ސަރުކާރުގެ ޚަރަދުތައް ހަމަޖެއްސުމަށް 1.2 ބިލިޔަން ރުފިޔާގެ ޓްރެޜަރީ ބިލް (ޓީ-ބިލް) ވިއްކުމަށް ނިންމައިފިއެވެ.

މާލީ ވުޒާރާއިން ވަނީ ޖުމްލަ 1.2 ބިލިޔަން ރުފިޔާގެ 4 ޓީބިލެއް ނޮވެމްބަރުމަހުގެ 4 ވަނަ ދުވަހު ވިއްކުމަށް ނިންމާފައިވާކަން އިއުލާން ކޮށްފައެވއެ.

• 28 ދުވަހުން އަނބުރާ ދެއްކުމަށް ވިއްކާ 235 މިލިޔަން ރުފިޔާގެ ޓީ-ބިލް

• 98 ދުވަހުން އަނބުރާ ދެއްކުމަށް ވިއްކާ 458 މިލިޔަން ރުފިޔާގެ ޓީ-ބިލް

• 182 ދުވަހުން އަނބުރާ ދެއްކުމަށް ވިއްކާ 183 މިލިޔަން ރުފިޔާގެ ޓީ-ބިލް

• 364 ދުވަހުން އަނބުރާ ދެއްކުމަށް ވިއްކާ 351 މިލިއަން ރުފިޔާގެ ޓީ-ބިލް

ޓީ-ބިލްތަކުގެ އިންޓްރެސްޓް ރޭޓް އުޅެނީ 3.50 އިންސައްތައާއި 4.60 އިންސައްތައާއި ދެމެދުގައެވެ.

ޓީ-ބިލަކީ ދާހިލީ ބާޒާރުން ދަރަންޏަށް ފައިސާ ނެގުމަށް ސަރުކާރުން ވިއއކާ އެއްޗެކެވެ. ޓީ-ބިލު ވިއްކައިގެން ލިބޭ ފައިސާއަކީ ކަނޑައަޅާފަައިވާ އިންޓަރެސްޓު ރޭޓުގައި އަނބުރާ ދައްކަންޖެހޭ ފައިސާ އެވެ. ޓީ-ބިލު މެޗުއާވެ އަނބުރާ ދައްކަންޖެހޭ މުއްދަތު ދިގުވީ މިންވަރަކަށް ޓީ-ބިލުގެ އިންޓަރެސްޓު ރޭޓު ބޮޑުވާނެ އެވެ.

ސަރުކާރުގެ ޓީ-ބިލު އެންމެ ގިނައިން ގަންނަނަނީ ޕެންޝަން ފަންޑާއި ކޮމާޝަލް ބޭންކުތަކުންނެވެ. އެގޮތުން ހަމައެކަނި ޕެންޝަން ފަންޑުން 10 ބިލިއަން ރުފިޔާއާ ގާތްކުރާ އަދަދެއް ޓީ-ބިލަށް އިންވެސްޓުކޮށްފައިވެ އެވެ.