ވަކިދާއިރާއަކުން ޚިދުމަތް ކުރަން މަޖުބޫރުކުރުމަކީ ޑިމޮކްރަޓިކް ނިޒާމާއި ބީރައްޓެހި ގޮތެއްކަމަށް އެމްޑީޕީގެ ރައީސް އަބްދުالله ޝާހިދު ވިދާޅުވެއްޖެއެވެ.

އުމުރުން 16 އަހަރުވުމަށްފަހު ތައުލީމީގޮތުން އިތުރަށް ކުރިއަށް ދެވެން ނެތް ކުދިންނާއި ވަޒީފާ ނުލިބޭ ކުދިންނަށް ހާއްސަކޮށް, އަސްކަރީ ތަމްރީނުދީ އެދާއިރާއިން ކުދިން ވަޒީފާތަކަށް ނެރުމަށް ހާއްސަ ޕްރޮގްރާމެއް އިއުލާނު ކުރައްވާނޭކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ނަސްރުގެ ދުވަސް ފާހަގަކުރުމަށް ބޭއްވި ޖަލްސާގައި ވިދާޅުވެފައެވެ.

ރައީސްގެ އެ ވާހަކަފުޅާ ގުޅިގެން އިދިކޮޅު އެންމެބޮޑު ޕާޓީ، އެމްޑީޕީގެ ރައީސްކަމުގެ މަގާމުގައި ހުންނެވި ޝާހިދު ވިދާޅުވީ، ރައީސްގެ އެވާހަކަފުޅަކީ ޑިމޮކްރަޓިކް ނިޒާމާ ބީރައްޓެހި ގޮތެއް ކަމަށެވެ. 

ޝާހިދު ވިދާޅުވީ ސަލާމަތީ ޚިދްމަތްތައް ޒަމާނާ އެއްގޮތަށް ތަރައްޤީކޮށް ކުރިޔަށް ގެންދެވޭނީ، ޢިލްމީ ޤާބިލު ޒުވާނުންނަށްވެސް އެޚިދުމަތް ކުރުމަށް ފުރުސަތު ލިބިގެން ކަމަށެވެ. އޯލެވެލް ގައި ރަގަޅު ނަތީޖާއެއް ޙާސިލު ނުވާ ކުދިންނަށް އެކުއްޖެއްގެ ޝައުޤުވެރިކަން ހުރި ދާއިރާ އަކުން އިތުރު ތަމުރީނާއި ހުނަރުތައް ލިބޭނޭމަގު ފަހިކޮށްދީ ޤައުމުގެ ތަރައްޤީގައި ބައިވެރިވެ ޝާމިލުވެވޭ ގޮތަށް ޖާގަ އޮތުމަކީ އެފަދަ ޒުވާނުންގެ އުންމީދުތަކުގައި ޙަޤީގީ ކުލަޖެހިގެންދާނޭ މަގުކަމަށް ޝާހިދު ވިދާޅުވިއެވެ.

ޝާހިދު ވިދާޅުވީ އުފެއްދުންތެރި ޖީލެއް ބިނާކުރުމަށް އޮތް ރަނގަޅު ގޮތަކީ ޒުވާނުނުންގެ ހުނަރުތައް ތަރައްޤީ ކުރުމަށް މަގުފަހިކޮށްދިނުމާއެކު، ވަސީލަތްތައް ހޯދައިދީ ފުރުސަތުތައްވެސް އިތުރުކޮށްދިނުން ކަމަށެވެ.

ނަސްރުގެ ދުވަސް ފާހަގަކުރުމަށް ބޭއްވި ޖަލްސާގައި ރައީސް ޑރ.މުއިއްޒު ވިދާޅުވެފައިވަނީ، ސްކޫލްނިމޭ ކުދިންގެ ތެރެއިން ކިޔެވުމުގެ ފުރުސަތު އިތުރަށް ނުލިބޭ ކުދިންނާއި ވަޒީފާ ނުލިބި މަގުމައްޗަށް ގިނަވާ ކުދިންނަށް އެމްއެންޑީއެފް އާއި ފުލުހުންގެ ޕްރޮގްރާމް ތެރެއިން އެކުދިންނަށް ފުރުސަތު ހޯދައިދިނުމަށްޓަކައި ޕްރޮގްރާމެއް ހިންގުމަށް ވަރަށް އަވަހަށް އިއުލާނު ކުރައްވާނޭ ކަމަށެވެ.

މި ޕްރޮގްރާމުގެ ސަބަބުން އެކުދިން މަގުމައްޗަށް ގިނަވިޔަނުދީ، ކުދިންގެ ކުރިމަގަށް ހެޔޮ ބަދަލުތަކެއް އައުމުގެ ފުރުސަތު ފަހިވެގެންދާނޭކަމަށް ރައީސް ފާހަގަކުރެއްވިއެވެ.