ދައުލަތުގެ ބަޖެޓު ފަރުމާ ކުރުމުގައި ރައީސުލްޖުމްހޫރިއްޔާ ޑރ މުޙައްމަދު މުޢިއްޒު އެންމެ ބޮޑަށް ވިސްނާވަޑައިގެންފައިވަނީ އެ ބަޖެޓުން ހޭދަކުރާ ކޮންމެ ރުފިޔާއަކީވެސް ރައްޔިތުންނަށް ފައިދާވާ ގޮތަށް ކުރާ ހޭދައަކަށް ހެދުމަށް ރައީސް އޮފީހުގެ އަންޑަރ ސެކްރެޓަރީ މުޙައްމަދު ފިރުޒުލް އަބްދުالله ޚަލީލް ރޭ ވިދާޅުވެއްޖެއެވެ.

ސަރުކާރުގެ ފަރާތުން މިދިޔަ ހަފްތާގައި ރައްޔިތުންގެ މަޖިލީހަށް ހުށަހަޅާފައި ވަނީ 56.6 ބިލިއަން ރުފިޔާގެ ބަޖެޓެކެވެ.

ބަޖެޓުގެ މައުލޫމާތުތައް ފޯރުކޮށްދިނުމަށް ޕީއެންސީ ކުރިޔަށް ގެންދާ ”ބަޖެޓު ސައްލާ“ ގެ ފުރަތަމަ ޕްރޮގްރާމްގައި ފިރުޒުލް ވިދާޅުވީ، މި ބަޖެޓަކީ ރައްޔިތުންގެ ބޭނުންތައް ފުއްދައިދޭ ބަޖެޓަކަށް ހެދުމަށް ރައީސް މުޢިއްޒު ވަރަށް ބޮޑު އަހައްމިޔަތުކަމެއް ދެއްވާފައިވާ ކަމަށެވެ. 

Advertisement

މި ބަޖެޓް ފަރުމާ ކުރެއްވުމުގެ މަސައްކަތް ރައީސުލްޖުމްހޫރިއްޔާ ކުރެއްވިއިރު، އެމަނިކުފާނުގެ ވިސްނުންފުޅު ބެހެއްޓެވީ، މި ބަޖެޓުގެ ތެރެއިން ހޭދަކުރެވޭ ކޮންމެ ވަކި އެއް ރުފިޔާ އަކީ އެއީ ރައްޔިތުމީހާގެ ސީދާ ބޭނުމަށް ކޭޓަރ ކޮށްދެވޭ އެއްޗަކަށް ހަދަން. 

އެހެންކަމުން، ދައުލަތުގެ ބަޖެޓުގެ ތެރެއިން ކިރާ ހޭދައިގެ ތެރެއިން އިސްރާފުގެ ގޮތުގައި ކުރެވޭ ކަންކަން ހުއްޓެވުމަށް އެމަނިކުފާނު ނިންމެވި ކަމަށް ވިދާޅުވިއެވެ. 

ރާއްޖޭގެ ދައުލަތުގެ ބަޖެޓަށް ފަރުމާކޮށްގެން އަޅުގަނޑުމެން ކުރާ ހޭދަ، ކޮންމެ އަހަރެއްގެ ޚަރަދު ބަރަދު ހުރީ އަޅުގަނޑުމެންގެ އިގްތިޞާދުގެ ނިސްބަތުން އަޅާކިޔާ ކަމަށް ވަންޏާ ދުނިޔޭގެ އެންމެ ކުރިއަރާފައިހުރި ގައުމުތަކަށް ވުރެވެސް މަތީގައި. ޖަރުމަނު، އެމެރިކާ، ޖަޕާނު މި ގައުމުތަކަށްވުރެވެސް މަތީގައި ނިސްބަތުން އަޅުގަނޑުމެންގެ ޚަރަދު ހުރީ

ކަން މިހެން ހުރި ނަމަވެސް، ރައްޔިތުންގެ އަބަދުގެ ޝަކުވާ އަކަށް ވަނީ، އެ ރައްޔިތުން ބޭނުންވާ ކަންކަން ނުވާ ކަމުގެ ޝަކުވާކަން ފިރުޒުލް ފާހަގަކުރެއްވިއެވެ. 

އެހެންވެއްޖެއްޔާ އެ ކުރާ ހޭދަ މިދަނީ ކޮންތާކަށްހެއްޔާ. އެއީ ބަޖެޓް ފަރުމާ ކުރެއްވި ސުވާލަކީ. އެ ސުވާލުގެ ޖަވާބުގައި ބަޖެޓް ތެރޭގައި ހޭދަތަކަށް ހުރި އިސްރާފްތަކާއި ޚަރަދު ކުޑަކުރުމަށްޓަކައި 7.7 ބިލިއަނެއްހާ ރުފިޔާ ޚަރަދު ކުޑަކުރައްވައި، ރައްޔިތުންނަށް ބުރަ ނުވާނޭހެން 4.9 ބިލިއަން ރުފިޔާ އާމްދަނީ އިތުރުވާނޭހެން މުޅި ބަޖެޓް ފަރުމާ ކުރެއްވީ

މިފަދައިން ބަޖެޓް ފަރުމާ ކުރެއްވީ ރައްޔިތުންގެ އަސާސީ ބޭނުންތައް ފަހިކޮށްދެއްވުމަށް ކަމަށް ފިރުޒުލް ވިދާޅުވިއެވެ.