޚާރިޖިއްޔާއިން ބުނާ ގޮތުގައި އެގައުމުން ފޮނުވި އެހީގައި ހިމެނެނީ ކޮންމެހެން ބޭނުންވާ ބޭހުގެ ބާވަތްތަކާއި ކެންސަރު ބަލީގެ މީހުންނަށް ބޭނުންވާ ބޭހުގެ ބާވަތްތަކެވެ.
މީގެ އިތުރުން، މިދިޔަ ހަފްތާގައި އިންޑިއާއިން ވަނީ ފަލަސްތީނުގެ ރައްޔިތުންނަށް އެހީވާ އދގެ ޖަމްއިއްޔާ އަންރުވާ އަށް 30 ޓަނުގެ ބޭހާއި ކާބޯތަކެތީގެ އެހީ ފޮނުވާފައެވެ. އަދި އަންރުވާއަށް 2.5 މިލިއަން ޑޮލަރުގެ އެހީ މިދިޔަ ޖުލައި މަހު ފޮނުވާފައިވެއެވެ.
އިސްރާއީލުން ފަލަސްތީނުގެ ރައްޔިތުންނާއި ދެކޮޅަށް ހިންގަމުންދާ ޢުދުވާނުގައި ކުޑަކުދިންނާއި އަންހެނުން ހިމެނޭހެން ފަލަސްތީނުގެ 40 ހާހަށްވުރެ ގިނަ މީހުން މިހާތަނަށް ޝަހީދުކޮށްލާފައިވާއިރު، ފަލަސްތީނުގެ ޣައްޒާއަށް އިންސާނީ ކާރިސާއެއް ކުރިމަތިވެފައިވާކަމަށް އދއިން ވަނީ ބުނެފައެވެ.
އެތައް ހާސް ބަޔަކު ބަނޑުހައި ހޫނުކަމުގައި ތިބިއިރު، އެމީހުންނަށް ބޭނުންވާ އިންސާނީ އަސާސީ ޚިދުމަތްތައް އިސްރާއީލުން ވަނީ ކަނޑާލާފައެވެ. އަދި ޣައްޒާއަށް އެހީގެ ތަކެތި ވެއްދުމަށް އދ އަށްވެސް އިސްރާއީލުން ހުރަސް އަޅަމުންދާއިރު، އިސްރާއީލުގެ އަމަލުތައް ކުށްވެރިކުރަން އެއްޗެއް ބުނުން ފިޔަވައި މި ގަތުލުއާއްމު ހުއްޓުވުމަށް އިތުރުކަމެއް ކުރުމަށް ބައިނަލްއަގްވާމީ މުޖްތަމައު ވަނީ ނުކުޅެދިފައެވެ.
Advertisement
This content is created and paid for by advertisers and does not involve Voice Journalists
