ރާއްޖެއިން ބޭރުގައި ކިޔަވާ ދަރިވަރުންނަށް ކާޑު ލިމިޓް އިތުރުކުރުމަށްޓަކައި ރަޖިސްޓްރީވުމުގެ ފުރުޞަތު ހުޅުވާލައިފިއެވެ.

މިއަދުން ފެށިގެން ބޭރުގައި ކިޔަވާ ދަރިވަރުންނަށް މަހަކު 1،200 އެމެރިކާ ޑޮލަރުގެ ލިމިޓެއް ދޭން ބީއެމްއެލްއިން ވަނީ ނިންމާފައެވެ. 

މި އައު ލިމިޓް ހޯދުމަށް ދަރިވަރުން ސްޓޫޑަންޓް ޕޯޓަލް މެދުވެރިކޮށް ރަޖިސްޓްރީ ކުރަންޖެހޭނެ ކަމަށް ބީއެމްއެލްއިން ބުނެފައިވެއެވެ. 

ްރަޖިސްޓްރީ ވުމަށްޓަކައި ބޭނުންވާ ލިޔެކިޔުންތަކަކީ؛

* ޕާސްޕޯޓުގެ ކޮޕީއެއް

* ސްޓޫޑަންޓް ވިސާ

* ޔުނިވަރސިޓީ ނުވަތަ ކޮލެޖުން ދޫކޮށްފައިވާ އެންރޯލްމަންޓް/އެކްސެޕްޓަންސް ސިޓީ. މި ސިޓީގައި ދަރިވަރުގެ މަޢުލޫމާތާއި، ކިޔަވާ ކޯހުގެ ނަމާއި، ފެށޭ ތާރީޚާއި މުއްދަތު ހިމަނަން ޖެހެއެވެ.

އިތުރުކުރެވޭ ލިމިޓް ޕްރޮސެސް ކުރެވޭނީ އެއް ދުވަހުގެ ތެރޭގައި ކަމަށް ބޭންކުން މަޢުލޫމާތު ދީފައިވެއެވެ. އަދި ދަރިވަރުންނަށް އެމީހުންގެ ރިކުއެސްޓް ސްޓޭޓަސް ސްޓޫޑަންޓް ޕޯޓަލް މެދުވެރިކޮށް ބެލޭނެ ކަަމަށާ، ޕްރޮސެސް ކުރެވުމުން މޮބައިލް އެޕް މެދުވެރިކޮށް ނޯޓިފިކޭޝަން ލިބޭނެ ކަމަށެވެ. 

ބީއެމްއެލް އިން އިތުރަށް ބުނީ، ރަޖިސްޓްރީ ކުރުމަށްފަހު، އައު ލިމިޓް ބޭނުންކުރެވޭނީ ސްޓޫޑަންޓް ޕޯޓަލް މެދުވެރިކޮށް ޚިޔާރުކުރާ ޑެބިޓް ކާޑަކުން ކަމަށާ، އަދި މި ލިމިޓް ބޭނުންކުރެވޭނީ ދަރިވަރު ދިރިއުޅޭ ޤައުމުގައި ކަމަށެވެ.

 މީގެ އިތުރުން، މި ލިމިޓްގެ ތެރެއިން 250 އެމެރިކާ ޑޮލަރު އެހެން ބޭރު ޤައުމުތަކުގައި ބޭނުންކުރެވޭނެ ކަމަށްވެސް ބުންޏެވެ.