8000 ރުފިޔާއަށް ލިބޭ އިންޖެކްޝަނެއް، އާސަންދައަށް ބިލްކުރާއިރު 23000 ރުފިޔާ ކަމަށް ޖަހައި ބޮޑު އަދަދުން ފައިދާ ނަގަމުންދިޔަކަން ހާމަވެއްޖެއެވެ. 

މިކަން ހާމަކޮށްދެއްވީ އެންސްޕާގެ ސީއީއޯ ހީނާ ވަލީދު މީސްމީޑިއާގައި ކުރެއްވި ޕޯސްޓެއްގައެވެ.

އެގޮތުން، ލޮލުގެ ބައްޔެއް ހުންނަ މީހަކު ޖަހަންޖެހޭ އިންޖެކްޝަނެއް އައިކެއާ މެދުވެރިކޮށް ގެނެސްގެން، އެ ބޭނުން ކުރަމުން އަންނަ ކަމަށާ މީގެ ކުރިން އާސަންދައިން ލިބޭ ނަމަވެސް، އަލަށް ގެނެވުނު އިސްލާހު ތަކާއެކު އެ އިންޖެކްޝަނަށް އާސަންދަ ނުލިބޭނެ ކަމަށް އައިކެއާއިން އަންގާފައިވާ ކަމަށް ބުނެ މީހަކު މީސްމީޑިއާގައި ވަނީ  ޕޯސްޓެއް ކޮށްފައެވެ. އަދި އެއީ 24،000 ރުފިޔާގެ އިންޖެކްޝަނެއް ކަމަށްވެސް އޭނާ ލިޔެފައިވެއެވެ. 

އެކަމާއި ގުޅިގެން ހީނާ ކުރެއްވި ޕޯސްޓުގައި ވިދާޅުވީ، އެއީ އާސަންދައިން ވިޔަފާރިކޮށް ނާޖާއިޒު ބޮޑެތި ފައިދާ ނަގައި، އުޞޫލުތަކުން ބޭރުން ކަންކުރާ ކަމުގެ ލާމަސީލު މިސާލެއް ކަމަށެވެ. 

އެގޮތުން ހީނާ ވިދާޅުވީ، އާސަންދައިގެ ބޭހުގެ އަގު ރިވައިޒްކުރުމުގެ ތެރެއިން، އެންމެ ޚަރަދު ބޮޑު އެއް ބޭސްކަމުގައިވާ "Lucentis Injection“ (ލުސެންޓިސް އިންޖެކްޝަން) ގެ އަގު ޗެކްކުރުމުގެ ގޮތުން، ލޮލުގެ ފަރުވާގެ ޚިދުމަތް ދޭ ފަރާތަކުން ބޭސް ގަންނަ އަގު ހޯދުމަށް އެދުމުން، ފޮނުވި  އިންވޮއިސްތަކުން މި ކަން ހާމަވި ކަމަށެވެ.

އިތުރަށް ބެލިބެލުމުން، މި ބޭސް އެތެރެކުރަން ރަޖިސްޓަރކޮށްފައިވަނީ މުޅިން އެހެން ކުންފުންޏަކުންކަން އެނގުނު ކަމަށާ، ނަމަވެސް އެ ފަރާތުން އެއްވެސް ވަރަކަށް މި ބޭސް އެތެރެކޮށްފައި ނުވާ ކަން ހީނާ ފާހަގަކުރެއްވިއެވެ.

އަދި ލޮލުގެ ފަރުވާގެ ޚިދުމަތްދޭ މި ފަރާތުން ބޭސް ވިއްކާފައިވަނީ ބޭސް އެތެރެކުރުމަށް ރަޖިސްޓަރީނުކޮށް، ހަމައެކަނި ޕްރިސްކްރިޕްޝަނަށް ކަމަށް ވާއިރު އާސަންދަ، ސްކީމްގެ ތެރެއިން މި އިންޖެކްޝަނަށް އެންމެ ގިނައިން ބިލްކޮށްފައިވަނީ އެ ފަރާތުން ކަމަށް ހީނާ ވިދާޅުވުއެވެ. 

މީގެ އިތުރުން، މޯލްޑިވްސް ފުޑް އެންޑް ޑްރަގް އޮތޯރިޓީގައި ރަޖިސްޓަރީކޮށްފައިނުވާ އިންޖެކްޝަނަކަށް ބިލުކޮށްފައިވުމާއި، އަގުގެ ބޮޑު ތަފާތަކުން ބޮޑު ފައިދާއެއް ނަގަމުންދިޔައިރު އެކަން އާސަންދަ ކުންފުންޏަށް ނުވަތަ ނޭޝަނަލް ސޯޝަލް ޕްރޮޓެކްޝަން އެޖެންސީއަށް އަންގާފައިނުވާކަންވެސް ފާހަގަކުރެވުނު ކަމަށް ވިދާޅުވިއެވެ.

މިއާއެކު ހީނާ ވިދާޅުވީ، އެކި އަމިއްލަ ފަރާތްތަކުން ވިޔަފާރީގެ ފައިދާގެ ބޭނުމަށް އާސަންދަ ބޭނުންކުރުމުގެ ނަތީޖާއެއްގެ ގޮތުން، ރައްޔިތުންނަށް ބޮޑެތި ގެއްލުން ލިބޭކަމީ ހަގީގަތެއް ކަމަށެވެ.

އަދި މިހެން ދިމާވަނީ ޒަމާނުއްސުރެ މިނިޒާމްގެ ތެރޭގައި ހުރި މިފަދަ އެތައް މައްސަލައަކަށް އެޓެންޑް ނުކުރެވި، އެއް ނިޒާމް އަނެއް ނިޒާމާ ވާހަކަ ނުދެކެވި ބޮއްސުންލާން ދޫކޮށްލެވިފައި އޮތުމުގެ ސަބަބުންކަންވެސް ފާހަގަކުރެއްވިއެވެ.

”ރައީސްގެ ލަފާފުޅުގެ ދަށުން، الله ގެ އިރާދަފުޅާއެކު އަޅުގަނޑުމެން އެކަން ބަދަލުކޮށް އިސްލާޙު ކުރާނަން.“ ހީނާ ވިދާޅުވިއެވެ.