ޤާނޫނުނުތަކުގައި ބަޔާންކޮށްފައިވީނަމަވެސް، މިހާތަނަށް ކައުންސިލްތަކަށް ދީފައިނުވާ ފައިސާ އަދުގެ ސަރުކާރުން ދޭނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ހުޅުމާލޭގައި މިއަދު ހުޅުވި، ކެޓްޝެލްޓަރ ފެސިލިޓީ ހުޅުވުމުގެ ރަސްމިއްޔާތުގައި ވާހަކަދައްކަވަމުން ރައީސް ވިދާޅުވީ، ލާމަރުކަޒީ ނިޒާމް އެންމެ ފުރިހަމައަށް ހިންގުމަށް މި ސަރުކާރުން މަސައްކަތްކުރަމުންދާކަމީ ފެންނާންއޮތް ހަގީގަތެއް ކަަށެވެ. ސަރުކާރުން ކައުންސިލްތައް ބާރުވެރިކުރުވުމަށް މަސައްކަތް ކުރަމުންދާކަމަށާއި، ކައުންސިލްތައް މާލީ ގޮތުން ބާރުވެރިކުރުވުމަށް ފުރުސަތުތައް ފަހިކޮށްދީފައިވާކަން ރައީސް ވަނީ ފާހަގަކުރައްވާފައެވެ.

މިގޮތުން ކައުންސިލްތަކަށް ފަޅުރަށްތައް މަގުފަހިކޮށްދީފައިވާއިރު، ލޯކަލް ޓޫރިޒަމްގެ ތެރެއިން ލިބޭ ވަކި އިންސައްތައެއް ކައުންސިލްތަކަް ޖަމާކޮށްދިނުމަށް ނިންމާފައިވާކަމަށް ރައީސް ވިދާޅުވިއެވެ. 

ރައީސް ވިދާޅުވީ މީގެކުރިން ގާނޫނުގައި ލިޔެވިފައި، އެހެންނަމަވެސް ކައުންސިލްތަކަށް ނުދެވިހުރި އެހީތެރިކަން ދޭނޭކަން އިއުލާންކުރުން އޮންނާނޭ ކަމަށެވެ. 

ރައީސް ޑރ.މުއިއްޒު ވިދާޅުވީ ކައުންސިލްތަކަށް ޒިޔާރަތްކުރުމުން އެނގިގެންދަނީ އެތަންތަނުގެ އިމާރާތްތައް ނުހެދިހުރި ތަންކަމަށާއި، މި ސަރުކާރުން މިއަހަރުގެ ތެރޭގައި 50 ކައުންސިލެއްގެ ކައުންސިލް އިމާރާތް ކުރުމުގެ މަސައްކަތް ފަށާނޭކަމަށެވެ. އަދި މި ދައުރުގައި 120 އަށްވުރެ ގިނަ ކައުންސިލް އިދާރާ އެޅުމުގެ މަސައްކަތް ކުރެވިގެންދާނޭކަމަށްވެސް ރައީސް ވިދާޅުވިއެވެ.

ރައީސް ވަނީ މިހާތަނަށް އެމަނިކުފާނު ބައްދަލުކުރެއްވި 160 ކައުންސިލުން އެދުނު ކަންކަން ތަންފީޒުވަމުން ދާކަން ފާހަގަކުރައްވާފައެވެ.