އާސަންދަ ރިފޯމް ކުރުމުގެ ގޮތުން އެ ޚިދުމަތް ދޭ އުސޫލަށް ގެނައި ކުއްލި ބަދަލާއެކު، އާސަންދައިގެ ޚިދުމަތް ދިނުމުގައި ދަތިވެ، ލަސްތަކެއް ކުރިމަތިވެދާނެ ކަމަށް އޭޑީކޭ ހޮސްޕިޓަލުން ބުނެފިއެވެ.

ސަރުކާރުން އާސަންދަ ރިޕޯމްކުރުމަށް ކުރާ މަސައްކަތުގެ ތެރެއިން، މިއަދުން ފެށިގެން ”އައުޓް ޕޭޝަންޓުންނަށް“ އާސަންދަ ދޫކުރާނީ ޕްރައިވެޓް އިންޝުއަރެންސުން ކެނޑުމަށްފަހުކަމަށް އިއްޔެ ވަނީ އިއުލާން ކޮށްފައެވެ. 

އެކަމާ ގުޅިގެން އޭޑީކޭ ހޮސްޕިޓަލުން ނެރުނު ބަޔާނުގައިވަނީ، މި ބަދަލާ ގުޅިގެން ލާޒިމުކޮށްފައިވާ ގޮތަށް، ޚިދުމަތް ހޯދަން އަންނަ ފަރާތްތަކުގެ އިންޝުއަރެންސް އޮތްތޯ ޔަގީންކުރާނެ ކަމަށެވެ.

Advertisement

އާސަންދައިގެ ދަށުން ދޭ ޚިދުމަތްތަކަކީ ސޮފްޓްވެއާއެއްގެ ދަށުން އެ ހޮސްޕިޓަލުން ދެމުން އަންނަ ޚިދުމަތެއްކަން ފާހަގަކޮށް، އޭޑީކޭއިން ބުނީމި ފަދަ ބޮޑު ބަދަލެއް ކުއްލި ގޮތަކަށް ގެނައުމުގެ ސަބަބުން، ސޮފްޓްވެއާއަށް ގެންނަން ޖެހޭ ބަދަލުތައް ގެނައުމުގެ އިތުރުން، އެ ބަދަލުތަކަށް މުވައްޒަފުން އަހުލުވެރި ކުރުވަން އެއްވެސް ވަގުތެއް ލިބިފައިނުވާ ކަމަށެވެ.

އެހެން ކަމުން، މި ބަދަލުތަކާއެކު ޚިދުމަތް ދިނުމުގައި ކޮންމެވެސް ވަރެއްގެ ދަތިތަކާ ކުރިމަތިވެ، ޚިދުމަތް ފޯރުކޮށްދިނުމުގައި ލަސްތަކެއް ކުރިމަތިވުމަކީ އެކަށީގެންވާ ކަމެއް ކަމަށް އޭޑީކޭގެ ބަޔާނުގައި ބުނެފައިވެއެވެ.

އާސަންދައިން ނިންމި ނިންމުމުގައި ވަނީ އިންޝުއަރެންސް ހަމަވުމަށްފަހު ނޫނީ އެނދުމަތިނުކޮށް ދެވޭ ފަރުވާއަށް އާސަންދައިގެ ޚިދުމަތް ނުދިނުމަށެވެ. އެހެން ނަމަވެސް އަމިއްލަ އިންޝުއަރެންސުން ކަވަރުނުކުރާ އެނދުމަތިނުކޮށްދެވޭ ފަރުވާއެއް އާސަންދައިން ކަވަރުކުރާނަމަ، އެ ޚިދުމަތަކަށް އާސަންދަ ލިބިގެންދާނެ ކަމަށް އޭޑީއޭއިން ބުނެއެވެ.