ސިފައިންނާއި ފުލުހުން އިތުރުކޮށް ތަމްރީނުކުރުމަށް 400 މިލިއަން ރުފިޔާގެ ބަޖެޓެއް ކަނޑައަޅާފައިވާކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ނަސްރުގެ ދުވަހުގެ މުނާސަބަތުގައި ދެއްކެވި ވާހަކަފުޅުގައި ރައީސް ޑރ.މުއިއްޒު މިރޭ ވިދާޅުވީ، ސިފައިންނާއި ފުލުހުން އިތުރުކުރުމަށް ސަރުކާރުން ނިނބްމާފައިވާކަމަށެވެ. ނެޝަނަލް ސާވިސް ނަމުގައި ކުރިއަށްްގެންދާ މި ޕްރޮގްރާމަކީ ވަރަށް ހާއްސަ ޕްރޮގްރާމެއްކަން ފާހަގަކުރައްވަމުން ރައީސް ވިދާޅުވީ، މި ޕްރޮގްރާމުގެ ދަށުން ކުރިއަށްއޮތް ހަތަރު އަހަރުދުވަހުގެ ތެރޭގައި 4،000 ސިފައިންނާއި 1،000 ފުލުހުން ތަމްރީނު ކުރާނޭ ކަމަށެވެ.

ސްކޫލްނިމޭ ދަރިވަރުންނަށް އަމާޒުކޮށް ކުރިއަށްގެންދާ މި ޕްރޮގްރާމު ހާއްސަ ކުރާނީ ސްކޫލްނިމޭ ދަރިވަރުންގެ ތެރެއިން ވަޒީފާ ހޯދަން ނުވަތަ މަތީ ތަމްރީނު ހޯދުމަށް ފުރުސަތު ހޯދަން ދަތިވާ ކުދިންނަށްކަން ރައީސް ފާހަގަކުރެއްވިއެވެ.

ރައީސް ވަނީ ސްކޫލް ނިމޭ ދަރިވަރުންގެ ތެރެއިން މަތީ ތައުލީމާއި ވަޒީފާ ނުލިބޭ ދަރިވަރުންގެ އަދަދު ދެހާހުން މަތީގައި އުޅޭކަމަށާއި އެކުދިންނަށް މިފަދަ ޕްރޮގްރާމެއްގެ މުހިއްމުކަން ބޮޑުކަމަށް ރައީސް ވިދާޅުވިއެވެ.

ރައީސް ވިދާޅުވީ ގައުމީ ހިދުމަތުގެ މި ޕްރޮގްރާމުގައި 16 އަހަރު ފުރިފައިވާ ކުދިންނަށް ބައިވެރި ވެވޭނޭގޮތް ހެދުމަށްޓަކައި ގާނޫނީގޮތުން އެކަން ފަހިކޮށްދެއްވާނޭ ކަމަށެވެ. ރައީސް ވިދާޅުވީ ގައުމީ ދިފާއީބާރު އިތުރަށް ތަރައްޤީކުރަން ޖެހިފައިވާ ކަމަށާއި، އަތޮޅުތެރޭގައި ހުރި ސިފައިންގެ މަރުކަޒުތައް މަރާމާތުކޮށް ތަރައްޤީކުރަން ޖެހިފައިވާކަމަށެވެ. މިކަމަށް ބޭނުންވާ އެހީތެރިކަން އެކުވެރި ދައުލަތްތަކުން ލިބިފައިވާކަން ފާހަގަކުރައްވަމުން ރައީސް ވިދާޅުވީ، އަންނަ އަހަރު މި މަސައްކަތް ފެށިގެންދާނޭކަމަށެވެ.