ރަށްރަށުގެ ތަރައްޤީއަށް ކުރާ ކަންކަމުގައި ކައުންސިލްތަކުގެ ދައުރު މިހާރަށްވުރެ ބޮޑުކުރަން ޖެހޭކަމަށް ސިޓީތަކާއި އިދާރީ ދާއިރާތައް ހިންގުމާބެހޭ ވުޒާރާގެ ވަޒީރު އާދަމް ޝަރީފް އުމަރު ވިދާޅުވެއްޖެއެވެ.
ކޮޅުމަޑުލު އިސްރަށްވެހިންގެ މަހާސިންތާ 2024 ހުޅުވައިދެއްވުމަށް ރޭ ކޮޅުމަޑުލުގެ ވެރިރަށް ވޭމަންޑޫގައި ބޭއްވި ރަސްމިއްޔާތު ޝަރަފުވެރިކޮށްދެއްވާ ވާހަކަފުޅު ދައްކަވަމުން ވަޒީރު އާދަމް ޝަރީފް ވިދާޅުވީ، ކައުންސިލުތަކަށް އޮންނަ ހިއްސާއާ ދައުރު މިހާރަށް ވުރެ ވެސް ބޮޑުވުމަކީ، ދެކެން ބޭނުންވާ މަންޒަރާއި، އުންމީދުކުރާ ދުވަސް ކަމަށެވެ.
ވަޒީރު ވިދާޅުވީ، ސަރުކާރުގެ ފަރާތުން ކުރާ ކޮންމެ ކަމެއް ކުރުމުގައި ރައްޔިތުންނާ ހަމައަށް އައިސްގެން އެ ކަމެއް ކުރާ ކަމަށް ވާނަމަ، އެ ކަމެއްގައި ރަށްރަށުގެ ކައުންސިލްގެ ދައުރު އޮންނަންޖެހޭ ކަމަށާއި، ކައުންސިލުގެ ހިއްސާ އިތުރު ކުރަންޖެހޭ ކަމަށެވެ.
"ރަށްރަށުގައި ކުރާ ކަންތައްތައް އެއީ ނަރުދަމާ ކަމަށް ވިއަސްވެސް، އެއީ ފެނުގެ ޚިދުމަތް ކަމަށް ވިއަސްވެސް، ނުވަތަ ކަރަންޓުގެ ޚިދުމަތެއް ކަމަށް ވިޔަސްވެސް، ނުވަތަ އެ ރަށެއްގައި ދައުލަތުން ނުވަތަ ސަރުކާރުގެ ފަރާތުން ވަކި މުއައްސަސާއެއް ޤާއިމްކުރުން ކަމަށް ވިޔަސްވެސް، އެ ކަމެއް ކުރުމުގައި ރައްޔިތުންގެ ފަރާތުން ވާހަކަދައްކާ މަޝްވަރާކުރަން ތިބޭ ބަޔަކީ ކައުންސިލުތައް"
ވަޒީރު އާދަމް ޝަރީފް އުމަރު ވިދާޅުވިއެވެ.
މިހާ ހިސާބަށް މި އައިއިރު ވެސް ލާމަރުކަޒީ ނިޒާމަށް ބަދަލުގެނައުމަށް ޓަކައި ޤާނޫނު އަސާސީ ވެސް ބަދަލުކޮށްފައިވާއިރު، ލާމަރުކަޒީ ޤާނޫނަށް ގިނަ އިޞްލާޙުތަކެއް މިހާރު ވެސް ގެނެވިއްޖެ ކަން ފާހަގަކުރައްވަމުން ވަޒީރު އާދަމް ޝަރީފް ވިދާޅުވީ، ލާމަރުކަޒީ ނިޒާމު ރަނގަޅުކުރުމަށް ޓަކައި ކޮންމެ ސަރުކާރަކުން ވެސް ގިނަ މަސައްކަތްތަކެއް ކުރައްވާފައިވާ ކަމަށާ، މި ނިޒާމު ފުރަތަމަ ތަޢާރަފުކުރެވުނު އިރުގައި ވެސް ނިޒާމުގައި ރަނގަޅުކުރަންޖެހޭ އެތައް ކަމެއް ހުރިކަމަށެވެ.
އެހެންނަމަވެސް ރައްޔިތުން ވޯޓުދީގެން، ރައްޔިތުންގެ ޙައްްޤުގައި ބަސްބުނަން ތިއްބެވި ބޭފުޅުންނަކީ ކައުންސިލަރުން ކަމަށް ވާތީ، ރައްޔިތުންގެ ހައްޤުގައި ވަކާލާތު ކުރުމުގެ ފުރުޞަތާއި، ރައްޔިތުން ބޭނުންވާ ކަންތައްތައް ވިދާޅުވުމުގެ ފުރުޞަތު ކައުންސިލަރުން އެބަ އޮތް ކަމަށާއި، މިއަދު ކޮންމެ ނިންމުމެއް ނިންމަނީ މާލޭން ނޫން ކަމަށް ވެސް ވަޒީރު އާދަމް ޝަރީފް އުމަރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
