ސްޕެއިންގެ އިރުމަތީގައި އޮންނަ ވެލެންސިއާގައި ފެންބޮޑުވެ 200 އަށްވުރެ ގިނަ މީހުން މަރުވެއްޖެއެވެ.

މިއީ މިހާތަނަށް ސްޕެއިން އަށް ކުރިމަތިވި އެންމެ ވަރުގަދަ ފެންބޮޑުވުމުގެ ކާރިސާއަށް ވާއިރު، މިއީ 1970 ގެ ފަހުން ޔޫރަޕަށް ކުރިމަތިވި އެންމެ ނުރައްކާތެރި އެއް ކާރިސާއެވެ.

މިކަމާއި ގުޅިގެން، އެގައުމުގެ ކަމާ ބެހޭ ފަރާތްތަކުން ބުނި ގޮތުގައި، މި ހާދިސާގައި އެ ސަރަހައްދުގެ 90 އިންސައްތަ އަށް ވުރެ ގިނަ ގެތަކަށް އެކިވަރުގެ ގެއްލުންތައް ވެފައިވާއިރު، މިހާތަނަށް 205 މީހުން ވަނީ މަރުވެފައެވެ.

Advertisement

މަރުވެފައިވާ މީހުން ބޭތިއްބުމަށްޓަކައި، ވަގުތީ މޯޗަރީ އެއް ހުޅުވާފައިވާއިރު، ކުރިއަށް އޮތް ތަނުގައި ވެސް ވާރޭވެހޭނެ ކަމަށް ލަފާކުރެވޭތީ ހާލަތު އިތުރަށް ގޯސްވާނެކަމަށް އެގައުމުގެ ކަމާ ބެހޭ ފަރާތްތަކުން އަންނަނީ ބުނަމުންނެވެ.

މި ހާދިސާގައި ގެއްލުނު މީހުން ހޯދުމަށް އެކި ސަރަހައްދުތަކުގައި 500 ސިފައިން ހަރަކާތްތެރިވަމުން އަންނައިރު، ހާލަތަށް ބަދަލެއް ނާންނާތީ މި ހާދިސާއާއި ގުޅިގެން މަރުވެފައިވާ މީހުންގެ އަދަދު މައްޗަށްދާނެ ކަމަށް އެގައުމުން ލަފާކުރެއެވެ.

އެއް އަހަރުދުވަހުގެ ވާރޭ އެންމެ 8 ގަޑިއިރު ތެރޭގައި ވެހިފައިވާއިރު، ކޯރުތައް ބަންޑުން ޖަހާލުމުގެ ސަބަބުން، އެގައުމުގެ މަގުތަކާއި ރެއިލްވޭ ތަކުގެ އިތުރުން ބްރިޖްތަކަށް ވެސް ބޮޑެތި ގެއްލުންތަކެއް ލިބިފައިވާކަން ފާހަގަކޮށްލަން ޖެހެއެވެ.