ދުނިޔޭގެ ސިޔާސީ އޮއިވަރު ކުރިއަށްދާގޮތުން ކޮންމެފަދަ ވަގުތެއްގައިވެސް ކުއްލި ނުރައްކަލުގެ ހާލަތެއް މެދުވެރިވެދާނޭކަމަށް ވިސްނަންޖެހޭކަމަށް، ރާއްޖޭގައި 30 އަހަރު ވެރިކަންކުރެއްވި ރައީސް މައުމޫނު އަބްދުލްޤައްޔޫމް ވިދާޅުވެއްޖެއެވެ.

ރައީސް މައުމޫނަކީ 1988 ވަނަ އަހަރުގެ ނޮވެމްބަރު 3 ގައި ރާއްޖެއަށް ކުރިމަތިވި އުދުވާނުގައި އޭރު ރާއްޖޭގެ ރައީސްކަމުގެ މަގާމުގައި ހުންނެވި ބޭފުޅާއެވެ.

ނަސްރުގެ ދުވަހުގެ މުނާސަބަތުގައި ސަރުކާރުން ބޭއްވެވި ރަސްމީ ޖަލްސާގައި ވާހަކަދައްކަވަމުން ރައީސް މައުމޫން ވިދާޅުވީ، ދުނިޔޭގެ ސިޔާސީ އޮއިވަރު މިއަދު ހުރިގޮތަށް ބަލާއިރު، ކޮންމެ ފަދަ ވަގުތެއްގައިވެސް ރާއްޖެއަށް ކުއްލި ނުރައްކަލުގެ ހާލަތެއް އަތުވެދާނޭކަމަށް ދިވެހިން ތިބެން ޖެހޭނީ ތައްޔާރުވެގެން ކަމަށެވެ. މިކަމަށް ދިވެހިރައްޔިތުން މިއަދުވެސް އަދި މާދަމާވެސް ފުރިހަމައަށް ތައްޔާރުވެގެން ތިބެންޖެހޭކަމަށް ރައީސް މައުމޫން ފާހަގަކުރެއްވިއެވެ.

ދިވެހިން އަބަދުވެސް ހަނދާންކުރަންވީ ކަމަކީ ނޮވެމްބަރު ތިނެއްގެ އުދުވާނީ ހާދިސާއިން ސަލާމަތްވުމަކީ މާތްﷲ ގެ ހަޒްރަތުން ލިބުނު ނަސްރެއްކަމަށެވެ.

މީގެ އިތުރުން އެ ހާދިސާގައި ދިވެހިންނަށް އެހީތެރިވި ފަރާތްތަކުގެ އެހީތެރިކަން އަބަދުވެސް ފާހަގަކުރަން ޖެހޭނޭ ކަމަށާއި، މިގޮތުން އަވައްޓެރި އިންޑިއާ އާއި ކޮމަންވެލްތުގެ ނަން ރައީސް މައުމޫނު ފާހަގަކުރެއްވިއެވެ. ރައީސް މައުމޫނު ވިދާޅުވީ ނޮވެމްބަރު ތިނެއްގެ ހާދިސާއިން ދިވެހިޤައުމުގެ މިނިވަންކަމަށްޓަކައި ޤައުމުގެ އިއްޒަތާއި ޝަރަފަށްޓަކައި ހަށިގަނޑާއި ފުރާނައިން ޤުރުބާންވުމަށް ކެރުމަކީ ދިވެހިންގެ ތެެރޭގައި ވަރަށް ފުނަށް ބިންވަޅު ނެގިފައިވާ ހަގީގަތެއްކަން ސަބިތުވެގެންދިޔަ ކަމަށެވެ.

މީގެ އިތުރުން ރައީސް މައުމޫނު ވަނީ ފަލަސްތީނުގެ ނަސްލު ނައްތާލުމަށް އިސްރާއީލްގެ ނިރުބަވެރިން ހިންގަމުންދާ ކަންތައްތައް ކުއްވެރިކުރަންޖެހޭ ކަމަށް ވިދާޅުވެފައެވެ. އަދި ފަލަސްތީނުގެ މިނިވަންކަން ހޯދުމަށް ކުރަމުންގެންދާ އެ މަސައްކަތުގައި ފަލަސްތީނުގެ ރައްޔިތުންނާއެކު ދެމިތިބެންޖެހޭނޭ ކަމަށްވެސް ރައީސް މައުމޫން ވަނީ ވިދާޅުވެފައެވެ.